သစ်ပင်ချစ်သူများအဖွဲ့က အရှေ့ဘက်တောင်ကြောပေါ်တွင် သစ်စေ့များ ကြဲဖြန့် စိုက်ပျိုးမည်

တောင်ကြီးမြို့၊ အရှေ့ဘက်တောင်ကြောပေါ်တွင် လာမည့် ဇွန်လ ၁၄ ရက်၌ သစ်ပင်ချစ်သူများအဖွဲ့ တောင်ကြီးနှင့် ပတ်ဝန်းကျင် ထိန်းသိမ်းရေးအဖွဲ့များ စုပေါင်းကာ သစ်စေ့များ ကြဲဖြန့် စိုက်ပျိုးသွားမည် ဖြစ်ကြောင်း သိရသည်။
.
“Volunteer တွေတော့ ပါ ပါတယ်။ တချို့ကလည်း အဆင်ပြေတဲ့အချိန် လာပေါင်းမယ်လို့ ပြောထားတာပေါ့။ သစ်တောဌာနကိုလည်း ပြောထားပါတယ်။ Seed Ball အလုံးတော့ မလုပ်ထားဘူး။ မျိုးစေ့အတိုင်းပဲ ကြဲမှာပါ။ Seed Ball က အပင် ပေါက်ဖို့ ခဲယဉ်းတယ်။ သေသွားတာလည်း များတယ်။ အဲဒါကြောင့် မျိုးစေ့ အတိုင်းပဲ ကြဲမှာပါ” ဟု သစ်ပင်ချစ်သူများအဖွဲ့ တောင်ကြီးမှ တာဝန်ရှိသူက ပြောသည်။
.
ထိုသို့ မျိုးစေ့ချ စိုက်ပျိုးရာတွင် ချယ်ရီ၊ စိန်ပန်းနီ၊ စိန်ပန်းပြာ၊ ငုစပ်ချယ်ရီနှင့် မာတာကွတ် အပြင် အခြား မျိုးများကို စိုက်ပျိုးသွားမည်ဖြစ်ပြီး တောင်ကြီးမြို့၏ သင်္ကေတဖြစ်သော ချယ်ရီပင် မျိုးစေ့များကို အများဆုံး စိုက်ပျိုးသွားမည်ဖြစ်ကာ ပျိုးပင်များကိုလည်း စိုက်ပျိုးသွားမည်ဖြစ်ကြောင်း သိရသည်။
.
“လူမရောက်တဲ့နေရာ၊ လူမသွားနိုင်တဲ့ နေရာတော့ မျိုးစေ့ကြဲမယ်။ ကျန်တဲ့နေရာတော့ အပင်တွေ စိုက်သွား မှာပါ။ စိုက်ဖို့ကတော့ အပင် ၁၀၀ လောက် ရှိပါတယ်” ဟု ၎င်းက ဆက်လက်ပြောဆိုခဲ့သည်။
.
သစ်ပင်ချစ်သူများအဖွဲ့-တောင်ကြီးအနေဖြင့် ၂၀၁၅ ခုနှစ်ကတည်းက သစ်ပင်စိုက်ပျိုးရေး၊ မြေအောက်ရေ ရရှိရေး၊ သဘာဝ ပတ်ဝန်းကျင်ဆိုင်ရာ လှုပ်ရှားမှုများတွင် အခြားသော အသင်းအဖွဲ့များ၊ ဌာနဆိုင်ရာများနှင့် လက်တွဲ ပူးပေါင်းဆောင်ရွက်နေခြင်းဖြစ်ပြီး တောင်ကြီးမြို့ပေါ် အပြင် အနီးပတ်ဝန်းကျင်ရှိ မြို့ရွာများတွင် လည်း သဘာဝပတ်ဝန်းကျင်ထိန်းသိမ်းရေးဆိုင်ရာ လုပ်ငန်းများကို ဆောင်ရွက်လျက်ရှိကြောင်း သိရသည်။
.
#KBZTai #Shan #Taunggyi