ရုရှား၏ တိုက်ခိုက်မှုကြောင့် ယူကရိန်းတွင် လူ ၈ ဦး သေဆုံး၊ လျှပ်စစ်မီးပြတ်တောက်နေ

.

၂၀၂၆ ခုနှစ်၊ အောက်တိုဘာလ ၁၇ ရက်

.

ရုရှားရဲ့ တိုက်ခိုက်မှုတွေကြောင့် သောကြာနေ့မှာ ယူကရိန်းတစ်ဝန်း လူ ၈ ဦးထက်မနည်း သေဆုံးပြီး ၆၀ ဦး ဒဏ်ရာရခဲ့သလို ကုန်တိုက် ၂ ခုလည်း ထိခိုက်ခဲ့ပြီး စွမ်းအင်ပေးစနစ်တွေ တိုက်ခိုက်ခံရတာ ကြောင့် လူ ၁ သန်းကျော် လျှပ်စစ်မီးပြတ်တောက်နေတယ်လို့ ဒေသအုပ်ချုပ်ရေးမှူး ရိုမန် ရိုမန်နျူခ်က ပြောပါတယ်။

.

.

အရှေ့ပိုင်း ခါကိဗ်မြို့မှာတော့ ခရိုင် ၃ ခု တိုက်ခိုက်ခံရပြီး အသက် ၇၁ နှစ်အရွယ် အမျိုးသမီးတစ်ဦးနဲ့ အသက် ၅၈ နှစ်အရွယ် အမျိုးသားတစ်ဦး သေဆုံးခဲ့ပြီး ၁၂ ဦးလည်း ဒဏ်ရာရခဲ့တယ်လို့ ခါကိဗ် ပြည်နယ် အုပ်ချုပ်ရေးမှူး အိုလက် ဆီနီဟူဘော့က ပြောပါတယ်။

.

ဒိုနက်စ်ခ်ဒေသက ရှေ့တန်းမြို့ ခရာမာတော့စ်ခ်မှာလည်း တိုက်ခိုက်မှုကြောင့် လူ ၂ ဦး သေဆုံးခဲ့သလို အရှေ့တောင်ပိုင်း ဒနီပရိုပက်ထရော့ဗ်စ်ခ်ဒေသမှာလည်း လူ ၂ ဦး သေဆုံးခဲ့ပါတယ်။

.

ရုရှားရဲ့ တိုက်ခိုက်မှုတွေကြောင့် လျှပ်စစ်မီးပြတ်တောက်ခဲ့ပေမယ့် အခုတော့ လျှပ်စစ်မီး ပြန်ပေးနိုင်ခဲ့ပြီလို့ ယူကရိန်း စွမ်းအင်ဝန်ကြီးဌာနက ပြောပါတယ်။ ဒါပေမယ့် လက်ရှိအချိန်ထိ လျှပ်စစ်မီးမရသေးသူ နေရာတွေ ဘယ်လောက်ရှိတယ်ဆိုတာတော့ မသိရသေးပါဘူး။

.

ပိုလန်နိုင်ငံနဲ့ နယ်စပ်ချင်းထိစပ်နေတဲ့ အနောက်မြောက်ပိုင်း ဗိုလင်ဒေသမှာ အစားအသောက် ထုတ်လုပ်ရေး စက်ရုံတစ်ခုကို ဒရုန်းနဲ့ တိုက်ခိုက်ခံရလို့ လူ ၁ ဦး သေဆုံးပြီး ၈ ဦး ဒဏ်ရာရခဲ့ပါတယ်။ မနက်ပိုင်းမှာ လူ ၃၇၀,၀၀၀ ခန့် လျှပ်စစ်မီးပြတ်ခဲ့ပေမယ့် အဲဒီထဲက ၁ သိန်းခန့်က နောက်ပိုင်းမှာ မီးပြန်ရခဲ့ပါတယ်။

.

ဗိုလင်ဒေသရဲ့ မြို့တော် လွတ်စခ်မှာတော့ လျှပ်စစ်မီးပြတ်တောက်တာ အနည်းဆုံး ၂၄ နာရီလောက် ကြာနိုင်တယ်လို့ မြို့တော်ဝန် အန်ဒရီ ရာဇူမော့ဗ်စကီးက ပြောပါတယ်။

.

ဗိုလင်ဒေသမှာ တစ်နေ့လုံး ဒရုန်းတိုက်ခိုက်မှုတွေ ဆက်ဖြစ်ခဲ့ပြီး ကိုဗယ်မြို့က အကောက်ခွန် ကုန်စည် စစ်ဆေးရေးစခန်းတစ်ခုလည်း တိုက်ခိုက်ခံခဲ့ရပါတယ်။ ထရပ်ကား ၁၀ စီးလောက်လည်း မီးလောင်ခဲ့တယ်လို့ ဒေသအုပ်ချုပ်ရေးမှူး ရိုမန် ရိုမန်နျူခ်က ပြောပါတယ်။

.

နောက်ထပ်တိုက်ခိုက်မှုတွေမှာလည်း ကုန်တိုက် အနည်းဆုံး ၂ ခု ထိခိုက်ခဲ့ပါတယ်။ ကုန်တိုက်တစ်ခုက ရှေ့တန်းနဲ့နီးတဲ့ မြောက်ပိုင်း ဆူမီမြို့မှာဖြစ်ပြီး နောက်တစ်ခုက အနီးအနား ရိဗ်နေဒေသမှာ ဖြစ်ပါတယ်။ ရုရှားက ကုန်တိုက်တွေနဲ့ ဈေးတွေကို ဆက်တိုက်တိုက်ခိုက်နေတဲ့အထဲက နောက်ဆုံးဖြစ်ရပ်တွေလည်း ဖြစ်ပါတယ်။

.

ဆူမီမြို့မှာ အရေးပေါ်ကယ်ဆယ်ရေးအဖွဲ့တွေ ရိုက်ကူးထားတဲ့ ဓာတ်ပုံတွေထဲမှာ မြေပြင်ပေါ် သွေးတွေ ပြန့်ကျဲနေတာနဲ့ ကုန်တိုက်ဝင်ပေါက် ပျက်စီးနေတာတွေကို တွေ့ရပါတယ်။

.

ရိဗ်နေဒေသမှာတော့ အဓိကကုန်တိုက်တစ်ခုနဲ့ အခြားနေရာတွေကို ဒရုန်းနဲ့ တိုက်ခိုက်ခံရလို့ လူ ၁ ဦး သေဆုံးပြီး ၇ ဦး ဒဏ်ရာရခဲ့ပါတယ်။

.

ရိဗ်နေမြို့နဲ့ အနီးတဝိုက်မှာလည်း စွမ်းအင်အခြေခံအဆောက်အအုံတွေ တိုက်ခိုက်ခံရပြီးနောက် နေရာအများ အပြား လျှပ်စစ်မီးပြတ်တောက်နေတယ်လို့ ယူကရိန်း စွမ်းအင်ဝန်ကြီးဌာနက ပြောပါတယ်။

.

Ref – Reuters

.