ညောင်ရွှေမြို့နယ်၊ ကံခေါင်းရွာက ကြက်ဝိုင်းကြောင့် ဒုစရိုက်မှု များလာမည်ကို ဒေသခံများ စိုးရိမ်နေ

.

၂၀၂၆ ခုနှစ်၊ မတ်လ ၂၀ ရက်

.

ရှမ်းပြည်နယ်တောင်ပိုင်း၊ ကလောခရိုင်၊ ညောင်ရွှေမြို့နယ်၊ ကံခေါင်းကျေးရွာအတွင်း ကြက်ဝိုင်း လောင်းကစား မကြာခဏ ပြုလုပ်နေသည့်အတွက် ဒေသခံ ကျေးရွာသားများအနေဖြင့် ခိုးဆိုးလုယက်မှု အန္တရာယ် စိုးရိမ်နေရကြောင်း သိရသည်။

.

.

“ရွာထဲကို လူအဝင်အထွက် များလာတယ်။ လောင်းကစားလည်း ဖြစ်ပြန်တော့ ခေတ်ကာလ အရလည်း ခိုးတာ၊ လုတာတွေ များလာတော့ ရွာကလူတွေ ကြောက်နေကြတယ်” ဟု ဒေသခံတစ်ဦးက ကမ္ဘောဇတိုင်း သို့ ပြောသည်။

.

အဆိုပါ ကြက်ဝိုင်းသည် အပတ်စဉ် တစ်ပတ်လျှင် ၃ ရက်ခန့် ပြုလုပ်တတ်ပြီး သက်ဆိုင်ရာသို့ တိုင်ကြားခဲ့ သော်လည်း အရေးယူမှုမရှိဘဲ တိုင်ကြားသူအတွက် လုံခြုံမှုမရှိကြောင်း ၎င်းက ပြောဆိုသည်။

.

“ဒိုင်က နှစ်ယောက်၊ နသီးရယ်၊ ဗိုလ်ဉာဏ်ရယ်ပါ။ တောင်ကြီးအထိတိုင်လည်း မရဘူး။ ဒီနား တိုင်လိုက်ရင် ခဏတော့နားပြီး နောက်တစ်နေရာမှာ ပြန်လုပ်တယ်။ တာဝန်ရှိသူတွေကလည်း လာဘ်ယူတယ်။ တိုင်တဲ့သူအတွက် လုံခြုံမှုမရှိဘူး။ အဲဒီတော့ တိုင်တဲ့ သူတွေက အသိမခံချင် ကြတော့ဘူး” ဟု အခြား ဒေသခံတစ်ဦးကလည်း ပြောဆိုခဲ့သည်။

.

အဆိုပါကိစ္စနှင့် ပတ်သက်၍ ညောင်ရွှေမြို့မရဲစခန်းမှူး ဒုရဲမှူး ဝဏ္ဏကျော်အား ကမ္ဘောဇတိုင်းမှ ဆက်သွယ် မေးမြန်းရာ တစ်စုံတစ်ရာ ပြန်လည်ဖြေကြားခဲ့ခြင်း မရှိချေ။

.

ညောင်ရွှေမြိုနယ်တွင် အခြားသော လောင်းကစားဝိုင်းများလည်း ရှိနေသေးသည်ဟု သတင်းများ ထွက်ပေါ်နေလျက်ရှိသည်။

.