ထိုင်းနိုင်ငံမှာ လူပြောအများဆုံး ဖြစ်နေတဲ့ သူဌေးသားလေးရဲ့ မိသားစုတွင်း အရှုပ်တော်ပုံ

ထိုင်းနိုင်ငံတွင်းမှာ လတ်တလော လူပြော အများဆုံးဖြစ်နေတဲ့အကြောင်းက ထိုင်းရဲ့ နာမည်ကြီး Singha Beer လုပ်ငန်းစုက သူဌေးသားလေးရဲ့ မိသားစုတွင်း လိင်အနိုင်ကျင့်ခံရမှုပါ။ ထိုင်းနိုင်ငံရဲ့ ၁၅ ခုမြောက် အချမ်းသာဆုံး မိသားစုအတွင်းမှာ ဒီလိုမျိုးတွေ ဖြစ်နေတယ်ဆိုတာကို လူတွေက ယုံကြည်နိုင်ဖို့ ခက်နေကြပေမယ့် ကာယကံရှင်ကို ယ်တိုင်က ဖွင့်ပြောလာပြီးတဲ့နောက် ဆိုရှယ်မီဒီယာတွေ အပေါ်မှာ ဒီအကြောင်းက ပလူပျံနေခဲ့တာပါ။

.
Singha အမှတ်တံဆိပ်ကို တည်ဆောင်ခဲ့တဲ့ ဘီလီယံနာ မိသားစုရဲ့ စတုတ္တမြောက် မျိုးဆက်ဝင် ဖြစ်တဲ့ သီယာနွတ် စကော့တ် က သူအသက် ငယ်ရွယ်စဉ် ဆယ်ကျော်သက်အရွယ်မှာ အကိုဖြစ်သူ ဆူနစ် ရဲ့ လိင်ပိုင်းဆိုင်ရာ စော်ကားမှုကို ထပ်တလဲလဲ ခံခဲ့ရတဲ့အကြောင်း ဖွင့်ဟထားတဲ့ ဗီဒီယိုဖိုင် တစ်ခုကို ဒီလအတွင်းမှာပဲ အင်တာနက်ပေါ် တင်သွားခဲ့တာ ဖြစ်ပါတယ်။
.
စကော့တ်ရဲ့ အကိုဖြစ်တဲ့ ဆူနစ်က ဒီစွပ်စွဲချက်တွေကို ပြန်လည် ငြင်းဆိုခဲ့ပေမယ့်လည်း စင်ဂါဘီယာရဲ့ မိခင်ကုမ္ပဏီ ဖြစ်တဲ့ Boonrawd Brewery က ဆူနစ်ကို ကုမ္ပဏီရဲ့အမှုဆောင် ရာထူးကနေ ထုတ်ပယ်လိုက်ပါပြီ။
.
စကော့တ်နဲ့ ဆူနစ်တို့ဟာ အသက် ၁ နှစ်ကျော်သာ ကွာခြားတဲ့ ညီအကိုတွေ ဖြစ်ကြပြီး စကော့တ်ရဲ့ အသက် ၉ နှစ်ကနေ ၁၃ နှစ်အရွယ်အတွင်းမှာ သူ့အကို ကျောင်းအိပ်ဆောင်ကနေ ပြန်လာတိုင်း လိင်ပိုင်းဆိုင်ရာ စော်ကားခံခဲ့ရတာ ဖြစ်တယ်လို့ သူ့ရဲ့အင်တာဗျူးမှာ ပြောသွားခဲ့တာပါ။
.
စကော့တ်က ဒီကိစ္စကို ပြီးခဲ့တဲ့ ၃ နှစ်လောက်တုန်းက သူ့ရဲ့ မိသားစုဝင်တွေကို ပြောပြခဲ့ပေမယ့်လည်း မိသားစုက လျော်ကြေးငွေ ပေးမယ်ဆိုပြီး နှစ်သိမ့်ခဲ့တာကြောင့် ထုတ်မပြောဖို့ လက်ခံခဲ့တာပါ။ ဒါပေမယ့် ဒီနှစ်ထဲမှာပဲ မြေယာပိုင်ဆိုင်မှု အငြင်းပွားမှု တစ်ခုဖြစ်ရာကနေ စကော့တ်ရဲ့မိခင်က သူ့ကို တရားစွဲခဲ့ပြီးတဲ့နောက် စကော့တ်က ဒီဖြစ်ရပ်ကို လူသိရှင်ကြား လုပ်ပစ်ဖို့ ဆုံးဖြတ်ခဲ့တာ ဖြစ်ပါတယ်။
.
ထိုင်းနိုင်ငံရဲ့ နာမည်ကြီး ဘီယာဖြစ်တဲ့ ဆင်ဂါ ဟာ ပရီးမီးယားလိဂ်ကလပ် ချယ်လ်ဆီး၊ ဖော်မြူလာဝမ်းအသင်း Haas တို့နဲ့ မိတ်ဖက်အဖြစ် ရပ်တည်နိုင်ခဲ့ပြီး ကမ္ဘာ့ဘီယာဈေးကွက်ထဲမှာ နေရာတစ်ခုကို သိမ်းပိုက်ခဲ့တာပါ။
.
စကော့တ်ရဲ့ လိင်ပိုင်းဆိုင်ရာ စော်ကားခံရမှု ဗီဒီယို ထွက်ပေါ်လာပြီးတဲ့ နောက်မှာ ထိုင်းနိုင်ငံရဲ့ နာမည်ကျော် လူပုဂ္ဂိုလ်တွေနဲ့ အနုပညာရှင်တွေကလည်း သူတို့ရဲ့ လိင်ပိုင်းဆိုင်ရာ အစော်ကားခံခဲ့ရမှုတွေကို လူမှုကွန်ယက်ပေါ်မှာ မျှဝေလာခဲ့ကြပါတယ်။
.
ထိုင်းနိုင်ငံရဲ့ အကျော်ကြားဆုံးတွေထဲက တစ်ယောက်ဖြစ်တဲ့ ဂေါက်ကွင်းပိုင်ရှင် သူဌေးကြီးရဲ့ သမီး ခွန်ထရာကူ က သူမရဲ့ အသက် ၁၁ နှစ်အရွယ်မှာ ကိုယ်ပိုင်ယာဉ်မောင်းရဲ့ အဓမ္မကျင့်မှုကို ခံခဲ့ရကြောင်းနဲ့ ကိုယ်ဝန် ရရှိခဲ့ပြီး ဖျက်ချခဲ့ရတဲ့ အကြောင်း ဖွင့်ဟခဲ့သလို၊ အင်ဖလူရန်ဆာ တစ်ယောက်ဖြစ်တဲ့ ဆရီရတ် ကလည်း သူ့ရဲ့အသက် ၁၉ နှစ်အရွယ်မှာ အသက် ၅၀ အရွယ် အထက်လူကြီးရဲ့ လိင်ပိုင်းဆိုင်ရာ‌ စော်ကားမှုကို ခံခဲ့ရဖူးတဲ့အကြောင်း ထုတ်ဖော်ပြောဆိုခဲ့ပါတယ်။

.
Source : South China Morning Post