ရွေးကောက်ပွဲပြီးချိန်မှာမှ ဆီဈေးကောက်တက်လိုက်တဲ့ အိန္ဒိယ

.

၂၀၂၆ ခုနှစ် ၊ မေလ ၁၆ ရက်

.

နိုင်ငံရေးဆိုတာ ဘယ်လိုလုပ်ရတယ်ဆိုတဲ့အကြောင်း အိန္ဒိယဝန်ကြီးချုပ် မိုဒီက ပြသလိုက်ပါတယ်။ အကြောင်းရင်းကတော့ ရွေးကောက်ပွဲကာလ တစ်လျှောက်လုံး ငြိမ်သက်နေတဲ့ လောင်စာဆီဈေးနှုန်းဟာ ရွေးကောက်ပွဲပြီးသွားချိန်မှာမှ တန်းပြီး တက်သွားတာမို့ပါ။

.

.

ပြီးသွားတဲ့ ရွေးကောက်ပွဲမှာတော့ မိုဒီရဲ့ BJP ပါတီက ပြည်နယ် ၄ ခုအနက် ၂ ခုမှာ အနိုင်ရခဲ့ပြီး သူ့ရဲ့ ဩဇာလွှမ်းမိုးမှုကို တိုးချဲ့နိုင်ခဲ့ပါတယ်။

.

လက်ရှိအချိန်မှာတော့ ကမ္ဘာ့တတိယအကြီးဆုံး ရေနံတင်သွင်းတဲ့နိုင်ငံဖြစ်တဲ့ အိန္ဒိယက လောင်စာဆီ ဈေးတွေကို မြှင့်တင်ပြီး ခြိုးခြုံချွေတာရေး အစီအစဉ်တွေကို ကြေညာလိုက်ပါပြီ။

.

အိန္ဒိယရဲ့လောင်စာဆီ ဈေးနှုန်းတွေက ၃% မြင့်တက်သွားတာဖြစ်ပြီး တစ်လီတာကို ၃ ရူပီး ဈေးတက်မယ် ဆိုတဲ့အကြောင်း အစိုးရက ကြေညာသွားခဲ့ပါတယ်။ ဓာတ်ဆီဈေးနှုန်းတွေက တစ်လီတာကို ၉၇ ဒသမ ၇၇ ရူပီး (၁ ဒသမ ၀၂ ဒေါ်လာ) ကို မြင့်တက်သွားခဲ့ပြီး ဒီဇယ်ဈေးကတော့ ၉၀ ဒသမ ၆၇ ရူပီး (၀ ဒသမ ၉၄ ဒေါ်လာ) ဖြစ်သွားခဲ့ပါတယ်။

.

တတိယအကြီးဆုံး ရေနံတင်သွင်းရတဲ့နိုင်ငံဖြစ်တဲ့ အိန္ဒိယဟာ သူတို့အသုံးပြုတဲ့ ရေနံရဲ့ ၉၀ ရာခိုင်နှုန်းကို ပြည်ပကနေ မှာယူရတာဖြစ်ပြီး ဟော်မုဇ်ရေလက်ကြားကနေ ဖြတ်သန်းလာတဲ့ ရေနံပမာဏက အဲဒီရဲ့ ပမာဏ တစ်ဝက်မှာ ရှိနေတာပါ။

.

ဒါပေမဲ့ အစိုးရကတော့ လောင်စာဆီဈေးတက်ဖို့ ရှောင်ရှားနေခဲ့ပြီး ပြည်သူတွေဆီကို နောက်ဆုံးအချိန်မှာမှ ဈေးတိုးမြှင့်သတ်မှတ်ပေးတဲ့ အဓိက စီးပွားရေးနိုင်ငံတွေထဲက တစ်နိုင်ငံ ဖြစ်လာခဲ့ပါတယ်။

.

မိုဒီကတော့ အိန္ဒိယပြည်သူတွေအနေနဲ့ ကိုယ့်ဆန္ဒအလျောက် ဆီချွေတာရေးလုပ်ဖို့ တိုက်တွန်းလိုက်ပြီး အိမ်ကနေ အလုပ်လုပ်ဖို့၊ ပြည်ပခရီးသွားတာတွေ၊ ရွှေဝယ်တာတွေ လျော့ကြဖို့ တိုက်တွန်းထားပါတယ်။

.

မိုဒီက လောင်စာဆီချွေတာခြင်းဟာ မျိုးချစ်စိတ်ကိုပြသလိုက်တာပဲ ဆိုတဲ့စကားနဲ့ ပြည်သူတွေကို တွန်းအားပေးခဲ့ပြီး အများပြည်သူသယ်ယူပို့ဆောင်ရေးစနစ်ကို အသုံးပြုဖို့၊ ကားအတူတူစီးတဲ့စနစ်ကို ကျင့်သုံးကြဖို့ တိုက်တွန်းလိုက်ပါတယ်။

.

အတိုက်အခံခေါင်းဆောင်တွေကတော့ မိုဒီ ဟာ ရွေးကောက်ပွဲပြီးတဲ့အချိန်၊ သူနိုင်သွားတဲ့အချိန်ကျမှသာ ဆီဈေးကို မြှင့်ပြီး ကြီးကြီးကျယ်ကျယ်တွေ ပြောနေတယ်လို့ ဝေဖန်ကြပါတယ်။

.

နယူးဒေလီမြို့မှာတော့ အာဏာပိုင်တွေက လောင်စာဆီချွေတာရေးအစီအစဉ်တွေကို ကြေညာခဲ့ပြီး အစိုးရ ဝန်ထမ်းတချို့အတွက် အိမ်ကနေအလုပ်လုပ်ရမယ့် နေ့တွေကိုပါ သတ်မှတ်ပေးခဲ့ပါတယ်။

.

အိန္ဒိယက လောင်စာဆီလျော့ချသုံးစွဲမှုရဲ့ တစိတ်တပိုင်းအဖြစ် ဆီဆိုင်အများအပြားမှာ အီသနော ၂၀% ရောစပ်ထားတဲ့ ဓာတ်ဆီတွေကို ရောင်းချနေကြပါသေးတယ်။

.

ဒီလိုပြသနာတွေကြားမှာပဲ အိန္ဒိယက ယူအေအီးနဲ့ ရေနံ၊သဘာဝဓာတ်ငွေ့ မဟာဗျူဟာကာကွယ်ရေးနဲ့ ပူးပေါင်းရေးဆိုင်ရာ  သဘောတူညီချက်ကို လက်မှတ်ထိုးနိုင်ခဲ့ပြီး ယူအေအီးအစိုးရဖက်ကလည်း ဟော်မုဇ် ရေလက်ကြားကို မဖြတ်သန်းရဘဲ ရေနံတင်ပို့နိုင်မယ့် ပိုက်လိုင်းအစီအစဉ်ကို ၂၀၂၇ မှာ စတင်မယ်လို့ ကြေညာလိုက်ပါတယ်။

.