တောင်ကြီးမြို့၊ ကံသာရပ်ကွက်တွင် ခွေးလေခွေးလွင့်များကြောင့် ခွေးကိုက်ခံရမှု မကြာခဏ ဖြစ်ပွားနေ

.

၂၀၂၆ ခုနှစ်၊ ခုနှစ်၊ ဧပြီလ ၉ ရက်

.

ရှမ်းပြည်နယ်တောင်ပိုင်း၊ တောင်ကြီးမြို့၊ ကံသာရပ်ကွက်အတွင်း ခွေးလေခွေးလွင့်များ များပြားနေပြီး ရပ်ကွက်နေ ပြည်သူများ ခွေးကိုက်ခံရမှုများ မကြာခဏ ဖြစ်ပွားနေကြောင်း သိရသည်။

.

.

ကံသာရပ်ကွက်၊ မေတ္တာရှင်ဆေးရုံအနီးရှိ အောင်မြတ်လမ်းတွင် ပြီးခဲ့သည့် ဧပြီလ ၆ ရက်နေ့ တစ်ရက် အတွင်း ခွေးကိုက်ခံရမှု ၆ ကြိမ်ဖြစ်ပွားခဲ့ပြီး ၃ ဦး ဒဏ်ရာရရှိခဲ့ကာ ကျန် ၃ ဦးမှာ အဝတ်အစား အနည်းငယ်သာ ကိုက်မိသဖြင့် ထိခိုက်ဒဏ်ရာရရှိခဲ့ခြင်း မရှိကြောင်း သိရသည်။

.

ခွေးကိုက်ခံရသည့် ၃ ဦးအနက် အသက် ၅ နှစ်ဝန်းကျင်အရွယ် ကလေးငယ် ၂ ဦးတွင် လက်မောင်းနှင့် ပခုံး ဒဏ်ရာများ ရရှိခဲ့ပြီး အသက် ၅၀ အရွယ် အမျိုးသမီးတစ်ဦးတွင် ခြေသလုံးပေါက်ပြဲဒဏ်ရာများ ရရှိခဲ့ကြောင်း သိရသည်။

.

“ကြက်ခြင်းချတဲ့အချိန် ဆိုင်ကယ်က လဲသွားတော့ ဆိုင်ကယ်နဲ့ပါလာတဲ့ ကလေးကို ဝင်ကိုက်တာပါ။ နောက် တစ်နာရီလောက် ခြားပြီး နောက်ထပ်ကလေးတစ်ယောက် ထပ်အကိုက်ခံရတယ်။ ညနေပိုင်းမှာ တစ်ခါ အမျိုးသမီးကြီးတစ်ယောက် အကိုက်ခံရပါတယ်” ဟု ကံသာရပ်ကွက်နေ အမျိုးသမီးတစ်ဦးက ကမ္ဘောဇတိုင်း သို့ ပြောသည်။

.

ခွေးကိုက်ခံရသူများမှာ ယင်းရပ်ကွက်အတွင်း နေထိုင်သူများဖြစ်ပြီး တစ်ဦးလျှင် ဆေးဖိုး ကျပ်တစ်သိန်းခွဲခန့် ကုန်ကျခဲ့သည့်အတွက် အခြေခံလူတန်းစားများအတွက် အခက်အခဲ ဖြစ်ပေါ်နေရကြောင်း သိရသည်။

.

ကံသာရပ်ကွက် အပါအဝင် တောင်ကြီးမြို့ပေါ် ရပ်ကွက်များရှိ လမ်းအချို့တွင် ယင်းကဲ့သို့ ခွေးလေခွေးလွင့် များ များပြားနေပြီး ခွေးကိုက်ခံရပါကလည်း တာဝန်ယူဖြေရှင်းပေးမည့် ပိုင်ရှင်မရှိသည့်အတွက် သက်ဆိုင်ရာ တာဝန်ရှိသူများက ခွေးလေခွေးလွင့်များကို ရှင်းလင်းပေးစေလိုကြောင်း ဒေသခံများက ပြောဆိုကြသည်။

.