ကလောမြို့နယ်၊ သာမိုင်းခမ်းတွင် တန် ၇၀၀ အာလူးအအေးခန်း ဖွင့်လှစ်

.

၂၀၂၆ ခုနှစ်၊ မေလ ၂၄ ရက်

.

ရှမ်းပြည်နယ်တောင်ပိုင်း၊ ကလောမြို့နယ်၊ သာမိုင်းခမ်းကျေးရွာအုပ်စု၊ ကုန်းလွင်ကျေးရွာတွင် ယနေ့ မေလ ၂၄ ရက်၊ နံနက်ပိုင်းက ရှမ်းထိပ်တန်း ကုမ္ပဏီ၏ တန် ၇၀၀ အာလူးအအေးခန်းဖွင့်ပွဲ ပြုလုပ်ခဲ့ကြောင်း သိရသည်။

.

.

“မျိုးအာလူးတွေကို အဓိကထားပြီး ထိန်းသိမ်းနိုင်ဖို့ပါ။ မျိုးအာလူး သိုလှောင်ထားခြင်းအားဖြင့် မျိုးကောင်း မျိုးသန့် ရမယ်။ ရေရှည် ၆ လအထိထားပြီးတော့ မျိုးနားချိန် ထွက်နှုန်းပိုပြီး တိုးတက်အောင် ရည်ရွယ်တာပါ။ ခေတ်မီ ဖွံ့ဖြိုးတိုးတက်တဲ့ နည်းစနစ်နဲ့ စိုက်ပျိုးပြီး နိုင်ငံတော်ကို တစ်ဘက်တစ်လမ်းက ဝင်ငွေရစေပြီး တောင်သူတွေလည်း လူနေမှုအဆင့်အတန်း ပိုမြင့်မားလာအောင် အအေးခန်း ဖွင့်လှစ်ရခြင်းဖြစ်ပါတယ်” အအေးခန်း တည်ထောင်သူ ရှမ်းထိပ်တန်းကုမ္ပဏီမှ ဦးမိုးသားက ကမ္ဘောဇတိုင်းသို့ ပြောသည်။

.

အာလူးစိုက် တောင်သူများအနေဖြင့် အဆိုပါ အာလူးအအေးခန်းတွင် အာလူး တစ်တန်လျှင် တစ်လ တစ်သိန်းကျပ်နှုန်းဖြင့် အာလူးများကို ထိန်းသိမ်းသိုလှောင်ထားရှိနိုင်မည်ဖြစ်ကြောင်း သိရသည်။

.

အဆိုပါ အခမ်းအနားတွင် ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် စိုင်းထိန်စိုးက အဖွင့်အမှာစကား ပြောကြား ခဲ့ပြီး ရှမ်းထိပ်တန်း အအေးခန်းတည်ဆောက်သူ အင်ဂျင်နီယာ ဦးအောင်အောင်က တန် ၇၀၀ အအေးခန်း တည်ဆောက်ရခြင်း၏ ရည်ရွယ်ချက်နှင့် တောင်သူများအတွက် အကျိုးကျေးဇူး ဖြစ်ထွန်းနိုင်မှုကို ရှင်းလင်း ပြောကြားကာ အအေးခန်းပိုင်ရှင် ဦးမိုးသားက ကျေးဇူးတင်စကား ပြန်လည်ပြောကြားခဲ့ကြောင်း သိရသည်။

.

ထို့နောက် ရှမ်းပြည်နယ်ဝန်ကြီးချုပ် စိုင်းထိန်စိုးနှင့် ပြည်နယ်အစိုးရအဖွဲ့ဝင် ဝန်ကြီးများက ရှမ်းထိပ်တန်း တန် ၇၀၀ အာလူးအအေးခန်း ဆိုင်းဘုတ်ကို ဖဲကြိုးဖြတ်ဖွင့်လှစ်ပြီး အမွှေးနံသာရည်များ ပက်ဖျန်းကာ အအေးခန်းအတွင်း လှည့်လည်ကြည့်ရှုခဲ့ကြောင်းလည်း သိရသည်။

.

အာလူးကို ရှမ်းပြည်နယ်တောင်ပိုင်း ကလောမြို့နယ်၊ ညောင်ရွှေမြို့နယ်၊ ဟိုပုံးမြို့နယ်၊ ဆီဆိုင်မြို့နယ်၊ ပင်လောင်းမြို့နယ်နှင့် ဖယ်ခုံမြို့နယ်တို့တွင် အများဆုံး စိုက်ပျိုးကြပြီး ရှမ်းတောင်ဒေသထွက် အာလူးများကို မြန်မာတစ်နိုင်ငံလုံးသို့ အဓိက ဖြန့်ဖြူးပေးနေခြင်း ဖြစ်ကြောင်း သိရသည်။

.