ရှမ်းပြည်နယ်ဝန်ကြီးချုပ်၏ နှစ်သစ်ကူး နှုတ်ခွန်းဆက်စကား

ချစ်ခင် လေးစားအပ်ပါသော မိဘပြည်သူညီအကို မောင်နှမများ၊ ရှမ်းပြည်နယ်အတွင်းမှာ မှီတင်းနေထိုင်ကြတဲ့ တိုင်းရင်းသား ညီအစ်ကိုမောင်နှမများ အားလုံး စိတ်၏ချမ်းသာခြင်း၊ ကိုယ်၏ ကျန်းမာခြင်းနဲ့ ပြည့်စုံပါစေကြောင်း နှစ်သစ်မင်္ဂလာ ဆုတောင်းမေတ္တာ ပို့သအပ်ပါတယ်ခင်ဗျာ။

.

၂၀၂၆ ခုနှစ်၊ ဧပြီလ ၁၃ ရက်နေ့ကနေစတင်ပြီး ရှမ်းပြည်နယ်အစိုးရအဖွဲ့ က ကြီးမှူး ကျင်းပခဲ့တဲ့ ၁၃၈၇ ခုမှ ၁၃၈၈ ခု သို့ ကူးပြောင်းတဲ့ မြန်မာ့ရိုးရာမဟာ သင်္ကြန်ပွဲတော်ကြီးမှာ တိုင်းရင်းသားညီအစ်ကို မောင်နှမများ အားလုံး ချစ်ခင် ရင်းနှီးစွာ၊ စည်းလုံးညီညွတ်စွာ ပါဝင်ဆင်နွှဲခဲ့ကြတဲ့အတွက် အထူးကျေးဇူး တင်ရှိပါကြောင်း ဦးစွာ ပြောကြားလိုပါတယ်။

.

ယူနက်စကိုက လူသားမျိုးနွယ်ဆိုင်ရာ ကမ္ဘာ့ဒြပ်မဲ့ ယဉ်ကျေးမှု အမွေအနှစ်အဖြစ် အသိအမှတ်ပြုပြီး ဖြစ်တဲ့ မြန်မာ့ရိုးရာ အတာသင်္ကြန် ပွဲတော်ကြီးကို အနှစ်သာရပြည့်ဝစွာ ကျင်းပနိုင်ခဲ့ခြင်းဟာ ရှမ်းပြည်နယ်အစိုးရနဲ့ အတူ တိုင်းရင်းသား ပြည်သူတို့ရဲ့ ချစ်ကြည်ဖြူစွာ လက်တွဲခြင်း၊ ပူးပေါင်း ဆောင်ရွက်ခြင်းရဲ့ ရလဒ်ကောင်းများပဲ ဖြစ်ပါတယ် ။

.

ကျွန်တော်တို့ အားလုံး နှစ်ဟောင်းမှာ ကောင်းဆိုး နှစ်တန် ဒွန်တွဲ ကြုံတွေ့ခဲ့ကြရတဲ့ အတွေ့အကြုံများ အပေါ်မှာ သင်ခန်းစာ ဖော်ထုတ်ပြီးတော့ နှစ်သစ်မှာ ကျန်းမာရေး၊ စီးပွားရေး၊ လူမှုရေးနယ်ပယ်တွေမှာ အောင်မြင်မှုများ ပိုင်ဆိုင်နိုင်စေဖို့အတွက် ဆောင်ရွက်ဖွယ်ရာတွေကို အကောင်းဆုံး ကြိုတင်ပြင်ဆင်သွား ကြဖို့ လိုအပ်မှာ ဖြစ်ကြောင်းကိုလည်း တိုက်တွန်း ပြောကြားလိုပါတယ်။

.

နိဂုံးချုပ်အနေဖြင့် ၁၃၈၈ ခုနှစ်၊ မြန်မာနှစ်ဆန်း ၁ ရက်မှ စတင်ပြီးတော့ တိုင်းရင်းသား ပြည်သူများ အနေနဲ့နိုင်ငံတော်အစိုးရ၊ ပြည်နယ်အစိုးရအဖွဲ့တို့နှင့်အတူ မင်္ဂလာနှစ်သစ်မှာ တိုင်းပြည် ဖွံ့ဖြိုးတိုးတက်ရေး၊ ရှမ်းပြည်နယ် ဖွံ့ဖြိုးတိုးတက်ရေး လုပ်ငန်းတွေကို စိတ်သစ်လူသစ်နဲ့ တတ်စွမ်းသမျှ ဝိုင်းဝန်းကြိုးပမ်းဆောင်ရွက်ပေးကြဖို့ တိုက်တွန်း လိုပါတယ်။

.

ရှမ်းပြည်နယ်အတွင်း မှီတင်းနေထိုင်ကြတဲ့ တိုင်းရင်းသား ညီအစ်ကို မောင်နှမများအားလုံး နှစ်သစ်မှာ ကိုယ်၏ကျန်းမာခြင်း၊ စိတ်၏ချမ်းသာခြင်းနှင့် ပြည့်စုံပြီး လိုအင်ဆန္ဒများ အားလုံး ပြည့်စုံကြပါစေကြောင်း ဆုမွန်ကောင်း တောင်းပေးလိုက်ပါတယ်ခင်ဗျာ။

.

စိုင်းထိန်စိုး

ပြည်နယ်ဝန်ကြီးချုပ်

ရှမ်းပြည်နယ်အစိုးရအဖွဲ့

.

#KBZTai #Shan #Government