ချွန်ဘူရီမှာ ဈေးအကြီးဆုံးအိမ်တစ်လုံးကိုငှားပြီး၊ တားမြစ် Vape ထုတ်လုပ်နေတဲ့ တရုတ် ၂ ယောက် အဖမ်းခံရ

.

၂၀၂၆ ခုနှစ်၊ မေလ ၂၁ ရက်

.

ထိုင်းနိုင်ငံ၊ ချွန်ဘူရီခရိုင်ထဲက ဈေးအကြီးဆုံး အိမ်တစ်လုံးကို ငှားရမ်းပြီး တားမြစ်ထားတဲ့ “Zombie Drug” လို့ခေါ်တဲ့ Vape ထုတ်လုပ်နေတဲ့ တရုတ် လူမျိုး ၂ ယောက်ကို ထိုင်းရဲတပ်ဖွဲ့က ဖမ်းဆီးလိုက်ပါတယ်။

.

.

ဖမ်းဆီးမှုကို ပြီးခဲ့တဲ့ အင်္ဂါနေ့က ဘန်လာမွန်ခရိုင်၊ ဟွိုင်ရိုင်အုပ်စုမှာ ပြုလုပ်ခဲ့တာပါ။ အိမ်နီးချင်းတချို့ရဲ့ တိုင်ကြားမှုကနေ ဝင်ရောက်စစ်ဆေးမှု ပြလုပ်ဖို့ ဝရမ်းတောင်းခံခဲ့ရတာ ဖြစ်ပြီး ငှားရမ်းထားတဲ့ အိမ်တစ်လုံးအတွင်းမှာ တရုတ်အမျိုးသားနှစ်ယောက်က ဓာတုပစ္စည်းတွေ ရောစပ်နေကြတဲ့အကြောင်းနဲ့ သံသယဖြစ်ဖွယ်ကောင်းတဲ့အကြောင်း အနီးအနားနေသူတွေက တိုင်ကြားခဲ့ကြပါတယ်။

.

တရားရုံးအမိန့်နဲ့ ဝင်ရောက်စီးနင်းချိန်မှာတော့ နှစ်ထပ်အိမ်အတွင်းမှာ ပလတ်စတစ်ပုံးတွေ၊ အိတ်တွေနဲ့ ထည့်ထားတဲ့ ဓာတုပစ္စည်းတွေကို အများအပြားတွေ့ခဲ့ရတာပါ။ နေအိမ်ရဲ့အပေါ်ထပ်ကိုတော့ မှန်ခန်းတွေနဲ့ ပြန်လည်ကာရံထားပြီး ဓာတုပစ္စည်းပြုပြင်တဲ့ စက် ၃ လုံး ပါဝင်တဲ့ ဓာတ်ခွဲခန်းတစ်ခုကိုလည်း တွေ့ခဲ့ရတာပါ။

.

ဒီစက်တွေက ထိုင်းနိုင်ငံထဲမှာ ပိတ်ပင်ထားတဲ့ “Zombie Drug” လို့ခေါ်တဲ့ မူးယစ်ဆေးတစ်မျိုးကို ထုတ်လုပ်တဲ့ စက်တွေဖြစ်နေပြီး ထိုင်းနိုင်ငံတွင်းအသုံးများလာတဲ့ မူးယစ်ဆေး Vape တွေနဲ့ ဆက်စပ်မှု ရှိနေတာပါ။

.

ဒီ အိမ်မှာနေထိုင်တဲ့ အသက် ၄၇ နှစ်အရွယ် ဇောင်းနဲ့ အသက် ၂၄ နှစ်အရွယ် တန်ဇီ တို့ကို ဓာတ်ခွဲခန်းထဲမှာ အလုပ်လုပ်နေရင်း ဖမ်းဆီးမိခဲ့တာပါ။သူတို့နှစ်ယောက်က သူတို့ကိုယ်တိုင်လည်း ဝန်ထမ်းတွေဖြစ်ပြီး ဒီအိမ်ကိုစောင့်ဖို့နဲ့ ဓာတုပစ္စည်းရောစပ်စက်တွေကို ကြီးကြပ်ဖို့ ငှားရမ်းခံထားရတာလို့ ဆိုပါတယ်။

.

ဆက်လက်စစ်ဆေးမှုတွေအရ နေအိမ်ရဲ့အနောက်ဖက် ကီလိုမီတာ ၂၀ လောက်မှာ ဂိုဒေါင်တစ်လုံးကို ရှာဖွေ တွေ့ရှိခဲ့ပြီး ဓာတုပစ္စည်းတွေထည့်ထားတဲ့ ကွန်တိန်နာတွေ၊ အလေးချိန်တိုင်း ကိရိယာတွေနဲ့ မူးယစ်ဆေး ထုတ်တဲ့နေရာမှာ အသုံးပြုတဲ့ ဓာတ်ခွဲခန်းသုံးပစ္စည်းတွေကို ထပ်ပြီးတွေ့ခဲ့တာပါ။

.

ရဲတပ်ဖွဲ့ကတော့ ဒီ စီးနင်းမှုဟာ ပြီးခဲ့တဲ့ ၂ လအကြာက နွန်ပလာလိုင် အတွင်း အငှားအိမ်တစ်လုံးမှာ ဓာတုပစ္စည်းတွေ သိမ်းဆည်းရရှိတဲ့အမှုနဲ့ ဆက်စပ်နေတဲ့အကြောင်း ပြောဆိုထားပါတယ်။

.

ထိုင်းနိုင်ငံထဲမှာ‌တော့ တရုတ်လူမျိုးတွေက ဆက်တိုက်ဆိုသလို ဖမ်းဆီးခံနေရပြီး အဲဒီဖမ်းဆီးခံရမှုတွေမှာ သူတို့အိမ်နီးချင်းတွေရဲ့ တိုင်ကြားမှုတွေက အဓိက ကျနေခဲ့ပါတယ်။ ပြီးခဲ့တဲ့ရက်ပိုင်းအတွင်းမှာပဲ တရုတ် VIP ဖဲဝိုင်းတစ်ခုကို အိမ်နီးချင်းတွေ တိုင်ကြားတာကြောင့် အဖမ်းခံခဲ့ကြရပါသေးတယ်။

.