.
၂၀၂၆ ခုနှစ်၊ ဧပြီလ ၂၂ ရက်
.
ရှမ်းပြည်နယ်အရှေ့ပိုင်း၊ ကျိုင်းတုံမြို့နယ်ရှိ
တောင်သူများ လျှောက်ထားခဲ့သည့် လယ်ယာမြေ အခြားနည်း အသုံးပြုခွင့် လျှောက်ထားခြင်းကို
အမြန်ဆုံး အတည်ပြု ဆောင်ရွက်ပေးစေလိုသည်ဟု တောင်သူများထံက သိရသည်။
.
“ကျိုင်းတုံမြို့နယ်မှာ ၂၀၂၃ ခုနှစ်ကတည်းက မြေယာ
အခြားနည်းသုံးစွဲခွင့် ရရှိရေးအတွက် လျှောက်ထားလွှာ တောင်သူ ၁၀ ဦးကို ရပ်/ကျေး၊
မြို့နယ်၊ ခရိုင်မြေယာကော်မတီ အဆင့်ဆင့်ရဲ့ မြေပြင်ကွင်းဆင်းစိစစ် အတည်ပြုပြီး ရှမ်းပြည်နယ်
မြေယာကော်မတီကို တင်ပြထားခဲ့တာ ကြာပါပြီ။ အခုချိန်ထိ ခွင့်ပြုချက် မရသေးပါဘူး” ဟု
တောင်သူတစ်ဦးက ပြောသည်။
.
မြေယာအခြားနည်းအသုံးပြုခွင့် လျှောက်ထားနိုင်သည့်
မြေအမျိုးအစားမှာ ပုံစံ (၇) ရရှိထားသည့် ယာမြေနှင့် ဥယျာဉ်မြေ အမျိုးအစားတို့ ပါဝင်ပြီး
ယင်းမြေပေါ်၌ ပြောင်းလဲအသုံးပြုလိုသည့် အကြောင်းအရာနှင့် ဆောင်ရွက်မည့် စီမံချက် အသေးစိတ်အချက်အလက်များကို
တင်ပြလျှောက်ထားရခြင်းဖြစ်ကြောင်း သိရသည်။
.
ထို့အပြင် ရပ်/ကျေး၊ မြို့နယ် မြေယာစိစစ်ရေးကော်မတီ
အဆင့်ဆင့်၏ ထောက်ခံချက်နှင့် မြေယာ အခြားနည်းသုံးစွဲခွင့် လျှောက်ထားလိုသူ တောင်သူက
ယင်းအခြားနည်းသုံးစွဲခွင့် လျှောက်ထားသည့် လုပ်ငန်းစီမံချက်ကို အကောင်အထည်ဖော်သွားနိုင်သည့်
ငွေကြေးပိုင်ဆိုင်မှု ဘဏ်အကောင့်ကိုပါ ပူးတွဲတင်ပြရကြောင်း သိရသည်။
.
တောင်ကြီးမြို့ရှိ ပြည်နယ်မြေယာ စိစစ်ကော်မတီထံသို့ ကျိုင်းတုံမြို့နယ်မှ ၂၀၂၃ ခုနှစ်က စတင်၍ မြေယာအခြားနည်းသုံးစွဲခွင့်
လျှောက်ထားခဲ့ပြီး ၂၀၂၄ ခုနှစ်တွင်လည်း အသစ်ထပ်မံ လျှောက်ထားသည့် တောင်သူများ ရှိသော်လည်း
ထိုစဉ်က ခွင့်ပြုချက်မရရှိခဲ့သဖြင့် ယခုအစိုးရသစ် လက်ထက်တွင် ခွင့်ပြုပေးရန် တောင်သူများက
လိုလားလျက်ရှိသည်။
.
No comments:
Post a Comment