အင်းလေးဖောင်တော်ဦး မြတ်စွာဘုရား ရုပ်ရှင်တော်မြတ်များ အင်းလေးဒေသ ၂၁ ဌာနသို့ စတင် ကြွချီ အပူဇော်ခံ

.

၂၀၂၆ ခုနှစ်၊ အောက်တိုဘာလ ၁၂ ရက်

.

ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ အင်းလေးဒေသရှိ ဖောင်တော်ဦးမြတ်စွာဘုရား ရုပ်ရှင်တော် မြတ်များ ယနေ့ အောက်တိုဘာလ ၁၂ ရက်၊ နံနက်ပိုင်းမှ စတင်၍ အင်းလေးဒေသ ၂၁ ဌာနသို့ စတင် ကြွချီ အပူဇော်ခံလျက်ရှိကြောင်း သိရသည်။

.

.

အင်းလေးဒေသ၊ ညောင်ရွှေမြို့နယ်၊ သာလေးကျေးရွာအုပ်စု၊ နန်းဟူးကျေးရွာရှိ အင်းလေး ဖောင်တော်ဦး ဘုရား မူလစံကျောင်းတော်တွင် ကိန်းဝပ်စံပယ်တော်မူလျက်ရှိသည့် ဖောင်တော်ဦး မြတ်စွာဘုရား ရုပ်ရှင် တော်မြတ် ၄ ဆူအား အင်းလေးဒေသ ၂၁ ဌာနသို့ ဒေသစာရီ ကြွချီအပူဇော်ခံရန် ပင်လျှောက် မင်္ဂလာ အခမ်းအနားကို ယနေ့ အောက်တိုဘာလ ၁၂ ရက် နံနက်ပိုင်းက အဆိုပါ ကျောင်းဆောင်တွင် ပြုလုပ် ခဲ့ကြောင်း သိရသည်။

.

အခမ်းအနားတွင် ဧည့်ပရိသတ်အပေါင်းက နမောဿ ၃ ကြိမ်ရွတ်ဆို အခမ်းအနား ဖွင့်လှစ်ခဲ့ပြီး ညောင်‌ရွှေ မြို့နယ်၊ အင်းလေးဒေသ လင်းကင်းကျေးရွာ နိုင်ငံတော်ရွှေတံဆိပ်ဆုရ တေးသံရှင်  မနွေးနွေးသီရိအောင် (ခ) နွေးနွေးနှင့် ညောင်ရွှေမြို့နယ်၊ အင်းလေးဒေသ၊  နန်းဟူးလယ်ခြေရွာမ  (စောင်း) ဆွေဆွေ၊ အမျိုးသား ယဉ်ကျေးမှုနှင့် အနုပညာတက္ကသိုလ် (ရန်ကုန်) တို့မှ “ထူးမခြားနား”  ရောင်ခြည်တော်ဖွင့် ဓမ္မပူဇာတေးဖြင့် သီကျူးပူဇော် ဖွင့်လှစ်ခဲ့ကြောင်း သိရသည်။

.

ထို့နောက် အင်းလေးဒေသ ဓမ္မကထိက ဟဲခမ်းဦးကျောင်းဆရာတော် ဦးဓမ္မဝါစကနှင့် ဆရာတော်/ သံဃာတော်များမှ ဖောင်တော်ဦးမြတ်စွာ ဘုရား ကိုယ်စားတော်တို့အား အနေကဇာတင်တော်မူခဲ့ပြီး ပြည်နယ်ဝန်ကြီးများနှင့် တာဝန်ရှိပုဂ္ဂိုလ်များ၊ ပြည်နယ်/ခရိုင်/မြို့နယ်အဆင့် ဌာနဆိုင်ရာအကြီးအကဲများ၊ ဖောင်တော်ဦး ဘုရားဂေါပကအဖွဲ့ဝင်များ၊ တာဝန်ရှိသူများ၊ စေတနာရှင်၊သဒ္ဓါရှင်များက ဖောင်တော်ဦး မြတ်စွာဘုရားကိုယ်စားတော် များအား ဆွမ်းတော်ကြီး၊ ပန်းတော်၊ ဆီမီးတော်၊ ရေချမ်းတော်၊ ရွှေသင်္ကန်းများ ဆက်ကပ် လှူဒါန်းခဲ့ကြကြောင်း သိရသည်။

.

ဆက်လက်ပြီး ရှမ်းပြည်နယ်အစိုးရအဖွဲ့ဝင် ဝန်ကြီးများ၊ ပြည်နယ်/ခရိုင်/ မြို့နယ်ဌာနဆိုင်ရာအကြီးအကဲ များက ဖောင်တော်ဦးမြတ်စွာဘုရား ရုပ်ရှင်တော်မြတ် ၄ ဆူအား မူလသီတင်းသုံးရာ စံကျောင်းပလ္လင်တော် ပေါ်မှ ရွှေဝေါယာဉ်တော်ဖြင့် ခေတ္တယာယီသီတင်းသုံးတော်မူမည့် စံကျောင်းတော်သို့ ပင့်ဆောင် ပူဇော်ကာ ယာယီစံကျောင်းတော်မှ ကျေးပေါခုံ ယာယီစံကျောင်းတော်သို့ ဆက်လက်ကြွချီ အပူဇော်ခံခဲ့ကြောင်း သိရသည်။

.

အဆိုပါ ဖောင်တော်ဦးမြတ်စွာဘုရား ရုပ်ရှင်တော်မြတ်များ ဒေသစာရီ ကြွချီအပူဇော်ခံပွဲသို့ ရှမ်းပြည်နယ် အစိုးရအဖွဲ့ဝင် အင်းသား တိုင်းရင်းသားလူမျိုးရေးရာဝန်ကြီး ဒေါ်တင်တင်ရီ၊ ပြည်နယ် လွှတ်တော် ကိုယ်စားလှယ်၊ ပြည်နယ်/ခရိုင်/မြို့နယ်အဆင့် ဌာနဆိုင်ရာ တာဝန်ရှိသူများ၊ အင်းလေး ဖောင်တော်ဦးဘုရား ဂေါပကအဖွဲ့ ဥက္ကဋ္ဌနှင့် ဒေသခံများ၊ ဘုရားဖူးဧည့်သည်များ တက်ရောက်ခဲ့ကြောင်း သိရသည်။

.

ဖောင်တော်ဦး မြတ်စွာဘုရား ရုပ်ရှင်တော်မြတ်များအား ယနေ့ အောက်တိုဘာလ ၁၂ ရက်မှ စတင်၍ အောက်တိုဘာလ ၂၉ ရက်အထိ အင်းလေးဒေသ ၂၁ ဌာနသို့ ကြွချီ အပူဇော်ခံသွားနေခြင်းဖြစ်ကြောင်း သိရသည်။

.

ယနေ့ နံနက်ပိုင်းတွင် မူလစံကျောင်းတော်မှ အင်းတိန် ကျေးပေါခုံကျေးရွာသို့ ကြွချီ အပူဇော်ခံပြီး မနက်ဖြန် အောက်တိုဘာ ၁၃ ရက်၊ နံနက်ပိုင်းတွင် အင်းတိန် ကျေးပေါခုံကျောင်းမှ အင်းတိန်စံကျောင်း ထိုမှတစ်ဆင့် ဟဲယာရွာမ စံကျောင်းသို့ ကြွချီအပူဇော်ခံမည်ဖြစ်ကြောင်း သိရသည်။

.

ဓါတ်ပုံ - ပေးပို့

.