တောင်ကြီး မြကန်သာပန်းခြံအတွင်း ဆိုင်ကယ်ခိုးယူခံရမှုများ မကြာခဏ ဖြစ်ပွားနေ

.

၂၀၂၆ ခုနှစ်၊ မတ်လ ၂၃ ရက်

.

ရှမ်းပြည်နယ်မြို့တော် တောင်ကြီးမြို့လယ်ရှိ အများပြည်သူ လည်ပတ်အပန်းဖြေရာ နေရာတစ်ခု ဖြစ်သည့် မြကန်သာပန်းခြံအတွင်း မော်တော်ဆိုင်ကယ် ခိုးယူခံရမှုများ မကြာခဏ ဖြစ်ပွားနေကြောင်း သိရသည်။

.

.

ပန်းခြံအတွင်း မော်တော်ဆိုင်ကယ် အပ်နှံသည့်နေရာတွင် ဇက်သော့ခတ်ထားသည့်ဆိုင်ကယ်များပင် လုံခြုံမှု မရှိသည့်အတွက် ကြိုးသော့များဖြင့် ထပ်မံခတ်ထားရန် ကြော်ငြာဆိုင်းဘုတ်များဖြင့် သတိပေးထား ရကြောင်း သိရသည်။

.

“ပန်းခြံထဲမှာ ဆိုင်ကယ်ထားမယ်ဆိုရင် ဇက်သော့ခတ်ရုံနဲ့တော့ စိတ်မချရတော့ဘူး။ ကြိုးသော့တွေနဲ့ ဘီးမှာ ခတ်ထားမှရမယ်။ ဒါတောင်စိတ်ချရပါ့မလား မပြောတတ်ပါဘူး” ဟု တောင်ကြီးမြို့နေ ဒေသခံတစ်ဦးက ကမ္ဘောဇတိုင်းသို့ ပြောသည်။

.

ယခုအခါ နွေရာသီကျောင်းပိတ်ရက်ကာလ ဖြစ်သည့်အတွက်မြကန်သာပန်းခြံသို့ လာရောက်လည်ပတ်သူ များပြားသည့်အပြင် ကျန်းမာရေးလေ့ကျင့်ခန်း လုပ်သူများလည်း များပြားသည့်အတွက် လူစည်ကားမှုကို အခွင့်ကောင်းယူကာ မော်တော်ဆိုင်ကယ် ခိုးယူသူများက အလစ်ဝင်ရောက် ခိုးယူနေခြင်း ဖြစ်နိုင်ကြောင်း မြို့ခံများက သုံးသပ်ပြောဆိုကြသည်။

.

“မြကန်သာပန်းခြံမှာ ဆိုင်ကယ်အပ်ခက ၅၀၀ ပေးရတယ်။ ဖြစ်သွားရင် ဘယ်သူမှ တာဝန်ယူတာ မဟုတ်ဘူး။ ခိုးသွားရင်လည်း ပြန်ရဖို့ လမ်းမမြင်တော့ ကြိုးသော့တောင် ရှေ့ဘီး၊ နောက်ဘီး ခတ်ရမယ့်ပုံစံ ဖြစ်နေတယ်” ဟု တောင်ကြီးမြို့၊ ပြည်တော်သာရပ်ကွက်နေ အမျိုးသား တစ်ဦးကလည်း ပြောဆိုခဲ့သည်။

.

တောင်ကြီးမြို့ပေါ်ရှိ လူစည်ကားရာ နေရာများဖြစ်သည့်ဈေးကြီးများနှင့် ပန်းခြံများအပါအဝင် နေရာ အစုံတွင် အလစ်အငိုက်ကိုစောင့်၍ မော်တော်ဆိုင်ကယ် ခိုးယူမှုများ မကြာခဏ ဖြစ်ပေါ်နေခြင်းကြောင့် သတိပြုရန် လိုအပ်နေကြောင်း သိရသည်။

.