အမှိုက်သိမ်းစနစ် ပြောင်းလဲရန် တောင်ကြီးဒေသခံများ လိုလားနေ

.

၂၀၂၆ ခုနှစ်၊ မေလ ၁၇ ရက်

.

ရှမ်းပြည်နယ်မြို့တော်၊ တောင်ကြီးမြို့၌ လက်ရှိ အသုံးပြုသည့် အမှိုက်သိမ်းစနစ် အစား သတ်မှတ်နေရာတွင် အမှိုက်ပုံးများ ထားရှိ၍ အမှိုက်သိမ်းသည့် စနစ်ကို ပြောင်းလဲ အသုံးပြုရန် ဒေသခံများက လိုလားနေလျက် ရှိသည်။

.

.

“ခု လက်ရှိစနစ်က အမှိုက်ကား လာရင် ကိုယ်တိုင် အမှိုက်ကို ကားရှိရာ သွားပြီး ပစ်ရတာ။ အဲဒီလို အစား သတ်မှတ်နေရာမှာ အမှိုက်ပုံးလိုမျိုး ထားလိုက်မယ်ဆိုရင် ကားလည်း စောင့်စရာ မလိုတော့ဘူး၊ ပြီးတော့ အမှိုက်သိမ်း ကားကလည်း အဲနေရာမှာပဲ သိမ်းရတော့ အဆင်ပြေမယ်လို့ ထင်ပါတယ်။” ဟု ဒေသခံ တစ်ဦးက ပြောသည်။

.

တောင်ကြီးမြို့ပေါ် လမ်းကြားအချို့၌ အမှိုက်သိမ်းကား လာရောက်ခြင်း မရှိကြောင်းနှင့် အမှိုက်ကား နောက်လိုက်သည် ကူညီလုပ်ဆောင်မှု မရှိဘဲ ရပ်ကြည့်နေသည်ဟု ဒေသခံအချို့က ပြောဆိုနေကြပြီး ယင်းပြောဆိုမှု အပေါ် ကုမ္ပဏီဘက်ကလည်း QR Code ပါ နံပါတ် ၆ လုံးနှင့်တကွ၊ ရပ်ကွက်၊ လမ်း၊ နေ့ရက်၊ ယာဉ်အမှတ်ဖြင့် တိုင်ကြားနိုင်ကြောင်း တုံ့ပြန်ထားသည်ကို တွေ့ရသည်။

.

ယင်းကဲ့သို့ အငြင်းပွားမှုများ မဖြစ်ပေါ်စေရန်အတွက် သတ်မှတ်နေရာတွင် အမှိုက်စွန့်ပစ်ခြင်း၊ သိမ်းဆည်း ခြင်း စနစ်ကို ဆောင်ရွက်ရန် စဉ်းစားမိသော်လည်း အားနည်းချက် အချို့ ရှိနေသည်ဟုလည်း စည်ပင်သာယာရေးဌာနက ဆိုသည်။

.

“ အဲဒီစနစ်ကို စဉ်းစားထားတယ်။ ဒါပေမယ့် အမှိုက်ပုံးတွေ ထားရင် ခိုးယူခံရတာမျိုး ရှိနေတော့ အခက်အခဲ ဖြစ်နေတယ်။” ဟု တောင်ကြီးမြို့နယ် စည်ပင်သာယာရေးဌာန တာဝန်ရှိသူ တစ်ဦးက ပြောသည်။

.

ထို့အပြင် အမှိုက်သိမ်းကုမ္ပဏီက ကိုယ်တိုင် အမှိုက်ပစ်သည့်စနစ်ကို ကျင့်သုံးရခြင်းနှင့် ပတ်သက်၍ ကား ဘော်ဒီ မြင့်သည့် တစ်ပါယာဉ်များကို အသုံးမပြုဘဲ၊ ခေတ်မီ အမှိုက်ကြိတ်ယာဉ် (GCT) များကို ရည်ရွယ်ချက် ရှိရှိ အသုံးပြုထားခြင်း ဖြစ်ပြီး အဓိက ရည်ရွယ်ချက်မှာ မိဘပြည်သူများ ကိုယ်တိုင်ကိုယ်ကျ အလွယ်တကူနှင့် အန္တရာယ်ကင်းရှင်းစွာ စနစ်တကျ စွန့်ပစ်နိုင်ရန်အတွက် ဖြစ်သည်ဟုလည်း ဆိုထားသည်။

.

တောင်ကြီးအီကို ကုမ္ပဏီသည် တောင်ကြီးမြို့နယ်စည်ပင်သာယာရေးဌာနနှင့် သဘောတူစာချုပ် ချုပ်ဆို၍ တောင်ကြီးမြိုပေါ် ရပ်ကွက်များအတွင်း အမှိုက်နှင့် မိလ္လာသိမ်းဆည်းရေး လုပ်ငန်းကို ပြီးခဲ့သည့် ၂၀၂၅ ခုနှစ်၊ အောက်တိုဘာလ ၁ ရက်ကတည်းက စတင်ဆောင်ရွက်နေခြင်း ဖြစ်သည်။

.