နယူးယော့ခ်တိုင်းမ် သတင်းစာကို တရားစွဲမယ့် အစ္စရေးဝန်ကြီးချုပ် နေတန်ယာဟု

.

၂၀၂၆ ခုနှစ်၊ မေလ ၁၅ ရက်

.

အစ္စရေးဝန်ကြီးချုပ် နေတန်ယာဟု ကတော့ နယူးယော့ခ်တိုင်းမ်သတင်းစာရဲ့ ဆောင်းပါးရှင် နီကိုးလပ်စ် ခရစ်တော့ဖ်ကို အသရေဖျက်မှုနဲ့ တရားစွဲဖို့ ပြင်ဆင်နေပါပြီ။ ဝန်ကြီးချုပ် နေတန်ယာဟုနဲ့ နိုင်ငံခြားရေး ဝန်ကြီး ဂီဒီယွန်ဆာတို့က နာမည်ကျော် နယူးယော့ခ်တိုင်းမ်သတင်းစာနဲ့ ဆောင်းပါးရှင် ခရစ်တော့ဖ် တို့ကို တရားစွဲမယ့်အကြောင်း ကြာသပတေးနေ့က ကြေညာလိုက်ပါတယ်။

.

.

ဒီ တရားစွဲဆိုမှုက ခရစ်တော့ဖ်ရဲ့ ဆောင်းပါးတစ်ပုဒ်ကြောင့် ဖြစ်ပြီး အဲဒီဆောင်းပါးမှာ အစ္စရေးစစ်သားတွေ၊ ထောင်စောင့်တွေနဲ့ အခြေချနေထိုင်သူတွေအပေါ် မေးမြန်းမှုတွေပါဝင်ပြီး ပါလက်စတိုင်းအကျဉ်းသားတွေ အပေါ်မှာ လိင်ပိုင်းဆိုင်ရာ အကြမ်းဖက်မှုတွေ ပြုလုပ်နေတဲ့အကြောင်း ဖော်ပြထားတာပါ။

.

“ပါလက်စတိုင်းလူမျိုးများ အဓမ္မအကျင့်ခံရမှုကို နှုတ်ဆိတ်နေကြခြင်း” ဆိုတဲ့ အဲဒီဆောင်းပါးမှာ အကျဉ်းသားဟောင်းတွေနဲ့ အခြားသတင်းရင်းမြစ်တွေရဲ့အင်တာဗျူးတွေကို အခြေခံထားပါတယ်။

.

ဆောင်းပါးထဲမှာတော့ ရက်စက်တဲ့အကြမ်းဖက်မှုတွေကို ဖော်ထုတ်ပြထားတာတွေ၊ အရာဝတ္တုတွေနဲ့ အဓမ္မပြုကျင့်တာတွေ၊ မျိုးပွားအင်္ဂါတွေကို ညှဉ်းပန်းနှိပ်စက်တာတွေ၊ ခန္ဓာကိုယ်ကို ထိပါးနှောင့်ယှက် တာတွေအပြင် လေ့ကျင့်ပေးထားတဲ့ ခွေးတွေကိုအသုံးပြုပြီး လိင်ပိုင်းဆိုင်ရာ စော်ကားခြင်းတွေ ပါဝင်ပါတယ်။

.

ခရစ်တော့ဖ်ရဲ့ရေးသားချက်အရ Sde Teiman လို အကျဉ်းစခန်းတွေမှာ ဒီလိုနှိပ်စက်မှုတွေက ပုံမှန်သာ ဖြစ်ပြီး လူ့အခွင့်အရေးအဖွဲ့အစည်းတွေက တိုင်ကြားပေမဲ့လည်း တာဝန်ယူပေးမှု သိပ်မရှိတဲ့အကြောင်း ဖော်ပြထားတာပါ။

.

အစ္စရေးဖက်ကတော့ ဒီဆောင်းပါးက အခြေအမြစ်မရှိတဲ့ လုပ်ကြံစွပ်စွဲမှုသာဖြစ်ပြီး သူတို့ရဲ့ ဥပဒေအကြံပေး တွေကို ဥပဒေကြောင်းအရ အပြင်းထန်ဆုံး အရေးယူမှုတွေပြုလုပ်ဖို့ ညွှန်ကြားထားတာပါ။

.

နယူးယော့ခ်တိုင်းမ်ရဲ့ဆောင်းပါးရှင် ခရစ်တော့ဖ်ဟာ သတင်းလောကမှာ အမြင့်ဆုံးဖြစ်တဲ့ ပူလစ်ဇာဆု ၂ ကြိမ် ရရှိထားသူဖြစ်ပြီး ဒီဆောင်းပါးက ပါလက်စတိုင်းအမျိုးသားနဲ့ အမျိုးသမီးအများအပြားရဲ့ ထွက်ဆိုချက် တွေအပေါ် အခြေခံထားတာလို့ သတင်းစာဖက်က တုန့်ပြန်ထားပါတယ်။

.