အီရန်အပေါ် အပြင်းထန်ဆုံး ပိတ်ဆို့အရေးယူမှာ ဖြစ်လို့ တရုတ်အနေနဲ့ ပူးပေါင်းရန် ဘက်ဆင့် တိုက်တွန်း

အမေရိကန်အနေနဲ့ အီရန်အပေါ် သမိုင်းတစ်လျှောက် အပြင်းထန်ဆုံး ပိတ်ဆို့ အရေးယူမှုတွေ ချမှတ် သွားတော့မှာ ဖြစ်လို့ အီရန်နဲ့ စီးပွားရေး ဆက်ဆံမှုတွေ ရှိနေတဲ့ တရုတ်နိုင်ငံအနေနဲ့ အမေရိကန်နဲ့ ပူးပေါင်း ဆောင်ရွက်ဖို့ အမေရိကန်ဘဏ္ဍာရေးဝန်ကြီး စကော့ ဘက်ဆင့်က ကြာသပတေးနေ့မှာ တိုက်တွန်းလိုက်ပါတယ်။

.

ဒါပေမဲ့ တရုတ်ဘက်ကတော့ ပိတ်ဆို့ အရေးယူတာနဲ့ ဖိအားပေးတာတွေဟာ ပြဿနာကို ဖြေရှင်းနိုင်မယ့် နည်းလမ်း မဟုတ်ဘူးလို့ တုံ့ပြန်ထားပါတယ်။

.

ဘက်ဆင့်က အီရန်အပေါ် ချမှတ်မယ့် ပိတ်ဆို့ အရေးယူမှုတွေနဲ့ ပတ်သက်ပြီး အသေးစိတ်အချက် အလက်တွေကို လာမယ့် တနင်္လာနေ့ သတင်းစာရှင်းလင်းပွဲမှာ ပြောကြားသွားမယ် လို့လည်း ဆိုပါတယ်။

.

ဘက်ဆင့်က CNBC နဲ့ အင်တာဗျူးမှာ “ဒါက တစ်ချက်ပြီး တစ်ချက် ဆက်တိုက် ဖိအားပေးတဲ့ နည်းလမ်း ဖြစ်ပြီး အီရန်အပေါ် ပိတ်ဆို့ တားဆီးမှု ရှိနေသလို သမိုင်းတစ်လျှောက် အပြင်းထန်ဆုံး ပိတ်ဆို့ အရေးယူမှုတွေလည်း ချမှတ်သွားမှာပါ” လို့ ပြောပါတယ်။

.

အဲဒီလို စီးပွားရေးအရ အပြင်းအထန် ဖိအားပေးတာဟာ အီရန်မှာ ထိရောက်မှုရှိလာပြီး အီရန်အစိုး ရအဖွဲ့ကို ပြိုလဲသွားအောင် လုပ်ဆောင်နိုင်မယ် လို့လည်း ဘက်ဆင့်က ပြောကြားခဲ့ပါတယ်။

.

အမေရိကန်သမ္မတ ဒေါ်နယ်ထရမ့်က ဗုဒ္ဓဟူးနေ့မှာ အီရန်ကို ဘယ်လိုပုံစံနဲ့မဆို အကူအညီပေးပြီး အသက်ဆက်နိုင်အောင် လုပ်ပေးတဲ့ ဘယ်နိုင်ငံမဆို စီးပွားရေးအရ အကျိုးဆက်တွေ ခံရနိုင်တယ် လို့ သတိပေးထားပါတယ်။ အမေရိကန်က အစ္စရေးနဲ့အတူ အီရန်ကို စစ်ပွဲစတင်ခဲ့တာ ခြောက်လနီးပါး ရှိလာပြီဖြစ်ပြီး အခုတော့ စစ်ပွဲကို အဆုံးသတ်နိုင်ဖို့ ကြိုးပမ်းနေပါတယ်။

.

