ကြောင်တစ်ကောင်ကြောင့် ပတ္တရားကွန်ဒို မီးလောင်

.

၂၀၂၆ ခုနှစ်၊ ဩဂုတ်လ ၄ ရက်

.

ထိုင်းနိုင်ငံ၊ ပတ္တရားမြို့မှာရှိတဲ့ ကွန်ဒိုတစ်လုံးမှာ တနင်္လာနေ့ မနက်ပိုင်းက ကြောင်တစ်ကောင်ကြောင့် မီးလောင်မှု ဖြစ်ပွားခဲ့ပြီး နေထိုင်သူတွေကို အရေးပေါ်ရွှေ့ပြောင်းပေးခဲ့ရပါတယ်။

.

.

မီးလောင်မှုကြောင့် အခန်းအတွင်းမှာ ပျက်စီးဆုံးရှုံးမှုတွေ ဖြစ်ခဲ့ပြီး ထိခိုက်ဒဏ်ရာရသူတော့ မရှိခဲ့တဲ့ အကြောင်း အာဏာပိုင်တွေက ပြောဆိုခဲ့ပါတယ်။

.

တနင်္လာနေ့မနက် ၂ နာရီခွဲကျော်မှာ ပတ္တရား၊ ဘန်လမွန်ဒေသမှာရှိတဲ့ ကွန်ဒိုရဲ့ အဆောက်အအုံ D ၊ ၆ ထပ်မှာ မီးလောင်မှုဖြစ်နေတဲ့အကြောင်း ရဲတပ်ဖွဲ့က သတင်းရခဲ့ပြီးတဲ့နောက် မီးသတ်တပ်ဖွဲ့၊ သဘာဝ ဘေးကယ်ဆယ်ရေးအဖွဲ့တွေနဲ့ စေတနာ့ဝန်ထမ်းကယ်ဆယ်ရေးအဖွဲ့တွေနဲ့အတူ မီးလောင်တဲ့နေရာဆီ ရောက်လာခဲ့ကြတာပါ။

.

အဆောက်အအုံတစ်ခုလုံးမှာ မီးခိုးတွေ ပျံ့နှံ့နေခဲ့ပြီး မီးကူးစက်မှု မဖြစ်ဖို့အတွက် မီးသတ်တွေက ကြိုးစားခဲ့ကြရတာပါ။ ထိုင်းနဲ့ နိုင်ငံခြားသားနေထိုင်သူတွေ အားလုံးကို ဘေးလွတ်ရာ ရွှေ့ပြောင်းပေးခဲ့ ရသလို ၂ နာရီလောက် ငြှိမ်းသတ်ပြီးတဲ့နောက် မီးလောင်မှုကို ထိန်းချုပ်နိုင်ခဲ့ပါတယ်။

.

မီးလောင်ခဲ့တဲ့ အခန်းပိုင်ရှင်က မီးခိုးနံ့ကြောင့် အိပ်ယာက နိုးလာခဲ့တဲ့အကြောင်း ပြောဆိုခဲ့ပြီး မီးဖိုချောင်မှာရှိတဲ့ လျှပ်စစ်မီးဖိုးအနီးမှာ မီးတောက်တွေကို တွေ့ခဲ့ရတယ်လို့ ပြောခဲ့တာပါ။ အဲဒီနောက်မှာတော့ အိမ်နီးချင်းတွေနဲ့ ကွန်ဒိုဝန်ထမ်းတွေဆီ အကူအညီတောင်းဖို့ ပြေးထွက်ခဲ့ပြီး မီးက လျှင်မြန်စွာနဲ့ ပျံ့နှံ့သွားခဲ့တယ်လို့ ဆိုပါတယ်။

.

အခန်းပိုင်ရှင်ကတော့ သူမွေးထားတဲ့ကြောင်က လျှပ်စစ်မီးဖိုရဲ့ ခလုတ်ကို နင်းမိတာကြောင့် မီးလောင်မှု ဖြစ်ခဲ့တယ်လို့ သံသယရှိနေပြီး အရင်ကလည်း ဒီလိုဖြစ်ရပ်မျိုး ကြုံခဲ့ဖူးတဲ့အကြောင်း ပြောပါတယ်။

.

ချွန်ဘူရီဒေသကြီးရဲ့ မှုခင်းသိပ္ပံဌာနကတော့ မီးလောင်မှုဖြစ်ပွားရတဲ့အကြောင်းရင်းကို အတိအကျ သိနိုင်ဖို့အတွက် အခင်းဖြစ်တဲ့နေရာကို ဆက်လက်စစ်ဆေးသွားမယ်လို့ သိရပါတယ်။

.

Source – Khaosad

.