ပြသချိန် ၁၀ ရက်အတွင်း အရင်းကျေသွားတဲ့ ဇွန်ဘီဇာတ်ကား “The Colony”

.

၂၀၂၆ ခုနှစ်၊ ဇွန်လ ၃ ရက်

.

တောင်ကိုရီးယားနိုင်ငံအတွင်းမှာ လူကြိုက်အများဆုံး ရုပ်ရှင်ကားဖြစ်နေတဲ့ The Colony ကတော့ ရုပ်ရှင်ရုံ တင်ပြီး ပြသချိန် ၁၀ ရက်အတွင်းမှာပဲ ထုတ်လုပ်မှုကုန်ကျစရိတ်တွေအားလုံး အရင်းကျေသွားခဲ့ပြီလို့ သိရပါတယ်။

.

.

ကိုရီးယား ရုပ်ရှင်ကောင်စီရဲ့ အချက်အလက်တွေ အရတော့ ဇွန်လ ၂ ရက်နေ့မှာ Colony ရုပ်ရှင်ကို ကိုရီးယားတစ်ခွင် ကြည့်ရှုသူပေါင်း ၃ သန်းခွဲ ကျော်သွားခဲ့ပြီး Box Office ရဲ့ နံပတ် ၁ နေရာကို ဆက်လက် ထိန်းသိမ်းထားနိုင်ခဲ့တယ်လို့ သိရတာပါ။

.

ဒီရုပ်ရှင်ကို မေလ ၂၁ ရက်နေ့မှာ စတင်ရုံတင်ခဲ့တာဖြစ်ပြီး Train To Busan က စလို့ ဇွန်ဘီကားဆိုရင် အသည်းအသန် အားပေးကြတဲ့ ကိုရီးယား ဇွန်ဘီပရိသတ်တွေအတွက် စိတ်ကြိုက်ဇာတ်ကားတစ်ကား ဖြစ်ခဲ့တာပါ။

.

ဒါ့အပြင် Colonyက ၂၀၂၆ ခုနှစ်အတွင်း ထွက်ရှိခဲ့တဲ့ ရုပ်ရှင်တွေထဲမှာ ပရိသတ် ၃ သန်းခွဲ အရေအတွက်ကို အမြန်ဆုံး ရောက်ရှိသွားခဲ့တဲ့ ရုပ်ရှင်အဖြစ်လည်း စံချိန်တင်ခဲ့ပြီး အရင်တုန်းက နံပတ်တစ်ဖြစ်ခဲ့တဲ့ The King’s Warden ကိုပါ ကျော်ဖြတ်သွားခဲ့တာပါ။

.

ဒီရုပ်ရှင်မှာ လက်ရှိအခွန်ပြသနာတွေနဲ့ ရင်ဆိုင်နေရတဲ့မင်းသား ဂျီချန်ဝု ပါဝင်သရုပ်ဆောင်ထားတဲ့ ရုပ်ရှင်ဖြစ်ပြီး ဂျွန်ဂျီဟွန်း၊ ရှင်ဟွန်ဘင်း တို့နဲ့အတူ နာမည်ကြီးသရုပ်ဆောင်တွေ ပါဝင်တာပါ။

.

ဇာတ်လမ်းအကျဉ်းကတော့ မျိုးဗီဇပြောင်းလဲနေတဲ့ ဇွန်ဘီဗိုင်းရပ်စ်တစ်မျိုးကြောင့် ကူးစက်ခံရသူတွေ များလာချိန် အဆောက်အဦးတစ်ခုထဲမှာ ပိတ်မိနေတဲ့ အသက်ရှင်ကျန်နေသူတွေရဲ့ အကြောင်းပါ။ ကူးစက်ခံရသူတွေက ခန့်မှန်းလို့မရတဲ့ ပုံစံတွေနဲ့ ပြောင်းလဲလာကြတာကြောင့် အသက်ရှင်ကျန်နေတဲ့ သူတွေက မသေအောင် ရုန်းကန်ရတဲ့ ရုပ်ရှင်လည်း ဖြစ်ပါတယ်။

.

ဒီရုပ်ရှင်ကို မြန်မာပြည်တွင်းက ရုပ်ရှင်ရုံကြီးတွေမှာလည်း ပြသနေပြီဖြစ်ပါတယ်။

,

Source – Soompi

.