တောင်ကြီးတွင် စက်သုံးဆီဝယ်ရန် ထွန်စက်များပါ တန်းစီနေရ

.

၂၀၂၆ ခုနှစ်၊ ဧပြီလ ၅ ရက်

.

စက်သုံးဆီရောင်းချမှု ကန့်သတ်ချက်များကြောင့် တောင်ကြီးမြို့နယ်အတွင်းရှိ စက်သုံးဆီအရောင်းဆိုင် များတွင် ထွန်စက်များနှင့် လယ်ယာသုံးစက်ကိရိယာများပါ တန်းစီပြီး ဆီဝယ်ယူနေရသည်ဟု သိရသည်။

.

.

တောင်ကြီးမြို့မှ ဟိုပုံးမြို့ဘက်အထွက်ရှိ စက်သုံးဆီအရောင်းဆိုင်များတွင် ယနေ့ ဧပြီလ ၅ ရက်က စက်သုံးဆီ ရရှိရေးအတွက် လယ်ထွန်စက်များအပါအဝင် လယ်ယာသုံးစက်ကိရိယာများဖြင့် ဆီဝယ်ရန် တန်းစီနေကြခြင်းဖြစ်ကြောင်း သိရသည်။

.

“ဆီက ပုံးနဲ့ မရောင်းပေးတော့ဘူးဆိုတော့ ထွန်စက်ကြီး မောင်းလာမှပဲ ရတော့မယ်လေ။ ထွန်စက် တစ်စီးကို ဒီဇယ် ၅ သောင်းဖိုး ရောင်းပေးတယ်။ သွားတာ၊ ပြန်တာနဲ့ အဲဒီဆီက လမ်းမှာတင် တစ်ဝက်လောက်ကုန်ပြီ။ ဒါပေမဲ့ လုံးဝမရတာထက် စာရင်တော့ ရသလောက် ထုတ်ရမှာပေါ့” ဟု ထွန်စက်မောင်းနှင်သူတစ်ဦးက ကမ္ဘောဇတိုင်းသို့ ပြောသည်။

.

ယခုအခါ မိုးစပါးစိုက်ပျိုးရန်အတွက် ထွန်ယက်ရမည့်အချိန် ရောက်ရှိလာပြီဖြစ်ပြီး မြေလှန်၊ ထယ်ထိုးခြင်း လုပ်ငန်းများတွင် အသုံးပြုရန် ထွန်စက်များအတွက် ဒီဇယ်ဆီမှာ အရေးတကြီး လိုအပ်နေခြင်းဖြစ်ကြောင်း သိရသည်။

.

ထို့အပြင် လယ်ယာစိုက်ခင်းများအတွင်း ရေသွင်းရန် ရေစုပ်စက်နှင့် မီးစက်များအတွက် စက်သုံးဆီကိုလည်း ဝယ်ယူရန် ခက်ခဲနေပြီး အချို့က စက်များကို ဆီပန့်အရောက် သယ်ဆောင်၍ ဆီဖြည့်နေရကြောင်း တောင်သူများထံက သိရသည်။

.

တောင်ကြီးမြို့၏ ယခုရက်သတ္တပတ်အတွက် စက်သုံးဆီ ရည်ညွှန်းဈေးနှုန်းများမှာ 92 တစ်လီတာလျှင် ၄၇၅၀ ကျပ်၊ 95 တစ်လီတာလျှင် ၄၉၀၅ ကျပ်၊ ဒီဇယ် တစ်လီတာလျှင် ၅၈၀၀ ကျပ်နှင့် ပရီမီယံ တစ်လီတာလျှင် ၆၉၃၀ ကျပ် ဖြစ်သော်လည်း ပြင်ပတွင် ဒီဇယ် တစ်ဂါလံ (၄ လီတာ) လျှင် ကျပ် ၅ သောင်းကျော်ဖြင့် ရောင်းချမှုများ ရှိနေပြီး လိုင်စင်မဲ့ယာဉ်များနှင့် စိုက်ပျိုးရေးသုံး ရေစုပ်စက်၊ မီးစက်များ အတွက် ပြင်ပ မှောင်ခိုဈေးကွက်မှသာ အဓိက ဝယ်ယူ အသုံးပြုနေရကြောင်း သိရသည်။

.