အင်းလေး ဘုရားဆွဲလှေမှ ပြုတ်ကျသည့်လူငယ် ယနေ့အထိ ရှာမတွေ့သေး

.

၂၀၂၆ ခုနှစ်၊ အောက်တိုဘာလ ၁၇ ရက်

.

ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ အင်းလေးကန် မြေနီကုန်းရွာအနီးတွင် ယမန်နေ့ အောက်တိုဘာလ ၁၆ ရက်၊ နံနက်ပိုင်းက ရေထဲပြုတ်ကျ ပျောက်ဆုံးနေသည့် လူငယ်အား ယနေ့ အောက်တိုဘာ ၁၇ ရက်၊ နေ့လယ်အထိ ပြန်လည်ရှာဖွေတွေ့ရှိခြင်း မရှိသေးကြောင်း သိရသည်။

.

.

အင်းလေးဖောင်တော်ဦးဘုရား ရုပ်ရှင်တော်မြတ် ၄ ဆူ ငါးဖယ်ချောင်းကျေးရွာမှ ကြေးစားကုန်းကျေးရွာသို့ ကြွချီစဉ် ယမန်နေ့ အောက်တိုဘာလ ၁၆ ရက်၊ နံနက် ၈ နာရီခန့်က ကျွန်းကြီးကျေးရွာအုပ်စု၊ မြေနီကုန်း ကျေးရွာအနီး အရောက်တွင် လယ်သစ် (အောက်ရွာ)၊ ငါးဖယ်ချောင်းအုပ်စုနေ ကျန်းမာရေးမကောင်းသူ အသက် ၁၆ နှစ်အရွယ် Grade-12 ကျောင်းသားတစ်ဦး ရေထဲပြုတ်ကျခဲ့ခြင်းဖြစ်ကြောင်း သိရသည်။

.

အဆိုပါ လူငယ်အား ပရဟိတကယ်ဆယ်ရေးအဖွဲ့ဝင်များ၊ မီးသတ်တပ်ဖွဲ့ဝင်များ၊ ဒေသခံများမှ ဝိုင်းဝန်းရှာဖွေလျက်ရှိပြီး လက်ရှိ အောက်တိုဘာလ ၁၇ ရက်၊ နေ့လယ် ၂ နာရီခွဲအချိန်အထိ ပြန်လည်တွေ့ရှိခြင်း မရှိသေးကြောင်း ရှမ်းပြည်နယ်မီးသတ်ဦးစီးဌာန ထံက သိရသည်။

.

“ကြိုးစားရှာဖွေနေဆဲဖြစ်ပါတယ်။ အခုထိတော့ မတွေ့သေးပါဘူး”ဟု ရှမ်းပြည်နယ်မီးသတ်ဦးစီးဌာနမှ တာဝန်ရှိသူတစ်ဦးက ပြောသည်။

.

ပြီးခဲ့သည့် အောက်တိုဘာလ ၁၃ ရက်ကလည်း အင်းလေးကန်ဒေသ၊ ဟဲယာရွာမတွင် ဘုရားပွဲ လိုက်ပါ လာသော လှေယဉ်တစ်စီး ရေဝင်တိမ်းမှောက်မှု ဖြစ်ပွားခဲ့သေးပြီး လူထိခိုက်မှု မရှိခဲ့ကြောင်း သိရသည်။

.