၃ နိုင်ငံ အမျိုးသမီး ဖိတ်ခေါ်ပြိုင်ပွဲ (ရုပ်သံ)

၂၀၂၆ ခုနှစ်၊ မေလ ၂၆ ရက်

မြန်မာနိုင်ငံက အိမ်ရှင်အဖြစ် လက်ခံကျင်းပမယ့် ၃ နိုင်ငံ အမျိုးသမီး ဖိတ်ခေါ်ပြိုင်ပွဲနဲ့ ပတ်သက်ပြီး သိထားသင့်တာလေးတွေကို ပြောပြသွားမှာဖြစ်ပါတယ်။

.
■ ဘယ်သူတွေ ပြိုင်ကြမှာလဲ
.
ဒီပြိုင်ပွဲကို မြန်မာအမျိုးသမီးအသင်း၊ ထိုင်းအမျိုးသမီးအသင်းနဲ့ ဥဇဘက်ကစ္စတန် အမျိုးသမီးအသင်းတို့ ပါဝင် ယှဉ်ပြိုင်ကြမှာဖြစ်ပြီး AYA Tri Nation Cup လို့ နာမည်ပေးထားတာပါ။
.
■ ဘယ်နေ့တွေ ပြိုင်ကြမလဲ
.
ပြိုင်ပွဲကို ဇွန်လ ၃ ရက်နေ့ ကနေ စတင် ကျင်းပမှာ ဖြစ်ပြီး ဇွန်လ ၃ ရက်နေ့မှာ မြန်မာနဲ့ ဥဇဘက်ကစ္စတန် အသင်း၊ ဇွန်လ ၆ ရက်မှာ ထိုင်းနဲ့ ဥဇဘက်ကစ္စတန်အသင်း၊ ဇွန်လ ၉ ရက်မှာ မြန်မာနဲ့ ထိုင်းအသင်းတို့ ယှဉ်ပြိုင်ကစားကြမှာ ဖြစ်ပါတယ်။
.
■ လက်မှတ်တွေ ဘယ်လို ဝယ်ရမလဲ
.
မြန်မာနိုင်ငံက အိမ်ရှင်အဖြစ် လက်ခံကျင်းပမယ့် AYA Bank ၃ နိုင်ငံဖိတ်ခေါ် ဘောလုံးပြိုင်ပွဲရဲ့ လက်မှတ်တွေကို မေလ ၃၁ ကနေ စတင်ရောင်းချသွားမယ့် အကြောင်း မြန်မာနိုင်ငံ ဘောလုံးအဖွဲချုပ်က ကြေညာထားပါတယ်။
မြန်မာအမျိုးသမီးအသင်း ပါဝင်ယှဉ်ပြိုင်မယ့် ၃ နိုင်ငံ ဖိတ်ခေါ်ပြိုင်ပွဲက ဇွန်လ ၃ ရက်မှာ စတင်မှာ ဖြစ်ပေမယ့်လည်း ကြိုတင်လက်မှတ်တွေ အဖြစ် မေလ ၃၁ ရက်ကနေစပြီး ဝယ်ယူနိုင်မှာပါ။
လက်မှတ်တွေကို မေလ ၃၁၊ ဇွန်လ ၁ ရက်နေ့နဲ့ ၂ ရက်နေ့တွေမှာ ကြိုတင် ရောင်းချပေးသွားမှာ ဖြစ်ပြီး မနက် ၁၀ နာရီကနေ ညနေ ၄ နာရီအထိ ဘောလုံးအဖွဲ့ချုပ် ရုံးမှာ သွားရောက်ဝယ်ယူလို့ ရတဲ့အကြောင်း အသိ ပေးထားပါတယ်။
.
လက်မှတ် ဈေးနှုန်းတွေကတော့ ရိုးရိုးတန်း ၂၀၀၀ ကျပ်နဲ့ အထူးတန်း ၅၀၀၀ ကျပ်တို့ ဖြစ်ပြီး အွန်လိုင်းကနေလည်း ဝယ်ယူလို့ ရတဲ့အကြောင်း ဘောလုံးအဖွဲ့ချုပ်က ကြေညာထားပါတယ်။
.
■ နောက်ဆုံးရသတင်းတွေ အနေနဲ့ ဘာတွေ ရှိလဲ
.
AYA Tri Nation Cup သုံးနိုင်ငံ ဖိတ်ခေါ်ပြိုင်ပွဲအတွက် အမျိုးသမီးအသင်း လူစာရင်းမှာ ထပ်တိုး ကစားသမားတွေ ပါဝင်လာခဲ့ပါတယ်။
.
ပြီးခဲ့တဲ့ ရာသီတုန်းက မြန်မာအမျိုးသမီးလိဂ်ပြိုင်ပွဲမှာ အကောင်းဆုံး ခြေစွမ်း ပြခဲ့ကြပြီး ပရိသတ်အားပေးမှုကို ရရှိခဲ့ကြတဲ့ ရန်ကုန်ယူနိုက်တက်အသင်းရဲ့နောက်ခံလူ နန်းစနေမ နဲ့ ISPE အသင်းရဲ့ ကွင်းလယ်လူ နန်းဟွင်းလိုင်း တို့ ရွေးချယ်ခြင်း ခံခဲ့ရတာပါ။
.
နှစ်ယောက်စလုံးက သက်ဆိုင်ရာအသင်းတွေမှာ ခြေစွမ်းပြ ကစားခဲ့ကြပြီး လက်ရွေးစင်အသင်းဆီ ရောက်လာခဲ့ကြပေမယ့် လက်ရှိ ပွဲထွက် လူစာရင်းကို ဝင်တိုးပြီး နေရာ ယူနိုင်မလားဆိုတာကတော့ စောင့်ကြည့်ရမှာပါ။
.
ပရိသတ်တွေကတော့ ISPE ရဲ့ ကွင်းလယ်လူ နန်းဟွင်းလိုင်း က ရုန်းအား၊ တိုးအား ကောင်းသလို သူ့ရဲ့ ခြေစွမ်းကို အဓိက စောင့်ကြည့်သွားရမယ်လို့ မှတ်ချက်ပေးနေကြပြီး မြင့်မားတဲ့ အရပ်အမောင်းနဲ့ ရန်ကုန်ယူနိုက်တက် နောက်ခံလူ နန်းစနေမ ကတော့ အသင်းရဲ့ လက်ရှိခံစစ်မှာ ကစားနေတဲ့ ဖြူဖွေး၊ မေသက်မွန်မြင့် တို့ကို ကျော်ဖို့ မလွယ်တဲ့အကြောင်း မှတ်ချက်တွေ ပေးနေကြပါတယ်။
.