ဒေလီဆန္ဒပြပွဲမတိုင်မီ ပိုးဟပ်လှုပ်ရှားမှု တည်ထောင်သူနဲ့ ကျောင်းသား ခေါင်းဆောင်တွေကို အိန္ဒိယရဲတပ်ဖွဲ့က ဖမ်းဆီး

.

၂၀၂၆ ခုနှစ်၊ အောက်တိုဘာလ ၁၇ ရက်

.

အိန္ဒိယနိုင်ငံ ဒေလီမြို့မှာ သောကြာနေ့ အောက်တိုဘာ ၁၆ ရက်က ရွေးကောက်ပွဲကော်မရှင် အကြီးအကဲ နုတ်ထွက်ပေးဖို့ တောင်းဆိုတဲ့ ဆန္ဒပြပွဲပြုလုပ်ဖို့ လူရာနဲ့ချီ စုဝေးလာချိန်မှာ အိန္ဒိယ ရဲတပ်ဖွဲ့က “ပိုးဟပ်” လှုပ်ရှားမှုကို တည်ထောင်သူ အဘိဂျိ ခ်ဒီပ်ကေး၊ ကျောင်းသားခေါင်းဆောင်တွေနဲ့ ထောက်ခံသူတွေကို ဖမ်းဆီးထိန်းသိမ်းခဲ့ပါတယ်။

.

.

လူငယ်တွေဦးဆောင်တဲ့ ပိုးဟပ်ဂျန်တာပါတီ (CJP)၊ အတိုက်အခံအဖွဲ့တွေနဲ့ ကျောင်းသားအဖွဲ့တွေက အိန္ဒိယ ရွေးကောက်ပွဲကော်မရှင် အကြီးအကဲ ဂျာနက်ရှ် ကူးမား နုတ်ထွက်ပေးဖို့ ဒီလအတွင်း နေ့တိုင်းနီးပါး ဆန္ဒပြနေကြတာပါ။ မဲစာရင်းပြင်ဆင်မှုက ဝန်ကြီးချုပ် နရိန္ဒရာ မိုဒီရဲ့ အိန္ဒိယပြည်သူ့ပါတီ (BJP) ကို အကျိုးရှိစေတယ်လို့ ဆန္ဒပြသူတွေက ပြောပါတယ်။

.

မဲစာရင်းပြင်ဆင်မှုအတွင်း မဲပေးခွင့်ရှိသူ ၁၃၀ သန်းကျော်ရဲ့ အမည်တွေကို ဖယ်ရှားခဲ့ပါတယ်။ ရွေးကောက်ပွဲ ကော်မရှင်ကတော့ ဘယ်ပါတီကိုမှ မျက်နှာသာမပေးဘူးလို့ ငြင်းဆိုထားပြီး မဲစာရင်းကနေ မှားယွင်းဖယ်ရှား ခံရသူတွေ ပြန်လည်စာရင်းသွင်းနိုင်တယ်လို့ ပြောပါတယ်။

.

သောကြာနေ့ ဆန္ဒပြပွဲကိုတော့ ထောင်ဒဏ် ၅ ရက် ချမှတ်ခံထားရတဲ့ CJP ခေါင်းဆောင် ၂ ဦးကို ထောက်ခံ တဲ့အနေနဲ့ ပြုလုပ်တာဖြစ်ပါတယ်။

.

ဒေလီမြို့လယ်က ကွန်နော့တ်ပလေ့စ်မှာ နိုင်ငံတော်အလံတွေ ဝှေ့ယမ်းပြီး  ဆန္ဒပြသူတွေ စုဝေးခဲ့ကြပါတယ်။ ဒီပ်ကေးကတော့ ဒေလီမြို့လယ်က အိမ်တစ်အိမ်ကနေ ထွက်လာချိန်မှာ ရဲတွေက ဖမ်းဆီးပြီး ရဲကားနဲ့ ခေါ်ဆောင်သွားပါတယ်။

.

ဆန္ဒပြမှုမှာ ထင်ရှားတဲ့ ကျောင်းသားတက်ကြွလှုပ်ရှားသူ နီဟာ ဘိုရာကိုလည်း ထောင်နဲ့ချီတဲ့ ထောက်ခံသူ တွေနဲ့အတူ ကွန်နော့တ်ပလေ့စ်ကို သွားရောက်ဖို့ ကြိုးစားချိန်မှာ ရဲတွေက ဖမ်းဆီးခဲ့ပါတယ်။ ရဲအရာရှိ ဆာချင် ရှာမာက ဒီပ်ကေးနဲ့ ဘိုရာတို့ကို ကြိုတင်ကာကွယ်တဲ့အနေနဲ့ ထိန်းသိမ်းထားတာဖြစ်တယ်လို့ ရိုက်တာသတင်းဌာနကို ပြောပါတယ်။

.

