တောင်ကြီးမြို့၊ မင်္ဂလာဦးရပ်ကွက်ရှိ ပြိုကျခဲ့သည့် တံတားကို ယာယီပြုပြင်ပေးသွားမည်

.

၂၀၂၆ ခုနှစ်၊ အောက်တိုဘာလ ၁၇ ရက်

.

ရှမ်းပြည်နယ်မြို့တော် တောင်ကြီးမြို့၊ မင်္ဂလာဦးရပ်ကွက်၊ သီရိမင်္ဂလာလမ်းရှိ ပြိုကျပျက်စီးခဲ့သည့် တံတားကို ယာယီပြုပြင်ပေးသွားမည်ဖြစ်ကြောင်း သိရသည်။

.

.

မင်္ဂလာဦးရပ်ကွက်၊ သီရိမင်္ဂလာလမ်း၊ မင်္ဂလာဦးရပ်ကွက် အုပ်ချုပ်ရေးမှူးရုံးအနီးရှိ အဆိုပါ တံတားမှာ မိုးသည်းထန်စွာ ရွာသွန်းမှုကြောင့် အောက်တိုဘာ ၁၆ ရက်က လမ်းအောက်ခံမြေနှင့် ကွန်ကရစ်တံတားများ ပြိုကျခဲ့ခြင်းဖြစ်ကြောင်း သိရသည်။

.

“အဲဒီနေရာမှာ အခေါင်းပေါက် ဖြစ်နေတာတော့ တစ်နှစ်လောက် ရှိပါပြီ။ မနေ့ (အောက်တိုဘာ ၁၆ ရက်) က လုံးဝပြိုကျသွားတာပါ။ အပေါ်က ယာဉ်ဝိတ်တွေနဲ့ သွားလာကြတာဆိုတော့ အောက်က ကွန်ကရစ်ပြား လုံးဝ ပြိုကျသွားတာပါ” ဟု မင်္ဂလာဦးရပ်ကွက်နေ ဒေသခံတစ်ဦးက ပြောသည်။

.

ယင်းလမ်းပိုင်းရှိ တံတားမှာ သက်တမ်းကြာမြင့်နေပြီဖြစ်ပြီး ပြုပြင်ရန် ဘတ်ဂျက်လျာထားမှုရှိသော်လည်း ဘတ်ဂျက်ခွင့်ပြုချက်ကို စောင့်ဆိုင်းမနေတော့ဘဲ ယာယီပြုပြင်မှုများ လုပ်ဆောင်သွားမည်ဖြစ်ကြောင်း တောင်ကြီးမြို့နယ် စည်ပင်သာယာရေးဌာန ထံက သိရသည်။

.

“တံတားက နှစ်တွေကလည်း ကြာပြီကော။ ဘတ်ဂျက်ချထားတာရှိပါတယ်။ ခုတော့ ဘတ်ဂျက်ကျဖို့အချိန် မစောင့်တော့ပါဘူး။ ပြွန်အဟောင်းတွေနဲ့လုပ်မှာပါ။ ယာယီလုပ်ပေးသွားမှာပါ။ အပြီးအစီးပြင်ဆင်မှာတော့ ဘတ်ဂျက်ကျမှပါ။ အဲ့ဒါက လုပ်ထုံးလုပ်နည်းပါ” ဟု တောင်ကြီးမြို့နယ်စည်ပင်သာယာရေးဌာနမှ တာဝန်ရှိသူတစ်ဦးက ကမ္ဘောဇတိုင်းသို့ ပြောသည်။

.

လက်ရှိတွင် ယာယီပြုပြင်မှုများကို လုပ်ဆောင်သွားမည်ဖြစ်သော်လည်း အပြီးသတ်ပြုပြင်ရေးလုပ်ငန်းများမှာ ဘတ်ဂျက်ခွင့်ပြုချက်ရရှိပြီးမှသာ ဆောင်ရွက်နိုင်မည်ဖြစ်ကြောင်း ၎င်းထံက သိရသည်။

.

မိုးသည်းထန်စွာရွာသွန်းမှုများ ဆက်လက်ဖြစ်ပေါ်လာနိုင်သည့်အတွက် လမ်းအောက်ခံမြေသားပြိုကျသည့် နေရာများနှင့် အခေါင်းပေါက်ဖြစ်ပေါ်နေသည့် လမ်းပိုင်းများတွင် သွားလာရာ၌ သတိပြုရန် လိုအပ်ကြောင်း ဒေသခံများထံက သိရသည်။

.