Ai မျက်မှန်နဲ့ စာခိုးချမှုတွေကြောင့် အရှေ့အာရှတစ်ခွင်ကကျောင်းတွေ အခက်တွေ့

.

၂၀၂၆ ခုနှစ်၊ ဇွန်လ ၂၇ ရက်

.

တောင်ကိုရီးယား၊ ထိုင်ဝမ်နဲ့ တရုတ်နိုင်ငံတွေမှာ Ai မျက်မှန်ကိုသုံးပြီး စာခိုးချတဲ့ ကျောင်းသားတွေ များပြား လာတာကြောင့် အရှေ့အာရှ နိုင်ငံတွေမှာ စာမေးပွဲဖြေဖို့ လာရောက်တဲ့ ကျောင်းသားတွေရဲ့ မျက်မှန်တွေကို စစ်ဆေးမှုတွေ စတင်ပြုလုပ်နေကြပါပြီ။

.

.

ပြီးခဲ့တဲ့လထဲမှာ တောင်ကိုရီးယားနိုင်ငံတွင်း အင်္ဂလိပ်စာ စာမေးပွဲမှာ ဖြေဆိုသူ ၂ ဦးက Ai မျက်မှန်သုံးပြီး လိမ်လည်ဖြေဆိုမှု ပြုလုပ်ခဲ့တာကို ၂ ကြိမ်တိုင် ဖမ်းဆီးမိခဲ့တာပါ။

.

ထိုင်ဝမ်မှာလည်း ဆေးတက္ကသိုလ်ဝင်ခွင့် စာမေးပွဲမှာ မျက်မှန်ကို စိုက်ကြည့်နေတဲ့ ကျောင်းသားတစ်ဦးကို သတိထားမိရာကနေ Ai မျက်မှန်တပ်ပြီး စာခိုးချနေတယ်ဆိုတာကို သိရှိခဲ့ကြတာပါ။

.

ဒီလိုမျက်မှန်တွေနဲ့ စာခိုးချတာက အသစ်အဆန်းမဟုတ်ဘူးလို့ပြောနိုင်ပေမဲ့လည်း Ai ထည့်သွင်းထားတဲ့ မျက်မှန်တွေကတော့ စွမ်းဆောင်ရည် ပိုမြင့်မားလာသလို ဈေးလည်း ပိုသက်သာလာတာကြောင့် ကျောင်းသားတွေကြားမှာ ရေပန်းစားလာကြတာပါ။

.

တောင်ကိုရီးယားနိုင်ငံတွင်း စာမေးပွဲတွေနဲ့ ထိုင်ဝမ်နိုင်ငံတွင်းစာမေးပွဲတွေမှာ Ai မျက်မှန်သုံးပြီး ဖြေဆိုသူ တွေကို စတင်တွေ့ရှိလာကြရပြီးတဲ့နောက် စာမေးပွဲခန်းတွေမှာ မျက်မှန်စစ်ဆေးမှုကို စတင်ပြုလုပ်နေကြ ပါပြီ။

.

ဇွန်လအစောပိုင်းမှာ ပြုလုပ်ခဲ့တဲ့ တရုတ်နိုင်ငံရဲ့ နာမည်ကျော် တက္ကသိုလ်ဝင်စာမေးပွဲမှာလည်း မျက်မှန် စစ်ဆေးမှုတွေ ပြုလုပ်ခဲ့ကြပါတယ်။ ကျောင်းသား ၁၀ သန်းကျော် ဝင်ရောက်ဖြေဆိုကြတဲ့ ဒီစာမေးပွဲမှာ ဖြေဆိုသူ အားလုံးရဲ့ မျက်မှန်တွေကို စစ်ဆေးမှု ပြုလုပ်ခဲ့တာပါ။

.

အင်္ဂလန်မှာတော့ စာမေးပွဲကြီးကြပ်ရေးအဖွဲ့က Ai မျက်မှန်တွေအပြင် နားကြပ်တွေကိုပါ စစ်ဆေးဖို့ အမိန့်ထုတ်ထားပြီး စာမေးပွဲအတွင်း လိမ်လည်ဖြေဆိုမှုကို ပိုမိုအာရုံစိုက်လာကြပါတယ်။

.

တောင်ကိုရီးယားရဲ့တက္ကသိုလ်ဝင်စာမေးပွဲ စီမံခန့်ခွဲရေးအဖွဲ့ကတော့ Ai မျက်မှန်တွေအပါအဝင် ဖုန်းနဲ့ နားကြပ်တွေကိုပါ စာမေးပွဲခန်းထဲယူဆောင်ခွင့်ကို တားမြစ်ထားခဲ့ပြီး လိမ်လည်ဖြေဆိုမှုတွေကို ထပ်မံ ကာကွယ်နိုင်ဖို့အတွက် ပညာရေးဝန်ကြီးဌာနနဲ့ ဆွေးနွေးနေတယ်လို့ ပြောပါတယ်။

.

“လူသိရှင်ကြား ပေါ်ပေါက်လာတဲ့ ဖြစ်ရပ် အနည်းငယ်ကို မြင်နေရတယ်ဆိုရင် မဖော်ထုတ်နိုင်သေးတဲ့ အဖြစ် တွေကလည်း ဒီ့ထက်အများကြီးရှိနိုင်ပါတယ်” လို့ ဩစတြေးလျနိုင်ငံရဲ့ ပညာရေးအကဲဖြတ်မှု ပါရဂူ ကော်ဘင် က ဆိုပါတယ်။

.

Ai နည်းပညာ ဖွံ့ဖြိုးလာခြင်းနဲ့အတူ Ai မျက်မှန်တွေကလည်း ပိုမိုပါးလွှာလာကြတာမို့ သတိထားမိဖို့ ပိုခက်လာပြီး အင်တာနက်ချိတ်ဆက်မှုနဲ့ ကိုယ်တိုင်လုပ်ဆောင်နိုင်တဲ့စွမ်းရည်တွေကိုပါ ထည့်သွင်းလာကြ တာကြောင့် စာမေးပွဲတွေရဲ့ ယုံကြည်စိတ်ချရမှုကိုပါ ထိခိုက်လာနေတာပါ။

.

အမေရိကန်ရဲ့နည်းပညာကုမ္ပဏီဖြစ်တဲ့ Meta က Ray-Ban နဲ့ ပူးပေါင်းပြီး Ai ပါတဲ့မျက်မှန်တွေကို ၂၀၂၃ ခုနှစ်ကုန်ခါနီးမှာ စတင်မိတ်ဆက်ခဲ့တာပါ။ နောက်ပိုင်းမှာတော့ မော်ဒယ်အသစ်တွေကိုပါ ထပ်မံထုတ်လုပ် ခဲ့ပြီး ပြီးခဲ့တဲ့ ၂၀၂၅ ခုနှစ် တစ်နှစ်တည်းမှာတင် Ai မျက်မှန် ၇ သန်းကျော် ရောင်းချခဲ့ရတယ်လို့ သိရပါတယ်။

.

Source – CNN

.