စာပေလောကရဲ့ အော်စကာဆုလို့ ရည်ညွှန်းတဲ့ Booker Prize ဆုကို ထိုင်ဝမ်စာရေးဆရာဆွတ်ခူး

.

၂၀၂၆ ခုနှစ်၊ မေလ ၂၀ ရက်

.

အင်္ဂလိပ်ဘာသာနဲ့ထုတ်ဝေတဲ့ ဝတ္တုတွေရဲ့အော်စကာဆုလို့ တင်စားကြတဲ့ Booker Prize ဆုကို ထိုင်ဝမ် စာရေးဆရာ ယန်ရွှမ်ဇီနဲ့ ဘာသာပြန် လင်ကင်း တို့က ရရှိသွားခဲ့ကြပါတယ်။ ယန်ရွှမ်ဇီ ရဲ့ Taiwan Travelogue စာအုပ်က ဒီဆုကို ရရှိသွားခဲ့တာဖြစ်ပြီး ဒီဝတ္တုက ကိုလိုနီခေတ်နောက်ခံအကြောင်းအရာတွေ၊ အစားအသောက်အကြောင်းတွေနဲ့ ဟာသဆန်ဆန်ရေးသားထားတဲ့ စာအုပ်တစ်အုပ်ပါ။

.

.

လန်ဒန်မြို့မှာရှိတဲ့ Tate Modern ပြတိုက်မှာ ကျင်းပခဲ့တဲ့ ဆုပေးပွဲမှာ ဒီဆုကိုပေးအပ်ခဲ့တာဖြစ်ပြီး ကမ္ဘာ တစ်ဝှမ်းက အင်္ဂလိပ်ဘာသာပြန်စာအုပ်တွေထဲမှာ အကောင်းဆုံးလို့ သတ်မှတ်ခံရတဲ့ စာအုပ်ဖြစ်ခဲ့တာပါ။

.

Taiwan Travelogue ဟာ မန်ဒရင်းတရုတ်ဘာသာကနေ အင်္ဂလိပ်ဘာသာကို ပြန်ဆိုခဲ့တဲ့ စာအုပ်တွေထဲမှာ ပထမဆုံး ဆုရရှိတဲ့စာအုပ်တစ်အုပ်ဖြစ်ခဲ့ပြီး အသက် ၄၁ နှစ်ရှိပြီဖြစ်တဲ့ စာရေးဆရာမ ယန် ဟာ ဒီဆုကို ရရှိခဲ့တဲ့ ပထမဆုံး ထိုင်ဝမ်လူမျိုးစာရေးဆရာလည်း ဖြစ်လာခဲ့ပါတယ်။

.

ဒီစာအုပ်က ဂျပန်အုပ်ချုပ်မှုအောက်မှာရှိခဲ့တဲ့ ထိုင်ဝမ်ရဲ့ ၁၉၃၀ နှစ်တွေကို နောက်ခံထားခဲ့ပြီး ဂျပန်ခရီးသွား မှတ်တမ်းတစ်ခုကို ရှာဖွေတွေ့ရှိပြီး ဘာသာပြန်ထားသလိုမျိုး ပုံဖော်ထားတာပါ။ စာအုပ်ထဲမှာ ကိုလိုနီ နယ်မြေအတွင်း ခရီးသွားလာမှုတွေ၊ အစားအသောက် စွန့်စားခန်းတွေအကြောင်းတွေကိုလည်း ဆက်စပ်ပုံဖော်ထားပါသေးတယ်။

.

ဒိုင်အဖွဲ့ဥက္ကဋ္ဌ နာတာရှာဘရောင်းက “ဒီစာအုပ်က စာဖတ်သူကို အံ့အားသင့်စေမယ့် စာအုပ်တစ်အုပ်ပါ။ အချစ်ဇာတ်လမ်းတစ်ပုဒ်အဖြစ် ကောင်းကောင်းပုံဖော်နိုင်ခဲ့သလို ကိုလိုခေတ်နောက်ပိုင်းကို ထက်မြက်စွာနဲ့ ဝေဖန်သုံးသပ်ထားတဲ့ ဝတ္တုတစ်ပုဒ်လို့လည်း ကျွန်မတို့သုံးသပ်လို့ရပါတယ်” လို့ ဆိုပါတယ်။

.

ယန် ရဲ့ဒီစာအုပ်ဟာ ပြင်သစ်ဝတ္တုရေးဆရာ မာရီ ရဲ့ “မြို့ဆင်ခြေဖုံးက မိန်းမဆိုးအကြောင်း” ဝတ္တုနဲ့  ဘရာဇီး စာရေးဆရာ အန်နာပေါ်လာ ရဲ့ အကျဉ်းထောင်ကိုလိုနီ အကြောင်း ဝတ္တုတွေကို ကျော်ဖြတ်ပြီး ဆုရသွား ခဲ့တာလည်းဖြစ်ပါတယ်။

.

မန်ဂါနဲ့ ဗီဒီယိုဂိမ်း ဇာတ်ညွှန်းတွေကိုလည်း ရေးသားတဲ့ ယန် အတွက်တော့ ဒီစာအုပ်ဟာ အင်္ဂလိပ်ဘာသာကို ပထမဆုံးပြန်ဆိုခံရတဲ့ စာအုပ်တစ်အုပ်ဖြစ်ပြီး ထိုင်ဝမ်-အမေရိကန် ဘာသာပြန်သူ လင်ကင်း က ဘာသာပြန် ပေးခဲ့တာဖြစ်ပါတယ်။

.

သူတို့နှစ်ဦီးဟာ ဆုကြေးအနေနဲ့ ပေါင် ၅၀၀၀၀ ရရှိခဲ့ကြပြီး ဒီဆုငွေကို နှစ်ဦးမျှဝေယူရမှာဖြစ်ပါတယ်။

.