ကမ္ဘာ့ဖလားပြိုင်ပွဲရဲ့ အသက်အကြီးဆုံး ကွင်းလယ်၊ တိုက်စစ် ကစားသမားအဖြစ် ရော်နယ်ဒို စံချိန်တင်

.

၂၀၂၆ ခုနှစ်၊ ဇွန်လ ၁၈ ရက်

.

မနေ့ညက ကစားခဲ့တဲ့ ကွန်ဂိုနဲ့ ပွဲစဉ်မှာ ရော်နယ်ဒိုတစ်ယောက် ခြေစွမ်းမပြနိုင်ခဲ့ပေမဲ့လည်း ကမ္ဘာ့ဖလားနဲ့ ပတ်သက်တဲ့ စံချိန်မှတ်တမ်းတစ်ခုကိုတော့ ရရှိသွားခဲ့ပါတယ်။

.

.

အသက် ၄၁ နှစ်နဲ့ ၁၃၂ ရက်ရှိပြီဖြစ်တဲ့ ရော်နယ်ဒိုက ပေါ်တူဂီရဲ့ ကမ္ဘာ့ဖလားအဖွင့်ပွဲမှာ ပါဝင်ကစားခဲ့ပြီးတဲ့ နောက် သမိုင်းတစ်လျှောက် ပွဲထွက်လူစာရင်းမှာ ပါဝင်ခဲ့တဲ့ အသက်အကြီးဆုံး ကွင်းလယ်၊ တိုက်စစ် ကစားသမား အဖြစ် စံချိန်တင်နိုင်ခဲ့တာပါ။

.

ရော်နယ်ဒိုက ကနေဒါကွင်းလယ်လူဖြစ်တဲ့ ဟတ်ချင်ဆန်ရဲ့ အသက်အကြီးဆုံးစံချိန်ကို ဖြတ်ကျော်နိုင်ခဲ့တာ ဖြစ်ပြီး ဟတ်ချင်ဆန်က ၂၀၂၂ ကမ္ဘာ့ဖလားမှာ ပွဲထွက်ကစားခဲ့တဲ့ အသက်အကြီးဆုံး ကွင်းလယ်လူဖြစ်ခဲ့ပြီး အဲဒီတုန်းက ဟတ်ချင်ဆန်ရဲ့ အသက်က ၃၉ နှစ်နဲ့ ၂၉၂ ရက် ရှိခဲ့တာပါ။

.

အသက် ၄၁ နှစ်အရွယ်ရှိပြီဖြစ်တဲ့ ရော်နယ်ဒိုအတွက်တော့ ဒီကမ္ဘာ့ဖလားကသူ့ရဲ့ ၆ ကြိမ်မြောက် ကမ္ဘာ့ဖလားဖြစ်ပြီး အဲဒီအောင်မြင်မှုကို ဂုဏ်ပြုတဲ့ အထူးအမှတ်တံဆိပ်ကိုလည်း သူ့ရဲ့ဂျာစီမှာ တပ်ဆင်ခွင့် ရခဲ့တာပါ။

.

ရော်နယ်ဒိုအတွက်တော့ ကွန်ဂိုနဲ့ပွဲဟာ နိုင်ငံအသင်းအတွက် ၂၂၉ ပွဲမြောက် ပါဝင်ကစားခြင်းဖြစ်ခဲ့ပြီး လက်ရှိအချိန်အထိ နိုင်ငံတကာသွင်းဂိုး ၁၄၃ ဂိုးရှိထားကာ ယူရို ၂၀၁၆ ချန်ပီယံဆုကို ရရှိထားနိုင်ခဲ့သူလည်း ဖြစ်ပါတယ်။

.

ကမ္ဘာ့ဖလား သမိုင်းတစ်လျှောက်မှာတော့ ရော်နယ်ဒိုထက် အသက်ကြီးတဲ့ ကစားသမား ၃ ဦး ပါဝင် ကစားခဲ့ဖူးတာပါ။

.

ပထမဆုံးကတော့ အီဂျစ်ဂိုးသမား အယ်လ်ဟာဒရီ ဖြစ်ပြီး ၂၀၁၈ ကမ္ဘာ့ဖလားမှာ အသက် ၄၅ နှစ်၊ ၁၆၁ ရက်နဲ့ အသက်အကြီးဆုံးစံချိန် တင်ထားတာပါ။

.

ဒုတိယကတော့ ကိုလံဘီယာဂိုးသမား မွန်ဒရက်ဂွန်ဖြစ်ပြီး ၂၀၁၄ ကမ္ဘာ့ဖလားမှာ အသက် ၄၃ နှစ် ၃ ရက် အရွယ်နဲ့ အရန်ခုံကနေ ဝင်ကစားခဲ့တာဖြစ်ပါတယ်။

.

တတိယနေရာမှာတော့ ကင်မရွန်းကွင်းလယ်လူ ရော်ဂျာမီလာ ရှိနေပြီး သူက ၁၉၉၄ ကမ္ဘာ့ဖလားမှာ အသက် ၄၂ နှစ်၊ ၃၉ ရက် အရွယ်နဲ့ ဝင်ရောက်ကစားခဲ့တာပါ။ သူက ရော်နယ်ဒိုထက် အသက်ကြီးတဲ့ ကွင်းလယ်လူ ဖြစ်ခဲ့ပေမဲ့လည်း အရန်ခုံကနေ ဝင်ရောက်ကစားခဲ့ရတာဖြစ်တာကြောင့် အသက်အကြီးဆုံး ပွဲထွက် ကစားသမားအဖြစ် မှတ်တမ်းဝင်နိုင်ခြင်းမရှိခဲ့တာပဲ ဖြစ်ပါတယ်။

.

Source – TheSun

.