မိုင်းရှူး-မိုင်းစံဒေသတွင် တရားမဝင် တရုတ်နိုင်ငံသား ၁၈ ဦး ဖမ်းမိ

ရှမ်းပြည်နယ်တောင်ပိုင်း၊ မိုင်းရှူးမြို့နယ်၊ လွယ်ဆောင်ထောက်ကျေးရွာ အနီးတွင် မေလ ၁၅ ရက်က တရားမဝင် တရုတ်နိုင်ငံသား ၁၈ ဦး ဖမ်းဆီးရမိခဲ့ပြီး ယင်းနေ့တွင်ပင် မိုင်းရှူးမြို့နယ်၊ ဟိုပုံကျေးရွာ အနီး၌ အွန်လိုင်း လိမ်လည်လောင်းကစားမှုများ လုပ်ကိုင်ဆောင်ရွက်သည့် လုပ်ငန်းသုံးပစ္စည်းများ၊ အဆောက်အအုံ များအား သိမ်းဆည်း ရမိခဲ့ကြောင်း သိရသည်။
.
မိုင်းရှူးမြို့နယ်၊ မိုင်းရှူး-မိုင်းစံဒေသ၊ သံလွင်မြစ် အနောက်ဘက်ကမ်း တစ်လျှောက်၌ အွန်လိုင်းလိမ်လည် လောင်းကစားမှုများ လုပ်ကိုင်ဆောင်ရွက်မှုမရှိစေရေး လုံခြုံရေးတပ်ဖွဲ့ဝင်များ ပါဝင်သော ပူးပေါင်း အဖွဲ့က ရှာဖွေစစ်ဆေးမှုများဆောင်ရွက်ရာ မေ ၁၅ ရက် နံနက် ၉ နာရီခွဲခန့်က မိုင်းရှူးမြို့၏ အရှေ့တောင်ဘက်၂၆ ကီလိုမီတာခန့်အကွာ၊ လွယ်ဆောင်ထောက် ကျေးရွာ၏အရှေ့တောင်ဘက် ၁၁ ကီလိုမီတာခန့် သံလွင်မြစ် အနီး၌ တရားမဝင် ဝင်ရောက် နေထိုင်သည့် တရုတ်နိုင်ငံသား အမျိုးသား ၁၈ ဦးအား ဖမ်းဆီးရမိခဲ့ကြောင်း သိရသည်။
.

ထို့အပြင် လုံခြုံရေးတပ်ဖွဲ့ဝင်များ ပါဝင်သောပူးပေါင်းအဖွဲ့ တစ်ဖွဲ့သည် သံလွင်မြစ်ကမ်းတလျှောက်၌ ရှာဖွေစစ်ဆေးမှုများ ဆောင်ရွက်ခဲ့ရာ ယင်းနေ့ နံနက် ၁၁ နာရီခန့်တွင် မိုင်းစံမြို့၏ အရှေ့ဘက် ၂၆ ကီလိုမီတာခန့်အကွာ၊ ဟိုပုံရွာ၏ အရှေ့ဘက် ၉ ကီလိုမီတာခန့်အကွာ သံလွင်မြစ်အနောက်ဘက်ကမ်းဘေး၌ အွန်လိုင်းလိမ်လည်လောင်း ကစားမှုလုပ်ငန်းများလုပ်ဆောင်ရာတွင် အသုံးပြုသည့် ဖျက်ဆီးထားသော အဆောက်အအုံများကို ထပ်မံ သိမ်းဆည်းရမိခဲ့ကြောင်း သိရသည်။
.
အဆိုပါ ဖမ်းဆီးရမိသူများအား လိုအပ်သည့်စစ်ဆေးမှုများ ဆောင်ရွက်လျက်ရှိပြီး တရားဥပဒေနှင့်အညီ ထိထိရောက်ရောက် အရေးယူနိုင်ရေး လိုအပ်သည်များ ဆောင်ရွက်လျက်ရှိကြောင်းနှင့် နောက်ကွယ်မှ ပါဝင်ပတ်သက်သူများကိုလည်း စိစစ်ဖော် ထုတ်ကာ ဥပဒေနှင့်အညီ ထိရောက် ပြင်းထန်စွာအရေးယူနိုင်ရေး ဆောင်ရွက်သွားမည်ဖြစ်ကြောင်း သတင်းထုတ်ပြန်ထားသည်။
.
#KBZTai #Shan #MongHsu
.