ရွေ့ပြောင်းရမည့် ညဈေးတန်းနေရာသည် ဈေးသည်များအတွက် အဆင်မပြေနိုင် ဟုဆို

.

၂၀၂၆ ခုနှစ်၊ ဧပြီလ ၂၂ ရက်

.

တောင်ကြီးမြို့၊ တပင်ရွှေထီးလမ်းပေါ်ရှိ နာရီစင်ညဈေးတန်းကို မြို့မဈေးကြီးမြောက်ဘက်၊ ကုန်သည်လမ်း ပေါ်သို့ ပြောင်းရွှေ့နေရာချထားရန် စီစဉ်နေသော်လည်း အဆိုပါ နေရာသည် ဈေးသည်များအတွက် အဆင်မပြေဖြစ်ပေါ်နိုင်ကြောင်း ၎င်းတို့က ပြောဆိုကြသည်။

.

.

မြို့မဈေးကြီးမြောက်ဘက်ရှိ ကုန်သည်လမ်းတွင် ယခင်ရှိနှင့်ပြီး ဈေးသည်များနှင့် အိမ်ခန်း၊ ဆိုင်ခန်း ပိုင်ရှင်များ ရှိနေသည့်အတွက် နာရီစင်ညဈေးဘက်မှ ရွေ့ပြောင်းရမည့် ဈေးသည်များအနေဖြင့် ပုံမှန် အနေအထားဖြင့် ဈေးရောင်းချရန် မလွယ်ကူနိုင်သေးကြောင်း ပြောဆိုကြသည်။

.

“ဈေးမြောက်ဘက်မှာက အရင်ဈေးသည်တွေ၊ ရှုမဝ ဘက်အခြမ်းမှာဆိုရင် အိမ်ပိုင်ရှင်တွေရှိတယ်။  ကျွန်တော်တို့ နာရီစင်ဘက်က ပြောင်းရမယ့် ဈေးသည်တွေအတွက်က အထိုင်ကျဖို့မလွယ်ဘူး” ဟု နာရီစင်ညဈေးမှ ဈေးသည်တစ်ဦးက ကမ္ဘောဇတိုင်းသို့ ပြောသည်။

.

ဧပြီလလဆန်းပိုင်းခန့်ကစ တင်၍ ကုန်သည်လမ်းပေါ်တွင် ညဈေးတန်းရောင်းချမည့် ဈေးသည်များ အတွက် ဆိုင်ခန်းနေရာများ စတင်ဆောက်လုပ်နေပြီး နာရီစင်ညဈေးမှ ရွေ့ပြောင်းရမည့် ဈေးသည်အားလုံး အတွက်လည်း ဆိုင်ခန်းနေရာ အစားထိုး ပြန်လည်ရရှိရန် မသေချာကြောင်း ဈေးသည်များက ပြောဆိုကြသည်။

.

“ပြောင်းဖို့ လက်မှတ်ထိုးရမယ်ဆိုလို့ ထိုးရတဲ့သဘောပါပဲ။ နာရီစင်ညဈေးတန်းက ဈေးသည် အားလုံး နေရာအစားပြန်ရဖို့ ဘာအာမခံချက်မှ မရှိပါဘူး။ ပိုင်ရာဆိုင်ရာတွေ အတွက်လောက်ပဲ ရမယ့်သဘောပေါ့” ဟု အခြားဈေးသည်တစ်ဦးကလည်း ပြောသည်။

.

အဆိုပါ ကုန်သည်လမ်းသည် မြို့မဈေးဝင်ပေါက် အဓိကလမ်းဖြစ်ပြီး ကုန်တင်ကုန်ချ ကားများ၊ ဈေးသည်၊ ဈေးဝယ်များ၏ ကားများဖြင့် အမြဲပြည့်ကြပ်နေတတ်သည့်အတွက် ယခုကဲ့သို့ ညဈေးတန်းဆိုင်ခန်း ထပ်မံ ဆောက်လုပ်ခြင်းကြောင့် လမ်းပိတ်ဆို့မှုကို ပိုမိုဖြစ်ပေါ်စေမည်ဟု ဒေသခံများက သုံးသပ်ပြောဆိုကြသည်။

.

ယခင် ‌တောင်ကြီးမြို့မဈေးအရှေ့ရှိ City Square အဆောက်အအုံ ဆောက်လုပ်စဉ်ကလည်း ယင်းနေရာတွင် ဈေးသည်များအား ယာယီဈေးပြုလုပ်ပေးခဲ့ဖူးပြီး လမ်းပိတ်ဆို့မှု အမြဲဖြစ်ပေါ်ခဲ့ဖူးသည်။

.

ထို့အပြင် ယင်းနေရာတွင် ညဈေးတန်း ဆောက်လုပ်လိုက်ခြင်းကြောင့် မြို့မဈေးအတွင်း မီးရေးထင်းရေး အပါအဝင် အရေးပေါ်အခြေအနေ တစ်ခုခု ပေါ်ပေါက်လာပါက အဝင်အထွက်လမ်း ပိတ်ဆို့ပြီး အန္တရာယ်ကို ဖိတ်ခေါ်သလို ဖြစ်နေကြောင်း သုံးသပ်မှုများလည်း ရှိနေသည်။

.