ဟဲဟိုးရှိ ဦးလွင်မိုး၏ လီလီပန်းခြံနှင့် သီးနှံစိုက်ပျိုး​ရေး လုပ်ငန်းများ ရပ်နား

ရှမ်းပြည်နယ်တောင်ပိုင်း၊ ကလောမြို့နယ်၊ ဟဲဟိုးမြို့ရှိ နိုင်ငံကျော် သရုပ်ဆောင်ဖြစ်သူ ဦးလွင်မိုး၏ လီလီပန်းခြံနှင့် သီးနှံစိုက်ပျိုး​ရေး လုပ်ငန်းများကို ရပ်နားလိုက်ပြီ ဖြစ်ကြောင်း သိရသည်။

.

“ ၈ နှစ်ကြာ စိုက်ပျိုး လုပ်ကိုင်ခဲ့တဲ့ ဟဲဟိုးမြို့က လီလီပန်းခြံ နဲ့ သီးနှံစိုက်ပျိုး​ရေးလုပ်ငန်း တခန်း ရပ်လိုက်ပါပြီ။” ဟု ဦးလွင်မိုးက ၎င်း၏ လူမှုကွန်ရက်တွင် ရေးသားခဲ့ခြင်း ဖြစ်သည်။

.

ပြီးခဲ့သည့်  ၂၀၂၀ ခုနှစ်၊ မတ်လမှ စတင်ခဲ့သည့် COVID-19 ကပ်ရောဂါ ကာလကြောင့် အထိနာခဲ့ရာမှ ယခုတိုင် နလံ ပြန် မထူနိုင်တော့သည့်အတွက် ၎င်း၏ စိုက်ပျိုးရေးလုပ်ငန်းကို ရပ်နားရန် ဆုံးဖြတ်လိုက်ခြင်း ဖြစ်ပြီး ကုန်ကြမ်း ဝယ်ယူမှု၊ စိုက်ပျိုးစားရိတ်၊ ဝန်ထမ်းစားရိတ် စသည်ဖြင့် ခက်ခဲမှုများ ဖြစ်ပေါ်ခဲ့သည်ဟုလည်း ဦးလွင်မိုးက ဆိုသည်။

.

လီလီပန်းဥများသည် အအေးခန်းအတွင်း အမြဲ ထားရပြီး လျှပ်စစ်မီး အခက်အခဲကြောင့် အဆင်မပြေ ဖြစ်ရသည့် အပြင် နိုင်ငံခြားငွေ သုံးစွဲမှု ကဏ္ဍမှာလည်း မြင့်မားနေခြင်းကြောင့် ဖြစ်သည်ဟုလည်း သိရသည်။

.

ရှမ်းပြည်နယ် တောင်ပိုင်းရှိ စိုက်ပျိုးရေးလုပ်ငန်း အများစုမှာ စိုက်ပျိုးစရိတ်၊ အလုပ်သမားစရိတ် ကြီးမြင့်မှုတို့ကြောင့် အရှုံးဖြင့် ရင်ဆိုင်နေကြရပြီး လုပ်ငန်းရပ်နားရသည်ထိ ဖြစ်ပေါ်နေကြရကြောင်း သိရသည်။

.