.
၂၀၂၆ ခုနှစ်၊ နိုဝင်ဘာလ ၁၇ ရက်
.
ဂျပန်နိုင်ငံမှာ ဗီဇာသက်တမ်းကျော်ပြီး
နေထိုင်နေတဲ့ နိုင်ငံခြားသားတွေထဲမှာ ထိုင်းနိုင်ငံသားတွေက အများဆုံးအုပ်စု
ဖြစ်လာပြီး ဗီယက်နမ်နိုင်ငံသားတွေကို ကျော်တက်သွားပါတယ်။ ဒါပေမယ့်
ထိုင်းနိုင်ငံသားတွေ ဗီဇာသက်တမ်း ကျော် နေတဲ့ အရေအတွက်ကတော့ ၂၀၂၆
ခုနှစ်အစပိုင်းကနေ ဇူလိုင်လအထိ ၆ ရာခိုင်နှုန်းနီးပါး လျော့ကျလာပါတယ်။
.
.ဂျပန်လူဝင်မှုကြီးကြပ်ရေးဝန်ဆောင်မှုအေဂျင်စီရဲ့
ထုတ်ပြန်ချက်အရ ဇူလိုင် ၁ ရက်အထိ ဂျပန်မှာ ဗီဇာသက်တမ်း ကျော်နေတဲ့
ထိုင်းနိုင်ငံသား ၁၀,၂၆၀ ဦး ရှိပြီး ဗီယက်နမ်နိုင်ငံသားက ၁၀,၁၃၅ ဦး ရှိပါတယ်။
.
နှစ်အစပိုင်းမှာတော့ ဗီယက်နမ်နိုင်ငံသားတွေက
ဗီဇာသက်တမ်းကျော်နေသူ အများဆုံးဖြစ်ခဲ့ပေမဲ့ နည်းပညာ အလုပ်သင်လုပ်သားတွေ
နိုင်ငံပြန်သွားတာအပါအဝင် တခြားအကြောင်းရင်းတွေကြောင့် ဗီယက်နမ်နိုင်ငံသား
ဗီဇာသက်တမ်းကျော်သူတွေ လျော့ကျလာတဲ့အတွက် ထိုင်းနိုင်ငံသားတွေက ပထမနေရာကို
ရောက်လာတာ ဖြစ်ပါတယ်။
.
ထိုင်းနိုင်ငံသားတွေက အများဆုံးဖြစ်လာပေမဲ့
သူတို့ရဲ့ အရေအတွက်က ဇန်နဝါရီ ၁ ရက်မှာ ၁၀,၉၀၇ ဦးရှိရာကနေ
ဇူလိုင် ၁ ရက်မှာ ၁၀,၂၆၀ ဦးအထိ လျော့ကျခဲ့တာဖြစ်ပြီး ၆၄၇ ဦး၊
ရာခိုင်နှုန်းအားဖြင့် ၅.၉ ရာခိုင်နှုန်းလောက် ကျဆင်း ခဲ့ပါတယ်။
.
ဂျပန်နိုင်ငံမှာ ဗီဇာသက်တမ်းကျော်နေတဲ့
နိုင်ငံခြားသားအားလုံးထဲမှာ ထိုင်းနိုင်ငံသားတွေက ၁၅ ဒသမ ၇ ရာခိုင်နှုန်းလောက်
ပါဝင်ပါတယ်။
.
ဇူလိုင် ၁ ရက်အထိ ဂျပန်မှာ
ဗီဇာသက်တမ်းကျော်နေတဲ့ နိုင်ငံခြားသား စုစုပေါင်း ၆၅,၂၂၉ ဦး
ရှိပြီး နှစ်အစပိုင်းနဲ့ နှိုင်းယှဉ်ရင် ၄ ဒသမ ၈ ရာခိုင်နှုန်း လျော့ကျလာပါတယ်။
.
ဂျပန်လူဝင်မှုကြီးကြပ်ရေးဝန်ဆောင်မှုအေဂျင်စီကတော့
ဒီလိုလျော့ကျလာတာဟာ တရားမဝင် နေထိုင်သူတွေကို ဖော်ထုတ်အရေးယူမှု
ပိုမိုတင်းကျပ်စေဖို့၊ လူဝင်မှုကြီးကြပ်ရေးဆိုင်ရာ ချိုးဖောက် မှုတွေကို
မြန်မြန်ဆန်ဆန် အရေးယူ ဖို့နဲ့ ဂျပန်မှာ တရားဝင်နေထိုင်ခွင့် မရှိတော့သူတွေကို
နိုင်ငံကနေ ပြန်လည်ထွက်ခွာစေဖို့ ရည်ရွယ်တဲ့ Zero Illegal Foreign
Residents Plan ကြောင့်လည်း ဖြစ်တယ်လို့ ပြောပါတယ်။
.