ရဲတွေက ဆန္ဒပြပွဲမလုပ်ဖို့ ဒီပ်ကေးကို အစောပိုင်းမှာ သတိပေးခဲ့ပြီး ဒေလီမြို့လယ်မှာလည်း အဓိကရုဏ်း နှိမ်နင်းရေးဝတ်စုံ ဝတ်ဆင်ထားတဲ့ ရဲအင်အား ရာနဲ့ချီ ချထားခဲ့ပါတယ်။ ကွန်နော့တ်ပလေ့စ်က ဗဟိုပန်းခြံ ကိုလည်း အာဏာပိုင်တွေက ပိတ်ထားခဲ့ပါတယ်။

.

ဒါပေမယ့် ဆန္ဒပြသူ ၅၀၀ နီးပါးက အုပ်စုလိုက် ကွန်နော့တ်ပလေ့စ်ကို ရောက်ရှိလာပြီး ဗဟိုပန်းခြံအနီး နေရာ ၆ ခုလောက်မှာ ဆန္ဒပြခဲ့ကြပါတယ်။ နိုင်ငံတော်အလံတွေ ဝှေ့ယမ်းပြီး ကြွေးကြော်သံတွေ ဟစ်ကြွေးခဲ့ ကြသလို အချို့ကို ရဲတွေက ထပ်မံဖမ်းဆီးပြီး ရဲကားတွေနဲ့ ခေါ်ဆောင်သွားပါတယ်။

.

ဘဏ္ဍာရေးမြို့တော် မွမ်ဘိုင်းနဲ့ နည်းပညာမြို့ ဘင်ဂါလူရူးတို့မှာလည်း ဆန္ဒပြပွဲငယ်တွေ ပြုလုပ်ခဲ့ကြပြီး အရှေ့ပိုင်း ပတ်နာမြို့မှာလည်း ကျောင်းသားအဖွဲ့တွေက ဆန္ဒပြခဲ့ကြပါတယ်။

.

“ပိုးဟပ်” လှုပ်ရှားမှုဟာ မိုဒီနဲ့ သူ့ရဲ့ BJP ပါတီအတွက် အကြီးမားဆုံး နိုင်ငံရေးစိန်ခေါ်မှုတွေထဲက တစ်ခု ဖြစ်လာပါတယ်။ ဒီနှစ်အစောပိုင်းမှာလည်း ထောက်ခံသူတွေ ရက်သတ္တပတ်အတော်ကြာ ထိုင်သပိတ် ပြုလုပ် ခဲ့တာကြောင့် စာမေးပွဲမေးခွန်းစာရွက် ပေါက်ကြားမှုတွေနဲ့ပတ်သက်ပြီး ပညာရေးဝန်ကြီး ဓမ္မိန္ဒရာ ပရာဒန် နုတ်ထွက်ခဲ့ရပါတယ်။

.

မဲစာရင်းပြင်ဆင်မှုနဲ့ ပတ်သက်ပြီး ရွေးကောက်ပွဲကော်မရှင် အကြီးအကဲရဲ့ လက်ထောက် ၂ ဦးက အတွင်းပိုင်း မှာ စိုးရိမ်မှုတွေ ထုတ်ဖော်ပြောခဲ့တယ်လို့ အိန္ဒိယအက်စ်ပရက်စ် သတင်းစာက ဖော်ပြပြီးနောက် အခုနောက်  ဆုံး ဆန္ဒပြပွဲတွေ ပေါ်ပေါက်လာတာ ဖြစ်ပါတယ်။

.

မဲစာရင်းကနေ ဖယ်ရှားခံရတဲ့ လူ ၁၃၀ သန်းထဲမှာ သေဆုံးပြီးသူ ၂၈ သန်း၊ နေရာပြောင်းရွှေ့သွားသူ ၆၃ သန်းနဲ့ ရှာမတွေ့သူ ၃၀ သန်း ပါဝင်တယ်လို့ ရွေးကောက်ပွဲကော်မရှင်က ပြောပါတယ်။

.

အတိုက်အခံပါတီတွေကတော့ ဒီဖယ်ရှားမှုတွေကြောင့် ဟိန္ဒူအမျိုးသားရေးဝါဒီ အာဏာရပါတီကို ထောက်ခံ နိုင်ခြေနည်းတဲ့ မွတ်စလင်တွေနဲ့ အခြားလူနည်းစုတွေ ပိုပြီးထိခိုက်တယ်လို့ စွပ်စွဲထားပါတယ်။ ရွေးကောက်ပွဲ ကော်မရှင်နဲ့ BJP ပါတီကတော့ အဲဒီစွပ်စွဲချက်တွေကို ငြင်းဆိုထားပါတယ်။

.

Ref – CNA

.