မူဆယ်မြို့မှ စက်သုံးဆီဆိုင် မီးလောင်မှု ၇ နာရီကျော်ကြာ ငြှိမ်းသတ်ခဲ့ရ

.

၂၀၂၆ ခုနှစ်၊ အောက်တိုဘာလ ၂၀ ရက်

.

ရှမ်းပြည်နယ်မြောက်ပိုင်း၊ မူဆယ်မြို့၊ စွမ်စော်ရပ်ကွက်တွင် ဖြစ်ပွားခဲ့သည့် စက်သုံးဆီဆိုင် မီးလောင်မှု ကို ၇ နာရီကျော်ကြာ ငြှိမ်းသတ်ခဲ့ရပြီး တရုတ်နိုင်ငံဘက်မှ မီးသတ်ယာဉ်နှင့် တပ်ဖွဲ့ဝင်များ လာရောက်ကူညီ ငြှိမ်းသတ် ဆောင်ရွက်ပေးခဲ့သည်ဟု သိရသည်။

.

.

မူဆယ်မြို၊ စွမ်စော်ရပ်ကွက်ရှိ စက်သုံးဆီအရောင်းဆိုင်တစ်ဆိုင်တွင် ယနေ့ အောက်တိုဘာလ ၂၀ ရက်၊ နံနက် ၁၀ နာရီခန့်က ဒီဇယ်လှောင်ကန်အတွင်းသို့ ဆီဖြည့်နေစဉ် ဆီဘောက်ဆာကား နောက်ဆုတ်ရာမှ အုတ်ခုံဖြင့် တိုက်မိကာ မီးပွားထွက်၍ ဆီလှောင်ကန် မီးကူးစက်လောင်ကျွမ်းခဲ့ခြင်းဖြစ်ကြောင်း သိရသည်။

.

မီးလောင်မှုဖြစ်ပွားရာသို့ မူဆယ်ခရိုင်နှင့်မြို့နယ် မီးသတ်တပ်ဖွဲ့မှ အုပ်ချုပ်မှုယာဉ် ၁ စီး၊ မီးငြှိမ်းသတ်ယာဉ် ၈ စီး၊ ရေသယ်ယာဉ် ၂၁ စီး၊ သန္ဓေနှင့် အရန်မီးသတ်တပ်ဖွဲ့ဝင်များ၊ ပရဟိတလူမှုကူညီရေးအသင်းအဖွဲ့များ၊ ဒေသခံများ အပြင် တရုတ်နိုင်ငံ၊ ယူနန်ပြည်နယ်၊ ရွှေလီမြို့နယ်မီးသတ်ဦးစီးဌာနမှ အုပ်ချုပ်မှုယာဉ် ၃ စီး၊ မီးငြှိမ်းသတ်ယာဉ် ၁၆ စီး၊ မီးသတ်တပ်ဖွဲ့ဝင်များဖြင့် စုပေါင်းငြှိမ်းသတ်ခဲ့ရာ ညနေ ၅ နာရီခွဲခန့်တွင် မီးငြိမ်းသွားခဲ့ကြောင်း သိရသည်။

.

မီးလောင်မှုကြောင့် အသက် ၅ နှစ်အရွယ် ကလေး ၂ ဦး အပါအဝင် မြန်မာဘက်မှ ၅ ဦး၊ တရုတ်နိုင်ငံမှ မီးသတ်တပ်ဖွဲ့ဝင် ၃ ဦး၊ စုစုပေါင်း ၈ ဦး ထိခိုက်ဒဏ်ရာများရရှိခဲ့ပြီး ပျက်စီးဆုံးရှုံးမှုတန်ဖိုး ကျပ် ၆၃၉ သိန်းခန့် ရှိခဲ့ကြောင်း သိရသည်။

.

အဆိုပါ မီးလောင်မှုနှင့် ပတ်သက်၍ မီးပေါ့ဆစွာ အသုံးပြုသူ ဆိုင်ရှင် အမျိုးသမီးအား မူဆယ်မြို့မ ရဲစခန်းတွင် ရာဇသတ်ကြီးပုဒ်မ ၂၈၅ ဖြင့် အမှုဖွင့်အရေးယူ ဆောင်ရွက်လျက်ရှိကြောင်း သိရသည်။

.