တစ်ဖက်မှာလည်း ဂျပန်နိုင်ငံမှာ
နိုင်ငံခြားသားနေထိုင်သူဦးရေက စံချိန်တင်အဆင့်အထိ ဆက်လက်မြင့်တက်နေ ပါတယ်။
.
အောက်တိုဘာ ၁၆ ရက်မှာ ထုတ်ပြန်တဲ့စာရင်းအရ
ဇွန်လကုန်အထိ ဂျပန်မှာ နိုင်ငံခြားသားနေထိုင်သူ ၄,၂၈၁,၀၂၆ ဦး ရှိလာပြီး ၂၀၂၅ ခုနှစ်ကုန်နဲ့ နှိုင်းယှဉ်ရင် ၃.၈ ရာခိုင်နှုန်း
တိုးလာပါတယ်။
.
နိုင်ငံအလိုက်ကြည့်ရင် တရုတ်နိုင်ငံသားတွေက ၉၄၁,၀၃၁ ဦးနဲ့ အများဆုံးဖြစ်ပြီး ဗီယက်နမ်နဲ့ တောင်ကိုရီးယား နိုင်ငံသားတွေက
နောက်မှာ ရှိပါတယ်။
.
နေထိုင်ခွင့်အမျိုးအစားအလိုက်တော့
အမြဲတမ်းနေထိုင်ခွင့်ရှိသူတွေက ၉၆၁,၃၄၂ ဦးနဲ့
အများဆုံးဖြစ်ပြီး ၁ ဒသမ ၅ ရာခိုင်နှုန်း တိုးလာပါတယ်။ အင်ဂျင်နီယာ၊ လူမှုရေးနဲ့
နိုင်ငံတကာဝန်ဆောင်မှုလုပ်ငန်းတွေမှာ လုပ်ကိုင်ခွင့်ရှိတဲ့
နေထိုင်ခွင့်အမျိုးအစားကတော့ ၅၁၆,၁၈၄ ဦးရှိပြီး ၈.၅
ရာခိုင်နှုန်း တိုးလာပါတယ်။ ဒီအုပ်စုထဲမှာ အင်ဂျင်နီယာတွေ၊ စကားပြန်တွေ၊
ဘာသာပြန်တွေလို ကျွမ်းကျင်လုပ်သားတွေ ပါဝင်ပါတယ်။
.
တစ်ချိန်တည်းမှာပဲ ဂျပန်နိုင်ငံက
နိုင်ငံခြားသားတွေ စီးပွားရေးလုပ်ငန်းတည်ထောင်ပြီး လုပ်ကိုင်ဖို့ လျှောက်ထားတဲ့ Business
Manager နေထိုင်ခွင့်အတွက်လည်း စည်းမျဉ်းတွေ ပိုတင်းကျပ်လာပါတယ်။
.
၂၀၂၆ ခုနှစ် ပထမနှစ်ဝက်မှာ Business
Manager နေထိုင်ခွင့်နဲ့ ဂျပန်ကို အသစ်ဝင်လာသူ အရေ အတွက်ဟာ မနှစ်က
အလားတူကာလနဲ့ နှိုင်းယှဉ်ရင် ၈၀ ရာခိုင်နှုန်းလောက် ကျဆင်းပြီး ၆၃၅ ဦးပဲ
ရှိခဲ့ပါတယ်။
.
ဒီလိုကျဆင်းလာတာဟာ ၂၀၂၅ ခုနှစ် အောက်တိုဘာလမှာ
စည်းမျဉ်းတွေ ပြောင်းလဲခဲ့တာနဲ့လည်း ဆက်စပ်နေပါ တယ်။ အဲဒီအပြောင်းအလဲအရ
ဒီနေထိုင်ခွင့်အတွက် လိုအပ်တဲ့ အနည်းဆုံး မတည်ငွေကို ယန်း ၅ သန်းကနေ ယန်း သန်း ၃၀
အထိ တိုးမြှင့်ခဲ့တာဖြစ်ပြီး ၆ ဆ တိုးလာတာ ဖြစ်ပါတယ်။
.
နိုင်ငံခြားသားတချို့က တကယ့်လုပ်ငန်းမလုပ်ဘဲ
အခွံကုမ္ပဏီတွေ ဒါမှမဟုတ် လုပ်ငန်းအတုတွေ အသုံးပြုပြီး နေထိုင်ခွင့်ရယူနေတယ်ဆိုတဲ့
စိုးရိမ်မှုတွေကြောင့် ဒီစည်းမျဉ်းတွေကို ပြောင်းလဲခဲ့တာ ဖြစ်ပါတယ်။
.
