ဘန်ကောက်မှာ တရုတ်နိုင်ငံက မှောင်ခိုတင်သွင်းလာတဲ့ ဝက်အူ ၅ တန်ကျော် ဖမ်းမိ

.

၂၀၂၆ ခုနှစ်၊ အောက်တိုဘာလ ၂၂ ရက်

.

ထိုင်းနိုင်ငံ၊ ဘန်ကောက်မြို့၊ ဘန်ခွန်ထီယန်ခရိုင်၊ စမဲဒမ်ဧရိယာ ဘန်ခွန်ထီယန်-ချိုင်သလေးလမ်းပေါ်က ဂိုဒေါင်တစ်ခုကို ထိုင်းဗဟိုစုံစမ်းစစ်ဆေးရေးဗျူရို (CIB) လက်အောက်ခံ စားသုံးသူကာကွယ်ရေး ရဲတပ်ဖွဲ့ (CPPD) နဲ့ မွေးမြူရေးဦးစီးဌာန တိရစ္ဆာန်ဆေးစစ်ဆေးရေးနဲ့ ကွာရန်တင်းဌာနတို့ ပူးပေါင်းပြီး တရားရုံးဝရမ်းနဲ့ ဝင်ရောက်ရှာဖွေခဲ့တယ်လို့ ထိုင်းသတင်းတွေမှာ ဖော်ပြထားပါတယ်။

.

.

အဲဒီဂိုဒေါင်မှာ ခွင့်ပြုချက်မရှိဘဲ တိရစ္ဆာန်ထွက်ကုန်တွေ မှောင်ခိုတင်သွင်းပြီး သိုလှောင်ထားတယ် ဆိုတဲ့ သတင်းအရ ရှာဖွေခဲ့တာဖြစ်ပြီး ဆားနယ်ထားတဲ့ ဝက်အူတွေထည့်ထားတဲ့ အပြာရောင်စည် ၃၆ စည်ကို ၅ တန် တွေ့ရှိခဲ့ပါတယ်။

.

အဲဒီဝက်အူတွေကို ဂိုဒေါင်အရှေ့ဘက်မှာ သန့်ရှင်းမှုမရှိတဲ့ အခြေအနေနဲ့ သိုလှောင်ထားတာတွေ့ရပြီး စားသုံးသူတွေရဲ့ ကျန်းမာရေးနဲ့ ဘေးကင်းလုံခြုံရေးကို ထိခိုက်နိုင်တဲ့ အခြေအနေဖြစ်တယ်လို့ စစ်ဆေး တွေ့ရှိထားပါတယ်။

.

ကနဦးစစ်ဆေးချက်အရ ဝက်အူတွေဟာ တရုတ်နိုင်ငံကနေ တင်သွင်းလာတာဖြစ်ပြီး အဲဒီဂိုဒေါင်ကို စားသောက်ဆိုင်တွေထံ ဖြန့်ဝေပို့ဆောင်ဖို့ သိုလှောင်ရာနဲ့ ဖြန့်ချိရာနေရာအဖြစ် အသုံးပြုထားတာ ဖြစ်ပါ တယ်။ ပို့ဆောင်ရာမှာလည်း နိုင်ငံခြားပိုင် သယ်ယူပို့ဆောင်ရေးကုမ္ပဏီရဲ့ အွန်လိုင်းမှာယူစနစ်ကို အသုံးပြု ထားတယ်လို့ သိရပါတယ်။ ဖမ်းဆီးရမိတဲ့ ဝက်အူတွေဟာ ဘတ် ၅၀၄,၀၀၀ တန်ဖိုးရှိပါတယ်။

.

ခွင့်ပြုချက်မရှိဘဲ တိရစ္ဆာန်ထွက်ကုန်တွေ တင်သွင်းတာနဲ့ ခွင့်ပြုချက်မရှိဘဲ ပြည်နယ်တစ်ခုကနေ တစ်ခုကို သယ်ယူတာတွေဟာ တိရစ္ဆာန်ရောဂါဆိုင်ရာဥပဒေအရ ပြစ်မှုမြောက်ပြီး ထောင်ဒဏ် ၂ နှစ်အထိ၊ ဒဏ်ငွေ ဘတ် ၂၀၀,၀၀၀ အထိ ဒါမှမဟုတ် ပြစ်ဒဏ်နှစ်ရပ်စလုံး ချမှတ်နိုင်ပါတယ်။

.

ဒါ့အပြင် အကောက်ခွန်ပြစ်မှုနဲ့ ဆက်စပ်ပြီး ကုန်ပစ္စည်းတွေကို ဖုံးကွယ်တာ၊ ရောင်းချတာ ဒါမှမဟုတ် လက်ခံ တာတွေ ရှိ၊ မရှိကိုလည်း အာဏာပိုင်တွေက ဆက်လက်စစ်ဆေးနေပါတယ်။

.

ဖမ်းဆီးရမိတဲ့ ဝက်အူတွေကို CPPD ရဲ့ တပ်ဖွဲ့ခွဲ ၂ က စုံစမ်းစစ်ဆေးရေးအဖွဲ့ထံ လွှဲပြောင်းဖို့ သိမ်းဆည်း ထားပြီး ကုန်ပစ္စည်းတွေကို ကိုင်တွယ်ထားသူတွေကိုလည်း တရားဝင်ကုန်ပစ္စည်း ဖြစ်ကြောင်း ပြသနိုင်တဲ့ စာရွက်စာတမ်းတွေ တင်ပြခွင့်ပေးထားပါတယ်။ စာရွက်စာတမ်းမပြနိုင်ရင် ထိရောက်စွာ အရေးယူသွားမယ် လို့ အာဏာပိုင်တွေက ပြောပါတယ်။

.

လက်ရှိမှာတော့ ဝက်အူပိုင်ရှင်၊ ဂိုဒေါင်လုပ်ကိုင်သူနဲ့ ဒီဖြစ်စဉ်မှာ ပါဝင်သူတွေကို ဖမ်းဆီးတရား စွဲဆိုနိုင်ရေး စုံစမ်းစစ်ဆေးမှုတွေ ဆက်လက်လုပ်ဆောင်နေပါတယ်။

.

Ref – The Nation

.