.
၂၀၂၆ ခုနှစ်၊ မေလ ၁၀ ရက်
.
ရှမ်းပြည်နယ်တောင်ပိုင်း၊ တောင်ကြီးမြို့နယ်၊ အေးသာယာမြို့ရှိ
ရှမ်းပြည်နယ်တိုင်းရင်းသားရေးရာနှင့် သက်မွေးပညာသင်တန်းစင်တာတွင် မုန့်အမျိုးမျိုး
ထုတ်လုပ်မှုနည်းပညာသင်တန်းကို မေလ ၂၆ ရက်မှ ဇွန်လ ၄ ရက်အထိ ဖွင့်လှစ်သင်ကြားပေးသွားမည်ဖြစ်ကြောင်း
သိရသည်။
.
တိုင်းရင်းသားအခွင့်အရေးများ ကာကွယ်စောင့်ရှောက်ရေးဦးစီးဌာန
ကြီးကြပ်မှုအောက်ရှိ အဆိုပါ သင်တန်း ကျောင်းတွင် သက်မွေးပညာသင်တန်းများကို လစဉ် အလှည့်ကျ
ဖွင့်လှစ်သင်ကြား ပို့ချပေးနေခြင်း ဖြစ်ပြီး ဆိုင်ကယ်စက်ပြင်သင်တန်း၊ အခြေခံလူသုံးကုန်ပစ္စည်း
ထုတ်လုပ်မှုသင်တန်း၊ ကွန်ပျူတာသင်တန်း စသည်တို့ကို ဖွင့်လှစ်သင်ကြားပေးလျက်ရှိကြောင်း
သိရသည်။
.
“ရပ်နီး၊ ရပ်ဝေးက ကလေးတွေ အားလုံး လျှောက်လို့ရပါတယ်။
နေစရိတ်၊ စားစရိတ်၊ သင်တန်းကြေး၊ သင်တန်းအထောက်အကူပစ္စည်း အားလုံးအခမဲ့ပါ။ သင်တန်းတစ်ခုမှာ
နေရာဒေသ အစုံက သင်တန်းသား၊ သင်တန်းသူတွေ ပါပါတယ်။ မတက်ရသေးတဲ့ ကလေးတွေကို ဦးစားပေးပြီး
ခေါ်ပါတယ်” ဟု တိုင်းရင်းသား အခွင့်အရေးများ ကာကွယ်စောင့်ရှောက်ရေးဦးစီးဌာနမှ တာဝန်ရှိသူတစ်ဦးက
ကမ္ဘောဇတိုင်းသို့ ပြောသည်။
.
အဆိုပါ မုန့်လုပ်နည်း သင်တန်းတွင် သင်တန်းသား/သူ
၂၀ ဦး လက်ခံသင်ကြားပေးသွားမည်ဖြစ်ပြီး အသက်အရွယ်အနေဖြင့် အသက် ၁၆ နှစ်မှ ၄၅ နှစ်အတွင်း
ရှိသူများကို ဦးစားပေး ခေါ်ယူကာ ပြန်လည် အသုံးချမည့် ရည်ရွယ်ချက်ပေါ် မူတည်၍ အသက်ကန့်သတ်ချက်ကို
ဖြေလျှော့စဉ်းစားပေးကြောင်း ၎င်းက ရှင်းလင်းပြောဆိုခဲ့သည်။
.
“တိုင်းရင်းသားတွေ အလုပ်အကိုင်အခွင့်အလမ်းရရှိဖို့
ဖွင့်ပေးတာဖြစ်တဲ့အတွက် ပညာအရည်အချင်း ကန့်သတ်ချက်တော့ မရှိပါဘူး။ မြန်မာစာ ရေးတတ်၊
ဖတ်တတ်ရင် ရပါပြီ” ဟု ၎င်းက ဆက်လက် ပြောဆိုခဲ့သည်။
.
“ရှမ်းပြည်နယ်အစိုးရရဲ့ သက်မွေးပညာသင်တန်းက လုပ်တာပါ။
အဲဒီမှာ လတိုင်းလိုလို သင်တန်းတွေ ရှိပါတယ်။ ကျွန်မတို့ တိုင်းရင်းသားစာပေ ယဉ်ကျေးမှုနဲ့
ဒေသဖွံ့ဖြိုးရေးအသင်းတွေကလည်း တစ်ဆင့် ကြော်ငြာ ပေးတာပါ။ အကုန်လုံး အခမဲ့ပါ။ နေမကောင်း၊
မကျန်းမာရင်လည်း ကျန်းမာရေးစောင့်ရှောက်မှု လည်း ပေးပါတယ်” ဟု အင်းသားစာပေ၊ ယဉ်ကျေးမှုနှင့်
ဒေသဖွံ့ဖြိုးရေးအသင်းမှ ဒေါ်သန္တာစိုးကလည်း ပြောသည်။
.
သင်တန်း တက်ရောက်လိုသူများအနေဖြင့် တိုင်းရင်းသားအခွင့်အရေးများ
ကာကွယ်စောင့်ရှောက်ရေး ဦးစီးဌာနသို့ ဆက်သွယ်စုံစမ်း မေးမြန်းနိုင်ပြီး တောင်ကြီးမြို့နယ်၊
အေးသာယာမြို့ရှိ ရှမ်းပြည်နယ် တိုင်းရင်းသားရေးရာနှင့် သက်မွေးပညာသင်တန်းစင်တာသို့လည်း
လူကိုယ်တိုင် လာရောက်လျှောက်ထား နိုင်ကြောင်း သိရသည်။
.
No comments:
Post a Comment