စလော့ဂိမ်း လောင်းကစားသူများကိုပါ ဖမ်းဆီးမှုများ ရှိလာ

ရှမ်းပြည်နယ် တောင်ပိုင်းရှိ မြို့နယ်အချို့၌ အွန်လိုင်းလောင်းကစား ဖြစ်သည့် စလော့ဂိမ်း လောင်းကစား ပြုလုပ်သူများကိုပါ ဖမ်းဆီးနေမှုများ ရှိလာနေကြောင်း သိရသည်။

.

“ စလော့ ဆော့တာလည်း လောင်းကစားပဲလေ၊ ဖမ်းလို့ရတယ်၊ ဖမ်းခွင့် ရှိတယ်။ အောင်ပန်းတို့ ရွာငံတို့ဘက်တွေမှာ ဖမ်းတာ ကြားရတယ်။ ကျန်တဲ့နေရာတွေလည်း ဖမ်းတော့ ဖမ်းမယ် ထင်တယ်။ သတင်းတော့ မကြားမိဘူး၊ ကိုယ် မသိတာ ဖြစ်မှာပါ။” ဟု တာဝန်ရှိသူ တစ်ဦးက ပြောသည်။

.

ပြီးခဲ့သည့် မေလ ၂၆ ရက်၊ ညနေပိုင်းက အောင်ပန်းမြို့၊ အမှတ် ၃ ရပ်ကွက်၊ ဓမ္မာရုံလမ်းတွင် အမျိုးသား တစ်ဦးကို ရဲတပ်ဖွဲ့ဝင်များက စစ်ဆေးစဉ် ၎င်းကိုင်ဆောင်ထားသော လက်ကိုင်ဖုန်း အတွင်းမှ စလောဂိမ်း လောင်းကစားမှုများ ပြုလုပ်ထားသည်ကို တွေ့ရှိ၍ ဖမ်းဆီးကာ အောင်ပန်းမြို့မရဲစခန်းတွင် လောင်းကစားဥပဒေ ပုဒ်မ ၁၅(က) ဖြင့် အမှုဖွင့်ထားကြောင်း သိရသည်။

.

ယင်းကဲ့သို့ ဖမ်းဆီးမှုနှင့် ပတ်သက်၍ ပြည်သူ တစ်ဦးက “ဒီလိုမျိုး ဖမ်းတာက ကောင်းတဲ့ ကိစ္စပါပဲ၊ စလော့ ဆော့လို့ စီးပွား တက်တယ်ဆိုတာ မရှိပါဘူး၊ စီးပွား ပျက်တာပဲ ကြားဖူးပါတယ်။ ခုက ကိုယ့်ယောကျ်ား/မိန်းမ၊ သား/သမီး စလော့ဆော့မှာ ကြောက်နေရတဲ့ ကာလမှာ ခုလို ဖမ်းတာတွေ ရှိလာတော့ နည်းနည်းတော့ ထိန်းသွားမယ် ထင်ပါတယ်။”ဟု ဆိုသည်။

.

ယင်းကဲ့သို့ ဖမ်းဆီးခြင်းမှာ ကောင်းမွန်သည့် လုပ်ရပ်ဖြစ်သော်လည်း သာမန် ပြည်သူ တစ်ဦး၏ ကိုယ်ရေးကိုယ်တာ ကိစ္စရပ် ဖြစ်သော လက်ကိုင်ဖုန်းအား အဓမ္မ ရယူ စစ်ဆေးခြင်းမျိုး မပြုလုပ်ရန် လိုအပ်သကဲ့သို့ ငွေကြေး တောင်းယူခြင်းကဲ့သို့သော အဂတိကိစ္စရပ်များ မဖြစ်ရန်လည်း လိုအပ်သည်ဟု အကြံပြုသည်။
.
#KBZTai #Shan #AungBan #Slots