ရှမ်းတောင် အပါအဝင် တိုင်းနှင့် ပြည်နယ် ၁၁ ခုတွင် ပုံမှန်ထက် အနည်းငယ်ပိုမို ပူပြင်းနိုင်

.

၂၀၂၆ ခုနှစ်၊ ဧပြီလ ၂၂ ရက်

.

ရှမ်းပြည်နယ်တောင်ပိုင်းဒေသ အပါအဝင် တိုင်းဒေသကြီးနှင့် ပြည်နယ် ၁၁ ခုတွင် ဧပြီလ၏ ပုံမှန်အပူချိန် အနည်းငယ်တိုးလာနိုင်ကြောင်း မိုးလေဝသနှင့် ဇလဗေဒဦးစီးဌာနက ယမန်နေ့ ဧပြီလ ၂၁ ရက်တွင် ထုတ်ပြန်ကြေညာထားသည်။

.

.

အဆိုပါဒေသများမှာ နေပြည်တော်၊ ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်း (အရှေ့ပိုင်း)၊ စစ်ကိုင်းတိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကရင်ပြည်နယ်၊ ချင်းပြည်နယ်၊ မွန်ပြည်နယ်နှင့် ရှမ်းပြည်နယ် (တောင်ပိုင်း)တို့ဖြစ်ကာ ဧပြီလ၏ ပုံမှန်အပူချိန်ထက် ၁ ဒသမ ၅ ဒီဂရီ ဆဲလ်စီးယပ် ပိုမိုနိုင်ကြောင်း မိုးဇလ၏ ဧပြီလ တတိယ ၁၀ ရက်ပတ်အတွက် ခန့်မှန်းချက်တွင် ဖော်ပြ ထားသည်။

.

‎မကွေးတိုင်းဒေသကြီး၊ ပဲခူးတိုင်း (အနောက်ပိုင်း)၊ ကချင်ပြည်နယ်၊ ကယားပြည်နယ်၊ ရခိုင်ပြည်နယ်နှင့် ရှမ်းပြည်နယ် (မြောက်ပိုင်းနှင့် အရှေ့ပိုင်း) တို့တွင်မူ ဧပြီလ၏ ပျမ်းမျှအပူချိန်ခန့်သာ ရှိနိုင်ကြောင်း သိရသည်။

.

ထို့ပြင် ဧပြီ ၂၂ ရက်မှ ၂၇ ရက်အတွင်း စစ်ကိုင်းတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ နေပြည်တော်၊ ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီး၊ ဧရာဝတီတိုင်းဒေသကြီး၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင် နေရာကွက်ကျား မိုးထစ်ချုန်းရွာနိုင်ကြောင်း မိုးဇလ၏ ထုတ်ပြန်ချက်အရ သိရသည်။

.

အလားတူ ယနေ့ ဧပြီလ ၂၂ ရက်၊ ညနေပိုင်းအထိ ခန့်မှန်းချက်တွင် ကချင်ပြည်နယ်တွင် နေရာကျဲကျဲနှင့် မန္တလေးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး၊ တနင်္သာရီတိုင်းဒေသကြီး၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်နှင့် ရှမ်းပြည်နယ်တို့တွင် နေရာကွက်ကျား မိုးထစ်ချုန်းရွာနိုင်ပြီး ရွာရန်ရာနှုန်း ၈၀ ဖြစ်ကြောင်း ဖော်ပြထားသည်။

.