တောင်ကြီးတန်ဆောင်တိုင်ပွဲတော် ဖွင့်ပွဲ/ပိတ်ပွဲအတွက် တိုင်းရင်းသားအကအဖွဲ့များ အစမ်းလေ့ကျင့်

.

၂၀၂၆ ခုနှစ်၊ နိုဝင်ဘာလ ၁၃ ရက်

.

၂၀၂၆ ခုနှစ် တောင်ကြီးတန်ဆောင်တိုင်ပွဲတော် ဖွင့်ပွဲ၊ ပိတ်ပွဲ အခမ်းအနားများတွင် ကပြဖျော်ဖြေမည့် တိုင်းရင်းသားယဉ်ကျေးမှု အကအဖွဲ့များ အစမ်းလေ့ကျင့်ကပြမှုကို ယနေ့ နိုဝင်ဘာ ၁၃ ရက်၊ နံနက်ပိုင်းက တောင်ကြီးမြို့၊ အဝေရာမီးပုံးပျံကွင်းအတွင်း ပြုလုပ်ခဲ့ကြောင်း သိရသည်။

.

.

ဖွင့်ပွဲနှင့် ပိတ်ပွဲအခမ်းအနားများတွင် ရှမ်းပြည်နယ်တစ်ဝန်းရှိ တိုင်းရင်းသားလူမျိုးများကို ကိုယ်စားပြုသည့် ရှမ်း၊ ပအိုဝ်း၊ ဓနု၊ တောင်ရိုး၊ အင်းသား၊ ထနော့၊ လီဆူး၊ ကချင်နှင့် ကိုးကန့် တိုင်းရင်းသားရိုးရာအကအဖွဲ့ ၉ ဖွဲ့အပြင် အခြား တိုင်းရင်းသားရိုးရာ အကအဖွဲ့များ၊ အခြေခံပညာကျောင်းများမှ ကျောင်းသား/သူများက ကပြဖျော်ဖြေ တင်ဆက် သွားမည်ဖြစ်ကြောင်း သိရသည်။

.

“ရပ်ဝေး၊ ရပ်နီးက ဧည့်သည်တွေအပြင် တခြားဒေသတွေကနေ လာရောက်လည်ပတ်ကြသူတွေအနေနဲ့ အခုနှစ် တောင်ကြီးတန်ဆောင်တိုင်ပွဲတော်ကို အပန်းဖြေလာရောက်ရင်း တိုင်းရင်းသားတွေရဲ့ ရိုးရာအက ကပြဖျော်ဖြေမှု တွေကို လာရောက်ကြည့်ရှုအားပေးကြဖို့ ဖိတ်ခေါ်လိုပါတယ်” ဟု တောင်ကြီးပညာရေးဒီဂရီကောလိပ်၊ ဂီတအနုပညာ ဌာနမှ အကနည်းပြ ဒေါ်သန္တာထွန်းက ပြောသည်။

.

တောင်ကြီးတန်ဆောင်တိုင်ပွဲတော် ဖွင့်ပွဲကို နိုဝင်ဘာလ ၁၆ ရက်တွင် ပြုလုပ်သွားမည်ဖြစ်ပြီး ရိုးရာမီးပုံးပျံပြိုင်ပွဲ၊ ညလွှတ် မီးပုံးပျံပြိုင်ပွဲကို နိုဝင်ဘာလ ၁၆ ရက်မှ ၂၄ ရက်အထိ ပြုလုပ်သွားမည်ဖြစ်ကာ နိုဝင်ဘာ ၂၅ ရက်၊ ညနေ ပိုင်းတွင် ဆုပေးပွဲနှင့် တောင်ကြီးတန်ဆောင်တိုင်ပွဲတော် ပိတ်ပွဲအခမ်းအနား ပြုလုပ်သွားမည်ဖြစ်ကြောင်း သိရသည်။

.

နေ့လွှတ် အရုပ် မီးပုံးပျံပြိုင်ပွဲများကို ယနေ့ နိုဝင်ဘာ ၁၃ ရက်၊ နေ့လယ်ပိုင်းမှစတင်၍ လွှတ်တင်ယှဉ်ပြိုင်လျက် ရှိကြောင်း သိရသည်။

.