ရှမ်းတောင်ဒေသထွက် ဂေါ်ဖီထုပ် ဈေးကွက် မရှိသဖြင့် တောင်သူများ အရှုံးပေါ်

ရှမ်းပြည်နယ်တောင်ပိုင်း ဒေသထွက် ဂေါ်ဖီထုပ်များ ဈေးကွက် မရရှိသဖြင့် တောင်သူများ အရှုံးပေါ်နေပြီး ရောင်း မရသည့် ဂေါ်ဖီထုပ်များကို အပုပ် ခံထားနေရသည်ဟု သိရသည်။

.
“ဒီနှစ်က တော်တော်ကို ဆိုးရွားသွားတာပါ။ ပွဲစားလည်း အဆင်မပြေဘူး။ ခြံသမားလည်း အဆင်မပြေဘူး။ ဝယ်လက်တွေက မရှိတော့ မကုန်မခန်းနိုင် ဖြစ်ပြီးတော့ စုပုံထားရတာပေါ့။ မရောင်းရတဲ့ဟာ ခြံထဲတင်ပဲ အပုပ် ကျသွားခဲ့တာပေါ့။ အရင်းက (တစ်ဧက ပျဉ်းမျှ) သိန်း ၃၀//၄၀ လောက် ကုန်တယ်။ ပြန်ရောင်းရင် တစ်ထုပ်မှ ၃၀၀/၄၀၀ ဆိုတော့ ဘယ်လိုမှ အဆင်မပြေဘူး။ မြေဩဇာတစ်အိတ်ကို ၂ သိန်းကျော် ရှိတယ်” ဟု ဂေါ်ဖီထုပ်စိုက် တောင်သူ တစ်ဦးက ပြောသည်။
.

ယခင်နှစ်များက ဂေါ်ဖီထုပ် တစ်ထုပ်လျှင် ၁၀၀၀ ကျပ်မှ ၁၅၀၀ ကျပ်အထိ ဈေး ရရှိခဲ့ပြီး ယခုနှစ်တွင် စိုက်ပျိုးစရိတ် မြင့်တက်လာသည့်အပြင် ပြန်လည်ရောင်းချရာတွင် ဈေး မရသည့်အတွက် တောင်သူများ အဆင်မပြေ ဖြစ်ပေါ်နေရကြောင်း သိရသည်။
.
“ဂေါ်ဖီထုပ်က ဈေး လုံးဝ မရှိဘူး။ ခုတ်လာရင်လည်း ကားခနဲ့ မကိုက်ဘူး။ ကားခ တစ်စီးလျှင် ၃ သိန်းမှ ၃ သိန်းခွဲအထိ ပေးရတယ်။ (ဂေါ်ဖီထုပ်သယ်) ထမ်းခက တစ်ထုပ်ကို ၁၀၀ ရှိတယ်။ ရောင်းတော့ တစ်ထုပ်ကို ၂၀၀/၃၀၀ ဆိုတော့ ဘာမှ လုပ်လို့ မရတော့ဘူး” ဟု အခြား တောင်သူတစ်ဦးကလည်း ပြောဆိုခဲ့သည်။
.
အောင်ပန်းမြို့ရှိ ကုန်စည်ဒိုင်များတွင် ဂေါ်ဖီထုပ် စိုက်ပျိုးသူ တောင်သူများကို ဝယ်လက်နှင့် တိုက်ရိုက် ချိတ်ဆက် ရောင်းချပေးလျက်ရှိရာ ဂေါ်ဖီထုပ် တစ်ထုပ်လျှင် ကျပ် ၃၀၀ မှ ၄၀၀ ကျပ်အထိသာ ဈေး ရရှိပြီး အများဆုံး ၅၀၀ ကျပ်သာ ရရှိကြောင်း သိရသည်။
.
ရှမ်းတောင်ဒေသမှ စိုက်ပျိုးထွက်ရှိသည့် ဂေါ်ဖီထုပ်များကို ရန်ကုန်၊ မန္တလေး အပါအဝင် မြန်မာနိုင်ငံ တစ်ဝှန်း လုံးသို့ ပို့ဆောင်ပေးနေခြင်း ဖြစ်ပြီး ယခုနှစ်တွင် ဈေးကွက် မရရှိသည့်အတွက် ယခင်က ကားတစ်စီးစာ ဂေါ်ဖီထုပ် ဝယ်ယူသူများသည် ယခုနှစ်တွင် အထုပ်ရေ ၁၀၀/၂၀၀ ခန့်သာ ဝယ်ယူနိုင်ကြတော့သည်ဟု သိရသည်။
.
ဂေါ်ဖီထုပ်များမှ ဈေး မရသည့်အပြင် စက်သုံးဆီဈေး မြင့်တက်မှုကြောင့် သယ်ယူ ပို့ဆောင်ခ ကြီးမြင့်နေပြီး တွက်ချေ မကိုက်သဖြင့် တောင်သူများ သာမက ကုန်သည်ပွဲစားများပါ အရှုံးပေါ်နေရသည်ဟု သိရသည်။
.
#KBZTai #Shan #AungBan #Agirculture
.