.
၂၀၂၆ ခုနှစ်၊ အောက်တိုဘာလ ၂၂ ရက်
.
ရှမ်းပြည်နယ်တောင်ပိုင်း၊ တောင်ကြီးမြို့နယ်၊
အေးသာယာမြို့၊ အမှတ် (၁၂) ရပ်ကွက်ရှိ စက်မှုဇုန် တိုးချဲ့မြေ ဧရိယာပေါ်တွင် ကျူးကျော်ဆောက်လုပ်ထားသည်ဟုဆိုကာ
နေအိမ်များ ယနေ့ အောက်တိုဘာ ၂၂ ရက်တွင် ဖယ်ရှားခံခဲ့ရသည်ဟု သိရသည်။
.
ယင်းနေအိမ်ခြံဝိုင်း များသည် မြေပေးမိန့်
ခွင့်ပြုထားခြင်းမရှိကြောင်း တွေ့ရှိရသဖြင့် ၂၁ ရက်အတွင်း ပြောင်းရွှေ့ဖယ်ရှားပေးရန်
ပြီးခဲ့သည့် စက်တင်ဘာလ ၁၉ ရက်က သတိပေးအကြောင်းကြားစာ ကပ်ထား ခဲ့ခြင်းဖြစ်သည်ဟု သိရသည်။
.
“ရွှေ့စရာလည်းမရှိဘူး၊ နေစရာလည်း မရှိဘူး။ ကလေးတွေ ကလည်း
ကျောင်းတက်ရင်း တန်းလန်းနဲ့ အားလုံးဒုက္ခရောက်ကုန်တာပေါ့။ အိမ်ဝိုင်းတစ်ကွက်ဆိုတာ သိန်း
ထောင်ချီ ပေါက်နေတော့ မဝယ်နိုင်ဘူး။ ဘာမှမတတ်နိုင်ဘူး။ ဒီအတိုင်းပဲ ထိုင်ကြည့်နေရတာပေါ့”
ဟု အဆိုပါနေရာတွင် ၁၀ နှစ်ကျော်ကြာ နေထိုင် နေသူတစ်ဦးက ပြောသည်။
.
ယင်းကဲ့သို့ နေအိမ်ဖယ်ရှားခံရမည့် အခြေအနေနှင့် ပတ်သက်၍ သက်ဆိုင်ရာ
တာဝန်ရှိသူ များထံ အသနားခံစာတင်ပြခဲ့သော်လည်း ပယ်ချခံခဲ့ရသည်ဟု သိရသည်။
.
“မဖြစ်မနေ ဖယ်ရမယ်ဆိုရင်တောင် ၃ လ/၆ လလောက် ဆိုင်းငံ့ပေးစေချင်တာပေါ့။
အခု ချက်ချင်းကြီး ဆိုတော့ နေစရာနေရာမရှိတော့ဘူး။ စစ်ဘေးရှောင်ရင်း ဒီမှာ လာနေတာ ထပ်ပြီး
ဒုက္ခပြန်ရောက်တာပေါ့။ နိုင်ငံတော်ပိုင်ဆိုတာ သိရင် ကျွန်မတို့လည်း အစကတည်းက မဝယ်ပါဘူး”
ဟု နေအိမ်ဖယ်ရှားခံရသူ တစ်ဦး ကလည်း ပြောဆိုခဲ့သည်။
.
လက်ရှိတွင် မြေပေးမိန့် ရရှိထားသည့် နေအိမ်များကို ဖယ်ရှားခြင်းမပြုဘဲ
မြေပေးမိန့် မရှိသည့် နေအိမ် အလုံး ၃၀ ကို စတင်ဖယ်ရှားခြင်းဖြစ်ပြီး စုစုပေါင်း နေအိမ်
၂၁၁ လုံး ဖျက်သိမ်းဖယ်ရှားသွားမည်ဖြစ်ကြောင်း သိရသည်။
.
အဆိုပါကိစ္စနှင့် ပတ်သက်၍ စက်မှုဇုန် စီမံခန့်ခွဲရေးကော်မတီ
ဥက္ကဋ္ဌ ဦးမြင့်ကြည်က “ဒီနေ့ နို့တစ်စာ ရက်ပြည့်သွားလို့ ဖျက်တာပါ။ အားလုံးတော့မဟုတ်ဘူး။
မြေပေးမိန့် ရှိတဲ့အိမ်တွေကို မဖျက်ဘူး။ ကျန်တဲ့အိမ်တွေကို နောက် ၁၅ ရက်နေရင် ထပ်ဖျက်မှာပါ”
ဟု ပြောဆိုခဲ့သည်။
.
ထို့အပြင် အဆိုပါ စက်မှုဇုန်တိုးချဲ့မြေဧရိယာပေါ်တွင် မြေပေးမိန့်နှင့်
လုပ်ငန်းလုပ်ကိုင်ခွင့် ရယူထားပြီး သတ်မှတ် ကာလအတွင်း လုပ်ငန်းလုပ်ကိုင်ခြင်း မရှိပါက
မြေကာလတန်ဖိုး၏ ၁၀ ရာခိုင်နှုန်းကို ဒဏ်ကြေးအဖြစ် ပေးဆောင်ရမည်ဖြစ်ကာ ဒဏ်ကြေး မပေးဆောင်နိုင်ပါက
အသုံးပြုခွင့်ပါမစ်နှင့် မြေကွက်ကို ပြန်လည် သိမ်းယူသွားမည်ဖြစ်ကြောင်း သိရသည်။
.
No comments:
Post a Comment