ဇွန်လ ၁၃ ရက်အတွက် ကမ္ဘာ့ဖလား ခန့်မှန်းချက်များ

.

၂၀၂၆ ခုနှစ်၊ ဇွန်လ ၁၃ ရက်

.

.

■ ဆွစ်ဇာလန်-ကာတာ (နံနက် ၁-၃၀)

.

ဒီအုပ်စု ပထမပွဲမှာ ကနေဒါနဲ့ ဘော့စနီးယား တို့ သရေကျသွားခဲ့တဲ့အတွက် နိုင်တဲ့အသင်းအတွက် တော်တော်လေး အားသာချက် ရှိသွားမယ့်ပွဲပါ။ ဆွစ်ဇာလန်က ဒီအုပ်စုထဲမှာ နောက်တစ်ဆင့်တက်ဖို့ ရေပန်း အစားဆုံးအသင်းအဖြစ်ရှိနေပြီး ကာတာ ကတော့ နာမည်ကျော်နည်းပြ လိုပီတီဂီရဲ့အသင်း ဖြစ်ပေမဲ့ ဒီအုပ်စုမှာတော့ အိမ်ဖြည့်အဆင့်လောက်ပဲ သတ်မှတ်ခံထားရတာပါ။

.

ဒါပေမဲ့ ရှာကွီရီ နားသွားတဲ့နောက် ဆွစ်ဇာလန်ရဲ့ ရလာဒ်တွေ ထိုးကျနေခဲ့လို့ ဒီပွဲအတွက် ကာတာ အသင်းမှာလည်း မျှော်လင့်ချက်တော့ ရှိနေပါသေးတယ်။

.

ကာတာ က ပြည်တွင်းအခြေစိုက်ကစားသမားတွေနဲ့ပဲ အသင်းကိုဖွဲ့စည်းထားတာဖြစ်ပြီး အဓိက ခံစစ်အတွဲ ဖြစ်တဲ့ ပက်ဒရိုနဲ့ ခူခီ အတွဲက နှစ်ယောက်ပေါင်း အသက် ၇၀ ရှိနေပါပြီ။ တိုက်စစ်က သွက်ပြီး ဂိုးသွင်းအား ရှိတယ်ဆိုပေမဲ့ အသက်ရနေပြီဖြစ်တဲ့ ခံစစ်ပိုင်းက ဆွစ်ဇာလန်ကို တားဆီးနိုင်ပါ့မလားဆိုတာ စောင့်ကြည့် ရမှာပါ။

.

ဆွစ်ဇာလန်ကတော့ တိုက်စစ်မှာ လိဒ်တိုက်စစ်မှူး အိုကာဖော၊ ရင်းနက်စ်ရဲ့ အမ်ဘိုလို တို့ကစားကြမှာ ဖြစ်ပြီး နော်တင်ဟမ်ဖောရက်စ် တိုက်စစ်ကစားသမား အန်ဒိုယီ ကိုလည်း ရွေးထားတာတွေ့ရပါတယ်။ ကွင်းလယ်မှာတော့ အာဆင်နယ် ကွင်းလယ်လူဟောင်း ဇာခါ က ဦးဆောင်လာမှာဖြစ်ပြီး ခံစစ်အတွက် တကယ်အားကိုးရတဲ့ ဖေဘီယန်ရှား၊ ဂိုးသမား ဆွန်မာ တို့ နားသွားကြပြီမို့ ခံစစ်ပိုင်းမှာ လူသစ်တွေကို တွေ့ရမှာပါ။

.

ဒီပွဲက ဆွစ်ဇာလန်ဖက်က တစ်ဖက်သတ်ဖိထားမယ့် ပွဲမျိုးဖြစ်ပြီး ကာတာက ခံစစ်နဲ့ပဲ ဆော့ရမှာဖြစ်လို့ သွင်းဂိုးတွေအများကြီး တွေ့ရဖို့တော့မရှိပါဘူး။ ဂိုးနည်းနည်းနဲ့ကပ်ပြီး ဆွစ်ဇာလန်နိုင်သွားမယ့်ပွဲမျိုးပါ။

.

■ ဘရာဇီး-မော်ရိုကို (နံနက် ၄-၃၀)

.

ဒီပွဲက ကမ္ဘာ့ဖလားအုပ်စုပွဲစဉ်တွေထဲက ပွဲကောင်းတစ်ပွဲပါ။ တောင်အမေရိကရဲ့အင်အားကြီးအသင်း ဘရာဇီးနဲ့ အာဖရိကထိပ်သီး မော်ရိုကိုတို့တွေ့ကြမှာဖြစ်ပြီး အုပ်စု C ရဲ့ပွဲကောင်းတစ်ပွဲ ဖြစ်လာမှာပါ။

.

ဘရာဇီးမှာ နေမာ မကစားနိုင်သေးလို့ တိုက်စစ်မှာ အီဂေါသီယာဂို ကစားဖို့ရှိနေပြီး နောက်ချန်တိုက်စစ် နေရာတွေမှာတော့ ဗီနီးရှပ်၊ ကွန်ညာ၊ ရာဖင်ညာအတွဲ ကစားဖို့ရှိနေတာပါ။ ကွင်းလယ်မှာတော့ ဘရူနိုဂွီမာရေ့စ်နဲ့ ကာဆီမီရို ကစားမှာဖြစ်ပြီး ခံစစ်မှာ ဒါနီလို၊ မာကွင်ညိုစ်၊ ဂါဘရီယယ်နဲ့ ဆန်ဒရိုတို့ ကစားမှာပါ။

.

