ကျောင်းပြင်ပရောက် မူလတန်းနှင့် အလယ်တန်းအဆင့် ကျောင်းသား/သူများအတွက် Placement Test ဖြေဆိုခွင့် ပြုမည်

၂၀၂၁-၂၀၂၂ ပညာသင်နှစ်မှစ၍ အကြောင်းအမျိုးမျိုးကြောင့် ကျောင်းပြင်ပသို့ ရောက်ရှိနေသော မူလတန်း နှင့် အလယ်တန်းအဆင့် ကျောင်းနေအရွယ် ကလေးငယ်များအား အသက်အရွယ်အရ သတ်မှတ် ထားသည့် အတန်းများသို့ ဝင်ရောက်ပညာသင်ယူနိုင်ရေးအတွက် အထူးအစီအစဉ် အနေဖြင့် Placement Test ဖြေဆိုခွင့် ပြုသွားမည်ဖြစ်ကြောင်း သိရသည်။

.
အဆိုပါ Placement Test ဖြေဆိုခြင်းကို ဇွန်လ ၁၅ ရက်မှ ၂၀ ရက်အတွင်း ဆောင်ရွက်သွားမည်ဖြစ်ပြီး ဖြေဆိုရန် စည်းကမ်းချက်နှင့် ကိုက်ညီသော ကျောင်းသား/ကျောင်းသူများ အနေဖြင့် မြို့နယ်ပညာရေးမှူးရုံး များသို့ မေလ ၂၂ ရက်မှ ဇွန်လ ၅ ရက်အတွင်း လာရောက်လျှောက်ထားနိုင်ကြောင်း အခြေခံပညာဦးစီးဌာန က အသိပေး အကြောင်းကြားထားသည်။
.
ဖြေဆိုလိုသော ကျောင်းသား/သူသည် အခြေခံပညာကျောင်း သို့မဟုတ် ကိုယ်ပိုင်ကျောင်း သို့မဟုတ် ဘုန်းတော်ကြီးသင် ပညာရေးကျောင်းမျးတွင် ပညာသင်ယူခဲ့ဖူးသူ ဖြစ်ရမည်ဖြစ်ပြီး မိမိ နောက်ဆုံး တက်ရောက်ခဲ့သည့်ကျောင်းမှ နောက်ဆုံးအောင်မြင်ခဲ့သည့် အတန်းအတွက် ကျောင်းထောက်ခံချက် မူရင်း သို့မဟုတ် မိတ္တူကို ပူးတွဲတင်ပြရမည်ဖြစ်ကာ တင်ပြနိုင်ခြင်းမရှိပါက အရေးပေါ် အခြေအနေကြေညာ ထားသော မြို့နယ်အတွင်းရှိ ကျောင်းတွင် တက်ရောက်ခဲ့သည့် ကျောင်းသားဖြစ်ကြောင်း အထောက်အထား ရပ်ကွက်/ကျေးရွာ အုပ်ချုပ်ရေးမှူး၏ ထောက်ခံချက် ပူးတွဲ တင်ပြရမည်ဖြစ်ကြောင်း သိရသည်။
.
ထို့အပြင် လျှောက်ထားသူသည် မိမိအသက်အရွယ်အရ တက်ရောက်သင်ယူရမည့်အတန်း၏ တစ်ဆင့်နိမ့် အတန်း Placement Test ကို ဖြေဆိုရမည်ကာ တစ်ဆင့်နိမ့်အတန်းကို တက်ရောက်လိုပါက ယင်းအတန်း၏ တစ်ဆင့်နိမ့် အတန်းကို ဖြေဆိုရမည်ဖြစ်ကြောင်း သိရသည်။
.
အကယ်၍ Placement ကို ကျရှုံးပါက ဖြေဆိုသည့်အတန်းကိုသာ တက်ရောက်ပညာသင်ယူရမည်ဖြစ်ပြီး ဖြေဆိုလိုသောအတန်းနှင့် မွေးသက္ကရာဇ်အရ အသက်ကိုက်ညီမှုရှိရမည်ဖြစ်ကြောင်း သိရသည်။
.
မွေးသက္ကရာဇ်အတွက် မွေးစာရင်း သို့မဟုတ် အသက်ထောက်ခံချက် (အိမ်ထောင်စုမူရင်း) တင်ပြရမည် ဖြစ်ပြီး တင်ပြနိုင်ခြင်းမရှိပါက ကျောင်းသား၏ နိုင်ငံသားစိစစ်ရေးကတ်ပြား သို့မဟုတ် သက်ဆိုင်ရာ မြို့နယ် ကျန်းမာ‌ရေးဌာန၏ အသက်ဖော်ပြထားသော ကျန်းမာကြောင်း ဆေးထောက်ခံချက် ပူးတွဲတင်ပြရမည် ဖြစ်ကြောင်း သိရသည်။
.
Placement Test ဖြေဆိုခွင့်လျှောက်လွှာများကို မြို့နယ်ပညာရေးမှူးရုံးများတွင် မေလ ၂၂ ရက်မှ စတင်၍ ပိတ်ရက်မရှိ အခမဲ့ ထုတ်ယူနိုင်ပြီး ဇွန်လ ၅ ရက် ရုံးချိန်အတွင် နောက်ဆုံးထား၍ မြို့နယ်ပညာရေးမှူးရုံးသို့ ပြန်လည်တင်သွင်း လျှောက်ထားရမည်ဖြစ်ကြောင်း သိရသည်။
.
လျှောက်ထားသူသည် အတန်းတက်ရောက်ခွင့်ရရှိပါက ၂၀၂၆-၂၀၂၇ ပညာသင်နှစ်တွင် အခြေခံပညာ ကျောင်းများ၌သာ တက်ရောက်ပညာသင်ယူရမည်ဖြစ်ကြောင်း အခြေခံပညာဦးစီးဌာနက ထုတ်ပြန်ထားသည်။
.
#KBZTai #Shan #Taunggyi #Education
.