မိုးကြိုးစက်ကွင်း ထိမှန် သေဆုံးခဲ့သည့် နွားများအတွက် ပိုင်ရှင်များကို ထောက်ပံ့ငွေ ပေးအပ်

ရှမ်းပြည်နယ်၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြို့နယ်၌ မိုးကြိုးစက်ကွင်း ထိမှန်၍ သေဆုံးခဲ့သည့် နွားများအတွက် နစ်နာသူ နွားပိုင်ရှင်များကို ယနေ့ မေလ ၂၈ ရက်က ထောက်ပံ့လှူဒါန်းငွေများ ပေးအပ်ခဲ့ကြောင်း သိရသည်။

.

ဆီဆိုင်မြို့နယ်၊ လွယ်ပွတ်ကျေးရွာအုပ်စု၊ ကောင်ဝါးတောင်ရွာ၌ မေလ ၂၁ ရက်က မိုးကြိုးစက်ကွင်း ထိမှန် သေဆုံးခဲ့သည့် နွားကောင်ရေ ၄၉ ကောင်အတွက် နွားပိုင်ရှင်များအား ကမ္ဘောဇဖောင်ဒေးရှင်းနှင့် ရှမ်းတောင် ပရဟိတ ညီနောင်များကွန်ယက်က ကူညီလှူဒါန်းခဲ့သော ထောက်ပံ့ငွေများကို ပအိုဝ်းကိုယ်ပိုင်အုပ်ချုပ်ရဒေသ ဦးစီးအဖွဲ့ ဥက္ကဌ ခွန်ဖိုးစိန် နှင့် အဖွဲ့ဝင်များက သွားရောက်၍ ပေးအပ်ခဲ့ခြင်း ဖြစ်ကြောင်း သိရသည်။

.

“ ဒီနေ့ ၂ ရီလောက်က ထောက်ပံ့ ပေးအပ်ခဲ့တာပါ။ တောင်သူ စုစုပေါင်း ၁၇ ယောက်ကို ထောက်ပံ့ခဲ့တာပါ။ တချို့က ၃/၄ ကောင် ပါတာ ရှိတယ်။ တချို့က တစ်ကောင်ပါတာ ရှိပါတယ်။ အခုလို လှူဒါန်းကူညီတဲ့ ကမ္ဘောဇဖောင်ဒေးရှင်း နဲ့ ရှမ်းတောင် ပရဟိတညီနောင်များကွန်ယက်ကိုလည်း ကျေးဇူးတင်ပါတယ်။” ဟု ပအိုဝ်းကိုယ်ပိုင်အုပ်ချုပ်ရဒေသ ဦးစီးအဖွဲ့ ဥက္ကဌ ခွန်ဖိုးစိန် က ပြောသည်။

.

မိုးကြိုးစက်ကွင်း ထိမှန်သေဆုံးခဲ့သည့် နွားကောင်ရေ ၅၀ ၏ ပိုင်ရှင် ၁၇ ဦးအား နွားတစ်ကောင်လျှင် ၇ သိန်းကျပ်စီဖြင့် စုစုပေါင်း ငွေကျပ် သိန်း ၃၅၀ ကို ထောက်ပံ့လှူဒါန်းခဲ့ခြင်း ဖြစ်ကြောင်း သိရသည်။

.

ထို့အပြင် အဆိုပါ ကျေးရွာရှိ ဒေသခံပြည်သူများ အသုံးပြုလျက်ရှိသော သောက်သုံးရေလှောင်ကန် ကို သွားရောက်ကြည့်ရှု စစ်ဆေးခဲ့ပြီး ပြန်လည် ပြုပြင်ရေးအတွက် ကျေးလက်ဌာနနှင့် ပူးပေါင်း၍ လုပ်ဆောင်ရန်ကိုလည်း ဒေသ ဥက္ကဌက လမ်းညွှန် ဆောင်ရွက်ပေးခဲ့သည်ဟု သိရသည်။

.

#KBZTai #Shan #News  #HsiHseng