.
၂၀၂၆ ခုနှစ်၊ ဇွန်လ ၁၇ ရက်
.
ထိုင်းနိုင်ငံ၊ ကာလာဆင်ခရိုင် အစိုးရရုံးမှာ
ဒီနေ့မနက်ပိုင်းက သေနတ်ပစ်ခတ်မှုဖြစ်ပွားခဲ့ပြီး ဗိုလ်မှူးကြီး တစ်ယောက်
သေဆုံးသွားခဲ့ရပါတယ်။
.
ဒီအဖြစ်အပျက်က ရာထူးပြောင်းရွှေ့အမိန့်ကြောင့်
ဖြစ်ခဲ့ပြီး နယ်မြေအပြောင်းခံရတဲ့ စစ်ဗိုလ်က ခရိုင် စစ်မှုထမ်း ရွေးချယ်ရေးဌာန
အကြီးအကဲဖြစ်တဲ့ ဗိုလ်မှူးကြီးကို သေနတ်နဲ့ပစ်ခဲ့တာပါ။
.
ဒီပစ်ခတ်မှုက ကာလာဆင် ရုံးအဆောက်အအုံရဲ့ စတုတ္ထထပ်မှာ
ဖြစ်ပွားခဲ့တာဖြစ်ပြီး သေနတ်သံတွေကြောင့် အစိုးရဝန်ထမ်းတွေနဲ့ ရုံးကို
ရောက်ရှိလာသူတွေ အထိတ်တလန့်ဖြစ်ခဲ့ရတာပါ။
.
အာဏာပိုင်တွေရဲ့ ပြောပြချက်အရတော့ ပစ်ခတ်သူကို
အခင်းဖြစ်တဲ့နေရာမှာပဲ ဖမ်းဆီးနိုင်ခဲ့ပြီး ပစ်ခတ် ရာမှာ အသုံးပြုခဲ့တဲ့
သေနတ်ကိုလည်း သိမ်းဆည်းရမိခဲ့တာပါ။
.
ဇွန်လ ၁၇ ရက်၊ မနက် ၉ နာရီခွဲအချိန်လောက်မှာ
ကာလာဆင်ခရိုင်ရုံး စတုတ္ထထပ်ကနေ သေနတ်ပစ်သံ အများအပြား ကြားခဲ့ရတာကြောင့်
ခရိုင်ရဲတပ်ဖွဲ့က အမြန်လာရောက်ခဲ့ကြတာပါ။ ရဲတွေရောက်လာချိန် မှာတော့
စစ်မှုထမ်းရွေးချယ်ရေးဌာနရဲ့ အကြီးအကဲဖြစ်တဲ့ အသက် ၅၉ နှစ်အရွယ် ဗိုလ်မှူးကြီး
ကွန်ဝီကာနွန် ကို ရုံးခန်းထဲမှာ သေနတ်ဒဏ်ရာတွေနဲ့ သေဆုံးနေတာကို
တွေ့ခဲ့ရတာပဲဖြစ်ပါတယ်။
.
ပစ်ခတ်ခဲ့တဲ့သူက ကာလာဆင်ခရိုင် စစ်မှူထမ်းရွေးချယ်ရေးရုံးမှာ
တာဝန်ထမ်းဆောင်နေတဲ့ ဒုဗိုလ် ချင်နာကွန် ဖြစ်ပြီး အခင်းဖြစ်တဲ့နေရာမှာပဲ
ရဲတပ်ဖွဲ့ဆီ အဖမ်းခံခဲ့တာပါ။
.
ကနဦးစစ်ဆေးမှုတွေအရတော့ ချင်နာကွန်က
ကာမာနာဆိုင်ခရိုင်ရုံးကို ပြောင်းခိုင်းတဲ့ သူ့ရဲ့အမိန့်စာအပေါ်
မကျေနပ်ခဲ့တာကြောင့် အထက်အရာရှိဆီ သွားရောက်ဆွေးနွေးရာကနေ
အငြင်းပွားခဲ့ပြီးတဲ့နောက် သေနတ် ထုတ်ပစ်ခဲ့တာလို့ သိရတာပါ။
.
ရဲတပ်ဖွဲ့ကတော့ ပစ်ခတ်မှုရဲ့အကြောင်းရင်းမှန်ကို
ဆက်လက် စစ်ဆေးနေကြောင်းနဲ့ ရာဇဝတ်မှုဆိုင်ရာ စွဲချက်တွေနဲ့ အရေးယူသွားမှာ ဖြစ်တဲ့အကြောင်း
ကြေညာထားပါတယ်။
.
ထိုင်းနိုင်ငံမှာတော့ အထက်အရာရှိကို
သေနတ်နဲ့ပစ်တယ်ဆိုတာ ရှားပါးတဲ့ဖြစ်စဉ်ဖြစ်ပြီး ၂၀၂၀ ခုနှစ်မှာ ဂျကရာပတ် ဆိုတဲ့
တပ်ကြပ်ကြီးတစ်ယောက်က အိမ်ရာအကျိုးအမြတ်ကိစ္စ အငြင်းပွားမှုကနေ သူ့ရဲ့ အထက်အရာရှိကို
သေနတ်နဲ့ပစ်ခဲ့တာက နောက်ဆုံးပါ။
.
အဲဒီတုန်းကတော့ တပ်ကြပ်ကြီးက သေနတ်ကို
ကိုင်ဆောင်ပြီး ဆက်လက်ပစ်ခတ်မှုတွေ လုပ်ခဲ့တာကြောင့် လူ ၂၉ ဦး သေဆုံးခဲ့ရပြီး
ထိုင်းနိုင်ငံတွင်းမှာ တော်တော်လေး နာမည်ကြီးသွားခဲ့ရဖူးတာပါ။
.
Source – Bangkok Post
.
No comments:
Post a Comment