ဒေါ်နယ်ထရမ့်နဲ့ တူတဲ့ကျွဲကြီးကို သတ်မစားဖို့ ဘင်္ဂလားဒေ့ရှ်အစိုးရ အမိန့်ထုတ်

.

၂၀၂၆ ခုနှစ်၊ မေလ ၂၈ ရက်

.

အမေရိကန်သမ္မတ ဒေါ်နယ်ထရမ့်နဲ့ ဆံပင်ပုံစံချင်း ဆင်တူနေတာကြောင့် “ဒေါ်နယ်ထရမ့်” လို့ နာမည်ပြောင် အပေးခံထားရတဲ့ ဘင်္ဂလားဒေ့ရှ်နိုင်ငံက ကျွဲကြီးဟာ အသတ်ခံရမယ့် အခြေအနေကနေ လွတ်မြောက်သွားခဲ့ပြီး အမျိုးသားတိရိစ္ဆာန်ဥယျာဉ်ထဲမှာ စောင့်ရှောက်ခံရဖို့ ဖြစ်သွားခဲ့ပါတယ်။

.

.

မွတ်စလင်အများစု နေထိုင်ကြတဲ့ ဘင်္ဂလားဒေ့ရှ်မှာ ဒီကျွဲကြီးက တော်တော်လေး နာမည်ကြီးနေခဲ့ပေမဲ့ အိဒ်နေ့မှာ အသတ်ခံရမှာဖြစ်တယ်ဆိုတဲ့အကြောင်း ပိုင်ရှင်ကိုယ်တိုင်ကလည်း အသိပေးထားပြီးသားပါ။

.

ဒါပေမဲ့ ဆိုရှယ်မီဒီယာပေါ်မှာ ရုတ်တရက်ပျံ့နှံ့လာတဲ့ ဗီဒီယိုတွေ၊ ထရမ့်နဲ့တူတယ်ဆိုတဲ့ စကားတွေ၊ ဒေါ်နယ်ထရမ့်လို့တောင် နာမည်ပေးထားတာတွေရဲ့နောက်မှာတော့ ဒီကျွဲကြီးကို သတ်ဖြတ်ခွင့် မပြုဘူး ဆိုတဲ့အကြောင်း ဘင်္ဂလားဒေ့ရှ်အစိုးရက အမိန့်ထုတ်လိုက်ပါတယ်။ အဲဒီနောက် ပိုင်ရှင်ဆီကနေ ပြန်ဝယ် လိုက်ပြီး အမျိုးသားတိရိစ္ဆာန်ဥယျာဉ်ထဲကို ပို့လိုက်တာပါ။

.

အလေးချိန် ၇၀၀ ကီလိုဂရမ်ရှိတဲ့ ဒီကျွဲကြီးက ရှားပါး အယ်ဘီနိုကျွဲအမျိုးအစားဖြစ်ပြီး အမေရိကန်သမ္မတ ဒေါ်နယ်ထရမ့်ရဲ့ ထင်ရှားတဲ့ဆံပင်ပုံစံလိုမျိုး အဝါဖျော့ရောင် အမွှေးရှည်တွေ ရှိနေတာပါ။ မူလကတော့ အိဒ်နေ့မှာ သတ်ဖြတ်ဖို့ စီစဉ်ခံထားရတာဖြစ်ပေမယ့် အစိုးရက ဝင်ရောက်တားဆီးခဲ့တာဖြစ်ပါတယ်။

.

“အယ်လ်ဘီနိုကျွဲကြီးအတွက် သီးသန့်ခြံတစ်ခု သတ်မှတ်ထားပြီး စောင့်ရှောက်သူလည်း ခန့်ထားပါတယ်” လို့ အမျိုးသားတိရိစ္ဆာန်ဥယျာဉ်ရဲ့ ဝန်ထမ်းတစ်ဦးက ဆိုပါတယ်။

.

ကျွဲရဲ့ အရင်ပိုင်ရှင်ဖြစ်တဲ့ အသက် ၃၈ နှစ်အရွယ် အမ်ရီဒါကတော့ သူ့ညီက ဒီကျွဲကို ထရမ့် လို့ နာမည်ပေးခဲ့တာဖြစ်ပြီး ထူးခြားတဲ့ အမွှေးပုံစံကြောင့်လို့ ဆိုပါတယ်။

.

ဘင်္ဂလားဒေ့ရှ်နိုင်ငံအတွင်းက လူအများစုဟာ ဒီကျွဲကြီးနဲ့ ဓာတ်ပုံရိုက်ဖို့ အုပ်စုလိုက် လာရောက်ကြပြီး ဝေးတဲ့နေရာတွေဆီကနေတောင် တကူးတက လာသူတွေ ရှိပါတယ်။

.

Source ; Bangkok Post

.