ကွန်ဂိုမှာ အီဘိုလာကြောင့် လူသေဆုံးမှု ဆက်တိုက်မြင့်တက်နေပြီး သမိုင်းတစ်လျှောက် အဆိုးရွားဆုံး ဖြစ်လာနိုင်

.

၂၀၂၆ ခုနှစ်၊ ဇွန်လ ၁၇ ရက်

.

ကွန်ဂိုနိုင်ငံမှာ အီဘိုလာရောဂါကြောင့် သေဆုံးသူဦးရေ ဆက်တိုက်မြင့်တက်နေဆဲဖြစ်ပြီး သမိုင်း တစ်လျှောက် အဆိုးရွားဆုံး အီဘိုလာကူးစက်မှု ဖြစ်လာနိုင်တယ်လို့ အာဖရိက ရောဂါထိန်းချုပ်ရေးနဲ့ ကာကွယ်ရေးစင်တာ အကြီးအကဲက သတိပေးလိုက်ပါတယ်။

.

.

ကွန်ဂိုနိုင်ငံရဲ့ အဆိုးရွားဆုံး အီဘိုလာ ကူးစက်မှုက ၂၀၁၈-၂၀၂၀ ခုနှစ်အတွင်းဖြစ်ပွားခဲ့တာဖြစ်ပြီး လူပေါင်း ၃၄၀၀ ကူးစက်ခံခဲ့ရသလို ၂၂၀၀ ကျော် သေဆုံးခဲ့တာပါ။ အဲဒီဖြစ်ရပ်က ကမ္ဘာပေါ်မှာ ဒုတိယအဆိုးရွားဆုံး အီဘိုလာကူးစက်မှုအဖြစ် မှတ်တမ်းဝင်ခဲ့ပါတယ်။

.

လက်ရှိမှာတော့ ကွန်ဂိုနိုင်ငံတွင်းထုတ်ပြန်တဲ့စာရင်းတွေအရ အတည်ပြုလူနာအရေအတွက်က ၈၃၇ ဦး အထိမြင့်တက်လာခဲ့ပြီး သေဆုံးသူ ၁၉၆ ဦး ရှိနေခဲ့ပါပြီ။

.

ဘူရွန်ဒီနိုင်ငံမှာ ကျင်းပခဲ့တဲ့ အာဖရိက ခေါင်းဆောင်တွေနဲ့ နိုင်ငံတကာအလှူရှင်တွေရဲ့ အွန်လိုင်း အစည်းအဝေးမှာ အာဖရိက ရောဂါထိန်းချုပ်ရေး ညွန်ချုပ် ကာဆီယာ က “ဒီရောဂါပြန့်ပွားမှုကို အချိန်တိုအတွင်း မထိန်းချုပ်နိုင်ခဲ့ဘူးဆိုရင် အနောက်အာဖရိကနဲ့ ကွန်ဂိုအလယ်ပိုင်းမှာ အရင်က ကြုံတွေ့ခဲ့ဖူးတဲ့ ကပ်ရောဂါတွေထက် ပိုပြီး ဆိုးရွားလာမှာဖြစ်တယ်” လို့ ပြောခဲ့တာပါ။

.

ကွန်ဂိုအစိုးရအနေနဲ့ အီဘိုလာဗိုင်းရပ်စ်နဲ့ ထိတွေ့မိခဲ့တဲ့ လူထောင်ပေါင်းများစွာ ကို အခုချိန်ထိ ခြေရာခံလို့ မရသေးတာကလည်း ရောဂါပျံ့ပွားမှုကို ပိုပြီး မြင့်တက်လာစေတာပါ။

.

အစိုးရရဲ့ အချက်အလက်တွေအရ ဗိုင်းရပ်စ်နဲ့ ထိတွေ့ခဲ့သူပေါင်း ၂၆၀၀၀ ကျော်ကို ခြေရာခံမရဖြစ်နေပြီး ဘယ်မှာရှိနေတယ် ဆိုတာကို မသိသလို၊ အခြားသူတွေကို ရောဂါကူးစက်နေခြင်း ရှိ၊ မရှိ ကိုလည်း မသိနိုင် ဖြစ်နေတာပါ။

.

ရောဂါကူးစက်မှုကို တားဆီးဖို့အတွက် ကုသရေးစင်တာ မလုံလောက်မှုနဲ့ ဒေသခံပြည်သူတွေက ကျန်းမာရေး လမ်းညွှန်ချက်တွေကို လိုက်နာခြင်းမရှိတာကြောင့် အခက်အခဲတွေ ပိုပြီး ရှိလာခဲ့တာပါ။ ကျန်းမာရေး တာဝန်ရှိသူတွေကတော့ ရောဂါဖြစ်ပွားကြောင်း ကြေညာပြီး တစ်လကျော် ကြာမြင့်လာပေမဲ့ အမှန်တကယ် ကူးစက်ခံထားရတဲ့ ပမာဏကို အတိအကျ မသိနိုင်ဘဲ ဖြစ်နေကြပါတယ်။

.

အီဘိုလာရောဂါကြောင့် သေဆုံးသူတွေရဲ့ ရုပ်အလောင်းကို မိသားစုတွေက ရိုးရာဈာပနအခမ်းအနားတွေနဲ့ သင်္ဂြိုဟ်နေတာကလည်း ရောဂါပျံ့နှံ့မှုရဲ့ အဓိက အကြောင်းရင်းဖြစ်နေတာပါ။

.

ဘူရန်ဒီ သမ္မတ အီဗာရစ်စစတီ ကတော့ ရောဂါထိန်းချုပ်ဖို့အတွက် လိုအပ်တဲ့ အမေရိကန်ဒေါ်လာ ၅၁၈ သန်းရဲ့ ငါးပုံတစ်ပုံကိုတောင် မရသေးတာကြောင့် ကျန်းမာရေးဆိုင်ရာ လုပ်ဆောင်ချက်တွေအတွက် ခက်ခဲနေတယ်လို့ ပြောထားပါတယ်။

.

ကွန်ဂိုမှာဖြစ်ပွားနေတဲ့ လက်ရှိ အီဘိုလာဗိုင်းရပ်စ်ဟာ တရားဝင်အသိအမှတ်ပြုထားတဲ့ ကာကွယ်ဆေး မရှိသေးဘဲ ကမ္ဘာ့ကျန်းမာရေးအဖွဲ့က ကာကွယ်ဆေးသစ်ရဖို့အတွက် စမ်းသပ်နေကြဆဲဖြစ်ပါတယ်။

.

ကွန်ဂိုရဲ့အိမ်နီးချင်း ယူဂန်ဒါမှာလည်း အီဘိုလာရောဂါကူးစက်ခံရသူ ၁၉ ဦးတွေ့ထားပြီး အဲဒီထဲက ၁၄ ဦးက ကွန်ဂိုနိုင်ငံထဲကို ခရီးသွားခဲ့ကြသူတွေပါ။ လက်ရှိမှာတော့ ယူဂန်ဒါမှာ အီဘိုလာကြောင့် သေဆုံးသူ ၂ ဦီးရှိနေပါပြီ။

.

Source – BBC

.