တရုတ်နိုင်ငံမြောက်ပိုင်းမှာ ကျောက်မီးသွေးတွင်း ပေါက်ကွဲပြီး အနည်းဆုံး လူ ၉၀ ကျော်သေဆုံး

.

၂၀၂၆ ခုနှစ်၊ မေလ ၂၃ ရက်

.

တရုတ်နိုင်ငံ မြောက်ပိုင်းမှာ ကျောက်မီးသွေးတွင်းတစ်ခု ပေါက်ကွဲမှုဖြစ်ပွားရာကနေ အနည်းဆုံး လူ ၉၀ ကျော်သေဆုံးခဲ့တဲ့အကြောင်း တရုတ်နိုင်ငံပိုင်မီဒီယာတွေက ဖော်ပြနေကြပါတယ်။

.

.

ပေါက်ကွဲမှုက ရှန်ရှီပြည်နယ်မှာဖြစ်ပွားခဲ့တာြဖစ်ပြီး တောင်ဇူ စီးပွားရေးလုပ်ငန်းက စီမံခန့်ခွဲတဲ့ လူရှန်းယု ကျောက်မီးသွေးတွင်း ပေါက်ကွဲခဲ့တာပါ။

.

ရာနဲ့ချီတဲ့ ကယ်ဆယ်ရေးသမားတွေက ပေါက်ကွဲမှုဖြစ်ပွားရာကို ရောက်ရှိနေပြီး ဆေးရုံမှာ ကုသမှုခံနေရသူ ၂၇ ဦးရှိနေတယ်လို့ သိရပါတယ်။ ကယ်ဆယ်ရေးလုပ်ငန်းတွေကိုတော့ ဆက်လက်လုပ်ဆောင်နေကြဆဲ ဖြစ်ပြီး ဆေးရုံရောက်နေသူအများစုက အသေးစားဒဏ်ရာတွေသာ ရရှိထားခဲ့ကြတာပါ။

.

ပေါက်ကွဲမှုက သောကြာနေ့ ည ၇ နာရီခွဲလောက်မှာဖြစ်ပွားခဲ့တာဖြစ်ပြီး အဲဒီအချိန်မှာ တာဝန်ထမ်းဆောင် နေတဲ့ အလုပ်သမား ၂၄၇ ဦးရှိခဲ့တာပါ။

.

သေဆုံးသူအများစုက အဆိပ်ရှိတဲ့ဓာတ်ငွေ့ကို ရှူမိတာကြောင့် သေဆုံးသွားခဲ့ကြတာဖြစ်တယ်လို့ နိုင်ငံပိုင် မီဒီယာတွေက ရေးသားခဲ့ကြပေမဲ့လည်း ဘယ်လိုဓာတ်ငွေ့အမျိုးအစားလဲဆိုတာကိုတော့ ဖော်ပြခြင်း မရှိပါဘူး။

.

အလုပ်သမားတစ်ယောက်ဖြစ်တဲ့ ဝန်ယန်းကတော့ “ပေါက်ကွဲမှုဖြစ်တုန်းက အသံမကြားခဲ့ရပေမဲ့ ရုတ်တရက် မီးခိုးတိမ်ကြီးတက်လာတာကို တွေ့ခဲ့ရတာပါ။ ဗုံးဖောက်တဲ့အချိန်လိုမျိုး ဆာလ်ဖာအနံ့ကိုရခဲ့ပါတယ်။ ဘေးကလူတွေကို ပြေးဖို့အော်ပြောပြီး ကျွန်တော်တို့ ပြေးခဲ့ကြတယ်။ လမ်းမှာ လူတွေ အဆိပ်ငွေ့ကြောင့် လဲကျနေတာကို တွေ့ခဲ့ရပါတယ်။ အဲဒီနောက်မှာ ကျွန်တော်လည်း သတိလစ်သွားခဲ့တယ်။ တစ်နာရီလောက် ကြာမှ ကိုယ့်ဘာသာ ပြန်သတိရလာခဲ့တာပါ” လို့ဆိုပါတယ်။

.

ဖြစ်စဉ်အပြီးမှာ တရုတ်သမ္မတ ရှီကျင့်ဖျင်က ဒဏ်ရာရသူတွေကို ကုသပေးဖို့နဲ့ အသက်ရှင်ကျန်ရစ်သူတွေကို ဆက်လက်ရှာဖွေဖို့ အစွမ်းကုန်ကြိုးစားရမယ့်အကြောင်း ညွှန်ကြားခဲ့ပါတယ်။ ဒါ့အပြင် အစိုးရကိုလည်း မတော်တဆမှုရဲ့အကြောင်းရင်းကို ရှာဖွေစုံစမ်းပြီး တာဝန်ရှိသူတွေကို အရေးယူဖို့ တောင်းဆိုထားပါတယ်။

.

လူရှန်းယုကျောက်မီးသွေးတွင်းကို ၂၀၂၄ ခုနှစ်မှာ လုံခြုံရေးအန္တရာယ်ပြင်းထန်တဲ့နေရာအဖြစ် တရုတ် အမျိုးသား သတ္တုတွင်းအုပ်ချုပ်ရေးအဖွဲ့က စာရင်းသွင်းထားခဲ့တာပါ။

.

သတ္တုတွင်းကို စီမံခန့်ခွဲတဲ့ ကုမ္ပဏီကလည်း ၂၀၂၅ ခုနှစ်အတွင်း လုံခြုံရေးဆိုင်ရာ ပြဿနာတွေကြောင့် အရေးယူမှု ၂ ကြိမ် ခံထားရတဲ့ ကုမ္ပဏီဖြစ်ပါတယ်။

.

ရှန်ရှီပြည်နယ်ဟာ တရုတ်နိုင်ငံရဲ့ကျောက်မီးသွေးထုတ်လုပ်မှု ၄ ပုံ ၁ ပုံကို ထုတ်လုပ်ပေးနေခဲ့ပေမဲ့လည်း ၂၀၀၀ ပြည့်နှစ်အစောပိုင်းက စတင်ပြီး လုပ်ငန်းခွင်တွေမှာ လူသေဆုံးမှုတွေ ဖြစ်ပေါ်လာခဲ့တာပါ။ လုံခြုံရေး စံနှုန်းတွေကို ထပ်ပြီး တင်းကျပ်လာခဲ့ပေမဲ့လည်း လူသေဆုံးမှုတွေကတော့ ဖြစ်ပေါ်နေဆဲ ဖြစ်ပါတယ်။

.

Ref ; - Xinhua

.