မော်ရိုကိုမှာတော့ တိုက်စစ်မှာ ဘရာဘင်ဒီယာ့ဇ်၊ ကွင်းလယ်မှာ အက်ဇယ်ဇူလီ၊ ခံစစ်မှာ ဟာကီမီနဲ့ မက်ဇာရာဝီ တို့ အမာခံကစားကြမှာဖြစ်ပြီး သူတို့ရဲ့အကောင်းဆုံးလူစာရင်းကိုပဲ သုံးမှာပါ။

.

မော်ရိုကိုနဲ့ ဘရာဇီးရဲ့ နောက်ဆုံးထိပ်တိုက်တွေ့ဆုံမှု ၂ ကြိမ်မှာ တစ်ကြိမ်စီ နိုင်ထားကြတာဖြစ်လို့ ဒီပွဲမှာ ဘယ်သူအားသာမလဲဆိုတာ ပြောရခက်ပါတယ်။

.

ကမ္ဘာ့ဖလားမတိုင်ခင် ခြေစမ်းပွဲတွေမှာလည်း နှစ်သင်းစလုံး ရလာဒ်တွေကောင်းခဲ့ကြပြီး ဘရာဇီးက ၅ ပွဲကစားပြီး ပြင်သစ်တစ်ပွဲကိုသာ ရှုံးခဲ့သလို မော်ရိုကို ကတော့ ၅ ပွဲစလုံး ရှုံးပွဲမရှိ ကစားထားတာပါ။

.

ဘရာဇီးရဲ့ တိုက်စစ်ကစားပုံ ကောင်းတယ်ဆိုပေမဲ့ ခံစစ်မှာ လိုအပ်ချက်တွေရှိနေတာ၊ မော်ရိုကိုရဲ့ အသင်းလိုက် ကစားပုံ ကောင်းတာ စတာတွေကြောင့် ဒီပွဲမှာ ဘရာဇီးနိုင်ဖို့ ထင်သလောက်တော့ လွယ်မှာ မဟုတ်ပါဘူး။ မော်ရိုကို သရေလောက် ရသွားနိုင်တဲ့ပွဲမျိုးပါပဲ။

.

■ စကော့တလန်-ဟေတီ (နံနက် ၇-၃၀)

.

စကော့တလန်အတွက်တော့ အုပ်စု C မှာ အချောင်ဆုံးဖြစ်တဲ့ ဟေတီကို အနိုင်ကစားနိုင်မှ ဘရာဇီး၊ မော်ရိုကို တို့ကို ယှဉ်လို့ရမှာမို့ ဒီပွဲကို အနိုင်ကစားဖို့ ကြိုးစားမှာပါ။

.

ဟေတီက နှစ်ပေါင်း ၅၂ နှစ်အကြာမှာမှ ကမ္ဘာ့ဖလားပြိုင်ပွဲဆီ ပြန်ရောက်လာခဲ့တယ် ဆိုပေမဲ့လည်း သူ့အသင်းလူစာရင်းက လျှော့တွက်လို့ရတာမျိုး မဟုတ်ပါဘူး။

.

ဟေတီတိုက်စစ်မှာ ဆန်းဒါးလန်းတိုက်စစ်မှူး အီဆီဒေါ ရှိနေပြီး ဝုဗ်အသင်းက ဘယ်လီဂတ် ကလည်း ကွင်းလယ်မှာ အဓိက ထိန်းကျောင်းသူအဖြစ် ရှိနေတာပါ။ အသင်းလူစာရင်းမှာ ပြင်သစ်လိဂ်အသင်းတွေ ဖြစ်ကြတဲ့ နန်စီ၊ အော်ဇေး၊ အန်းဂါးစ်အသင်းက ကစားသမားတွေ ရှိနေတာမို့ လျှော့တွက်လို့တော့ ရမှာမဟုတ်ပါဘူး။

.

စကော့တလန်ကတော့ တိုမီနေး၊ မက်ဂင်း တို့ရဲ့ကွင်းလယ်အားနဲ့ပဲ ကစားမှာဖြစ်ပြီး ခံစစ်မှာ ရောဘတ်ဆင်၊ ဘရန့်ဖို့ဒ်ရဲ့ဟစ်ကီ တို့ကို အမာထားပြီး ကစားမှာပါ။ တိုက်စစ်မှာတော့ တိုရီနို တိုက်စစ်မှူး ချီအဒမ်စ် ကစားမှာ ဖြစ်ပြီး ထုံးစံအတိုင်း သူတို့ရဲ့ကွင်းလယ်ကိုပဲ အားပြုကစားဦးမှာပါ။

.

နယူးဇီလန်ကို ၄-၀ နဲ့ အနိုင်ကစားပြခဲ့တဲ့ ဟေတီရဲ့ခြေစွမ်းကို လျှော့တွက်လို့ မရဘူးဆိုပေမဲ့ စကော့တလန်က အသင်းကောင်းတစ်သင်းဖြစ်တဲ့အကြောင်း အများကြီးသက်သေပြထားပြီးပါပြီ။ ဒါ့အပြင် ဒီပွဲမှာ ၃ မှတ်ရမှသာ နောက်တစ်ဆင့်အတွက် စကော့တလန် မျှော်လင့်ထားလို့ရမှာမို့ ဒီပွဲက စကော့တလန် အနိုင်သေချာတဲ့ပွဲမျိုးလို့ ပြောရမှာပါပဲ။

.