ဘက်ဆင့်ရဲ့ ပြောကြားချက်နဲ့ ပတ်သက်ပြီး ဝါရှင်တန်မြို့ရှိ တရုတ်သံရုံး ပြောရေးဆိုခွင့်ရှိသူကတော့ “အီရန်နဲ့ ပတ်သက်တဲ့ ကိစ္စမှာ ပိတ်ဆို့အရေးယူမှုတွေနဲ့ ဖိအားပေးတာတွေဟာ ပြဿနာကို ဖြေရှင်းနိုင်မှာ မဟုတ်ပါဘူး။ သက်ဆိုင်ရာနိုင်ငံတွေအနေနဲ့ တာဝန်ရှိရှိ ဆောင်ရွက်ပြီး နိုင်ငံရေးနဲ့ သံတမန်ရေးနည်းလမ်းတွေကနေတစ်ဆင့် ပြဿနာကို ဖြေရှင်းဖို့ တရုတ်နိုင်ငံက တိုက်တွန်းပါတယ်” လို့ တုံ့ပြန်ထားပါတယ်။

.

၂၀၂၅ ခုနှစ် အချက်အလက်တွေအရ တရုတ်နိုင်ငံဟာ အီရန်က တင်ပို့တဲ့ ရေနံပမာဏရဲ့ ၈၀ ရာခိုင်နှုန်းကျော်ကို ဝယ်ယူနေတဲ့ နိုင်ငံ ဖြစ်ပါတယ်။

.

ဒါကြောင့် အမေရိကန်အနေနဲ့ အီရန်အပေါ် စီးပွားရေးဖိအားတွေ ထပ်မံတိုးမြှင့်ပြီး တရုတ်နိုင်ငံနဲ့ပါ စီးပွားရေးအရ ထိပ်တိုက်တွေ့လာမယ်ဆိုရင် အမေရိကန်အတွက် အန္တရာယ်ရှိလာနိုင်ပါတယ်။ အထူးသဖြင့် အမေရိကန်က အရေးကြီးတဲ့ ရှားပါးသတ္တုတွေ အပါအဝင် ကုန်ပစ္စည်းအများအပြားကို တရုတ်နိုင်ငံကနေ တင်သွင်းနေရတာကြောင့် တရုတ်ဘက်ကလည်း လက်တုံ့ပြန်လာနိုင်ပါတယ်။

.

အီရန်နိုင်ငံဟာ ၁၉၇၉ ခုနှစ် အစ္စလာမ္မစ်တော်လှန်ရေး ဖြစ်ပွားခဲ့ချိန်ကတည်းက စီးပွားရေးအရ ပြင်းထန်တဲ့ ပိတ်ဆို့အရေးယူမှုတွေကို နှစ်ပေါင်း ၅၀ နီးပါး ခံလာခဲ့ရပါတယ်။ အီရန်နိုင်ငံခြားရေးဝန်ကြီး အဘတ်စ် အာရာချီကတော့ ထရမ့်ရဲ့ ပြောဆိုချက်ဟာ အမေရိကန် ဘဏ္ဍာရေးပြဿနာတွေကို အာရုံ လွှဲဖို့ ကြိုးစားတာလို့ ဝေဖန်ပါတယ်။ အမေရိကန်မှာ အစိုးရကြွေးမြီ စံချိန်တင်မြင့်တက်နေပြီး အတိုးနှုန်းတွေလည်း မြင့်တက်နေတယ်လို့ သူက ပြောပါတယ်။

.

တရုတ်နိုင်ငံက အီရန်နဲ့ စီးပွားရေးဆက်ဆံမှုတွေ ဆက်လုပ်နေတဲ့အပေါ် အမေရိကန်က တရုတ်နိုင်ငံ ကိုပါ ပစ်မှတ်ထားပြီး ပိတ်ဆို့အရေးယူနိုင်မလားလို့ မေးမြန်းရာမှာတော့ ဘက်ဆင့်က “တချို့ကိစ္စ တွေကို လူသိရှင်ကြားမဟုတ်ဘဲ သီးသန့်ဆွေးနွေးတာက ပိုကောင်းပါတယ်” လို့ ပြန်လည် ဖြေကြားခဲ့ပါတယ်။

.

Ref – Reuters