ငလျင်ဒဏ်ကြောင့် ထိခိုက်ပျက်စီးထားသော တောင်ကြီး ချမ်းမြ View Point ကို ပြန်လည်ပြင်ဆင်နေ

.

၂၀၂၆ ခုနှစ်၊ မတ်လ ၁၉ ရက်

.

ပြီးခဲ့သည့် ၂၀၂၅ ခုနှစ်၊ မတ်လ ၂၈ ရက်က ဖြစ်ပွားခဲ့သည့် ငလျင်ဒဏ်ကြောင့် ထိခိုက်ပျက်စီးခဲ့သည့် တောင်ကြီးမြို့၊ ချမ်းမြသာစည်ရပ်ကွက်ရှိ ချမ်းမြ View Point ကို ပြန်လည်ပြင်ဆင်မှုများ ပြုလုပ်လျက် ရှိကြောင်း သိရသည်။

.

.

ချမ်းမြ View Point သည် အများပြည်သူ သွားလာလည်ပတ်ရာ နေရာတစ်ခုဖြစ်ပြီး ယခုအခါ ပျက်စီးမှုများကို ပြန်လည်ပြင်ဆင်ကာ ယခင်ထက် ပိုမိုကောင်းမွန်အောင် ဆောင်ရွက်နေသည့်အတွက် ခေတ္တ ပိတ်ထားခြင်း ဖြစ်ကြောင်း သိရသည်။

.

“အရင်က ညနေတွေဆို နီးနီးနားနား ဒီ View Point မှာ နေဝင်ချိန်တွေလာကြည့်တယ်။ လာလည်တယ်။ နေရာလေးကလည်း ထိုင်လို့ကောင်းတယ်လေ။ အခုကျတော့ ပြန်ပြင်နေတာဆိုတော့ ထိုင်စရာလည်းမရှိလို့ မရောက်ဖြစ်တာ ကြာပြီ” ဟု တောင်ကြီးမြို့၊ ချမ်းမြသာစည်ရပ်ကွက်နေ လူငယ်တစ်ဦးက ကမ္ဘောဇတိုင်းသို့ ပြောသည်။

.

အဆိုပါ ချမ်းမြ View Point သည် ဝဋ်ကြွေးတော်ကြေ ဆုတောင်းပြည့်စေတီတော် ကျောင်းတိုက်အတွင်း တည်ရှိပြီး စေတီတော်ပရဝဏ်နေရာ ဖြစ်သည့်အတွက် အရက်သေစာသောက်စားခြင်း၊ မူးယစ်ဆေးဝါး သုံးစွဲခြင်း၊ ဂစ်တာတီး၊ သီချင်းဆို ကခုန်ခြင်းနှင့် မဖွယ်မရာကိစ္စများ မပြုလုပ်ကြရန် တားမြစ်ထားကြောင်း သိရသည်။

.

ယခင်က View Point အတွင်းသို့ စက်ဘီးနှင့် ဆိုင်ကယ်များ ပေးဝင်ခဲ့သော်လည်း ယခု ပြုပြင်နေဆဲ ကာလတွင် အသွားအလာ ကန့်သတ်ထားကြောင်း သိရသည်။

.