ဒါ့အပြင် ၂၀၂၆ ခုနှစ် ပထမ ၆ လအတွင်း
ဂျပန်နိုင်ငံကို နိုင်ငံခြားသား ၂၂,၈၁၇,၇၆၆ ဦး ဝင်ရောက်ခဲ့ပြီး မနှစ်က အလားတူကာလနဲ့ နှိုင်းယှဉ်ရင် ၂.၅
ရာခိုင်နှုန်း လျော့ကျခဲ့ပါတယ်။ ၂၀၂၂ ခုနှစ်မှာ ကိုဗစ်ကပ် ရောဂါနောက်ပိုင်း
ခရီးသွားလုပ်ငန်း ပြန်လည်ကောင်းမွန်လာပြီးနောက်ပိုင်း ပထမဆုံးအကြိမ်
နိုင်ငံခြားသားဝင်ရောက်မှု ကျဆင်းလာတာ ဖြစ်ပါတယ်။
.
အဲဒီထဲမှာ တရုတ်နိုင်ငံကနေ ဂျပန်ကို ရောက်လာတဲ့
ရေတိုခရီးသွားအသစ်အရေအတွက်ဟာ မနှစ်က အလားတူ ကာလနဲ့ နှိုင်းယှဉ်ရင် ၆၀
ရာခိုင်နှုန်းနီးပါး လျော့ကျခဲ့ပါတယ်။ ဂျပန်လူဝင်မှုကြီးကြပ်ရေး အာဏာပိုင်တွေကတော့
၂၀၂၅ ခုနှစ် နိုဝင်ဘာလမှာ တရုတ်အစိုးရက သူ့နိုင်ငံသားတွေကို ဂျပန်နိုင်ငံကို
ခရီးမသွားဖို့ သတိပေးခဲ့တာနဲ့လည်း ဆက်စပ်နိုင်တယ်လို့ ပြောပါတယ်။
.
ဂျပန်မှာ ဗီဇာသက်တမ်းကျော်နေတဲ့
ထိုင်းနိုင်ငံသားအရေအတွက် အများဆုံးဖြစ်လာတာကြောင့် ထိုင်းနိုင်ငံသားတွေ အတွက်
ဂျပန်ရဲ့ ဗီဇာကင်းလွတ်ခွင့်အပေါ် ထိခိုက်မှုရှိလာနိုင်မလားဆိုတဲ့ မေးခွန်းတွေလည်း
ထွက်ပေါ်လာပါတယ်။
.
ဂျပန်ဟာ ၂၀၁၃ ခုနှစ် ဇူလိုင် ၁ ရက်ကစပြီး
ထိုင်းနိုင်ငံသားတွေအတွက် ဗီဇာကင်းလွတ်ခွင့် ပေးထားပြီး
အီလက်ထရွန်းနစ်နိုင်ငံကူးလက်မှတ် ကိုင်ဆောင်ထားသူတွေဟာ ခရီးသွားတာ၊ မိသားစုဆီ
သွားရောက် လည်ပတ်တာနဲ့ ရေတိုစီးပွားရေးကိစ္စတွေအတွက် ဗီဇာကြိုတင်လျှောက်စရာမလိုဘဲ
၁၅ ရက်အထိ ဝင်ရောက်နိုင်ပါတယ်။
.
ထိုင်းနိုင်ငံ ကောင်စစ်ရေးရာဌာနကလည်း ဇူလိုင် ၈
ရက်မှာ ဂျပန်နိုင်ငံက ထိုင်းနိုင်ငံသားတွေအတွက် ဗီဇာ ကင်းလွတ်ခွင့်ကို
နောက်ထပ်တစ်နှစ် တိုးပေးခဲ့ပြီး ၂၀၂၆ ခုနှစ် ဇူလိုင် ၁ ရက်ကနေ ၂၀၂၇ ခုနှစ် ဇွန် ၃၀
ရက်အထိ ဆက်လက်အကျုံးဝင်မယ်လို့ အတည်ပြုထားပါတယ်။
.
ထိုင်းနိုင်ငံသားခရီးသွားတွေကိုလည်း
လူဝင်မှုကြီးကြပ်ရေးစည်းမျဉ်းတွေကို တိတိကျကျ လိုက်နာဖို့၊ ဗီဇာ သက်တမ်းမကျော်ဖို့နဲ့
ခွင့်ပြုချက်မရှိဘဲ အလုပ်မလုပ်ဖို့ သတိပေးထားပါတယ်။
.
ထိုင်းနိုင်ငံဆိုင်ရာ ဂျပန်သံရုံးကလည်း
ဗီဇာကင်းလွတ်ခွင့်ဟာ တရားဝင် ရေတိုခရီးစဉ်တွေအတွက်ပဲ ဖြစ်တယ်လို့ သတိပေးထားပါတယ်။
ဂျပန်လူဝင်မှုကြီးကြပ်ရေးအရာရှိတွေကလည်း လေယာဉ်ပြန်လက်မှတ်၊ လုံလောက်တဲ့
ငွေကြေးရှိကြောင်း အထောက်အထား၊ တည်းခိုမယ့်နေရာနဲ့ ခရီးစဉ်အစီအစဉ်တွေလို
အထောက်အထားတွေကို တောင်းခံနိုင်ပါတယ်။
.
Ref – Khaosod
.

No comments:
Post a Comment