တောင်ကြီးမြို့၊ အရှေ့ဘက်တောင်တန်းတွင် သစ်ပင်ချစ်သူများအဖွဲ့က Seed Ball များ ကြဲဖြန့်သွားမည်

.

၂၀၂၆ ခုနှစ်၊ ဧပြီလ ၂၂ ရက်

.

တောင်ကြီးမြို့၊ အရှေ့ဘက်တောင်တန်းပေါ်တွင် သစ်ပင်ချစ်သူများအဖွဲ့-တောင်ကြီးက သစ်ပင်မျိုးစေ့ (Seed Ball) များကို ကြဲဖြန့်သွားရန် စီစဉ်ဆောင်ရွက်လျက်ရှိကြောင်း သိရသည်။

.

.

အဆိုပါ မျိုးစေ့ ကြဲဖြန့်မည့် အစီအစဉ်ကို မေလကုန် မိုးစတင်ရွာသွန်းပြီးချိန်တွင် စတင်လုပ်ဆောင်သွားရန် ရည်ရွယ်ထားပြီး မြို့ခံများ၏ စုပေါင်းအားဖြင့် ဆောင်ရွက်သွားမည်ဖြစ်ကြောင်း သိရသည်။

.

ယင်းအစီအစဉ်တွင် ဒေသခံများအားလုံး ပါဝင်နိုင်ရန်အတွက် နှင်းသီး၊ စိန်ပန်းနီ၊ စိန်ပန်းပြာ၊ ချယ်ရီ၊ ငုဝါ၊ ငုဆက်၊ ပင်စိမ်း၊ ရေသင်းဝင် အပါအဝင် အခြားသစ်ပင်မျိုးစေ့များကို စုဆောင်းထားရန် သစ်ပင်ချစ်သူများ အဖွဲ့က တိုက်တွန်းထားပြီး မေလ မကုန်မီ လာရောက်ယူဆောင်ပေးမည်ဖြစ်ကြောင်း သိရသည်။

.

“ဖြစ်နိုင်မယ်ဆိုရင်တော့ တွင်းတူးပြီးစိုက်တာကတော့ အပင်ကို ရှင်နိုင်ခြေ ပိုများတာပေါ့။ ဒါပေမဲ့ ဒီနေရာက တောင်စောင်းလည်း ဖြစ်နေတော့ တူးဖို့ရာ အဆင်မပြေဘူး။ ဒါကြောင့် မျိုးစေ့ကြဲဖို့ပဲ လုပ်လိုက်တာပါ။ အရင်တုန်းက ရွှေမုဋ္ဌော အောက်ဘက်မှာ ကြဲခဲ့တုန်းကလည်း တော်တော်လေး အပင်ပေါက်ခဲ့ပါတယ်။ ၆၀ ရာခိုင်နှုန်းလောက်အထိ အပင်ပေါက်တာ တွေ့ရပါတယ်” ဟု သစ်ပင်ချစ်သူများအဖွဲ့-တောင်ကြီးမှ တာဝန်ရှိသူ တစ်ဦးက ကမ္ဘောဇတိုင်းသို့ ပြောသည်။

.

တောင်ကြီးမြို့၊ အရှေ့ဘက်တောင်တန်း၏ မြောက်ဘက်ခြမ်း နေရာသည် ပြီးခဲ့သည့် ၂၀၂၄ ခုနှစ်က ၂ ရက် ဆက်တိုက် တောမီးလောင်ကျွမ်းခဲ့မှုကြောင့် အပင်ရှင်သန်မှု ၂၀ ရာခိုင်နှုန်းခန့်သာ ကျန်ရှိတော့သည့်အတွက် ယင်းနေရာကို ရွေးချယ်ကာ Seed Ball များ ကြဲချရန် စီစဉ်ခြင်းဖြစ်ကြောင်း သိရသည်။

.

“တောကိုလည်း ထိန်းနိုင်မယ်၊ မီးလည်း မလောင်ဘူးဆိုရင်တော့ ၃ နှစ်အတွင်းမှာ တောတစ်ခုက ပြန်ဖြစ်ပါတယ်” ဟု ၎င်းက ဆက်လက်ပြောဆိုခဲ့သည်။

.

သစ်ပင်ချစ်သူများအဖွဲ့-တောင်ကြီးအနေဖြင့် ၂၀၁၅ ခုနှစ်ကတည်းက သစ်ပင်စိုက်ပျိုးရေး၊ မြေအောက်ရေ ရရှိရေး၊ သဘာဝ ပတ်ဝန်းကျင်ဆိုင်ရာ လှုပ်ရှားမှုများတွင် အခြားသော အသင်းအဖွဲ့များ၊ ဌာနဆိုင်ရာများနှင့် လက်တွဲ ပူးပေါင်းဆောင်ရွက်နေခြင်းဖြစ်ပြီး တောင်ကြီးမြို့ပေါ် အပြင် အနီးပတ်ဝန်းကျင်ရှိ မြို့ရွာများတွင် လည်း သဘာဝပတ်ဝန်းကျင်ထိန်းသိမ်းရေးဆိုင်ရာ လုပ်ငန်းများကို ဆောင်ရွက်လျက်ရှိကြောင်း သိရသည်။

.