စစ်ပြေငြိမ်းဖို့ အမေရိကန်နဲ့ အီရန် သဘောတူညီမှုရ၊ ဟောမုဇ်ရေလက်ကြား ပြန်ဖွင့်တော့မည်

.

၂၀၂၆ ခုနှစ်၊ ဇွန်လ ၁၅ ရက်

.

အမေရိကန်သမ္မတ ဒေါ်နယ်ထရမ့်က အမေရိကန်နဲ့ အီရန်တို့အကြား ငြိမ်းချမ်းရေးစာချုပ် လက်မှတ်ထိုးဖို့ ညှိနှိုင်းမှု အောင်မြင်သွားပြီဆိုတဲ့အကြောင်း ကြေညာလိုက်ပါပြီ။

.

.

အီရန်အစိုးရကလည်း ဒီကြေညာချက်ကို အတည်ပြုခဲ့ပြီး ၂၀၂၆၊ ဖေဖော်ဝါရီ ၂၈ က စလို့ အမေရိကန်နဲ့ အစ္စရေး ပူးပေါင်းတိုက်ခိုက်ခဲ့တဲ့ စစ်ပွဲကို အဆုံးသတ်ကြောင်း ကြေညာချက်ကို ဒီနေ့ ဇွန်လ ၁၅ ရက်မှာ ထုတ်ပြန်မှာဖြစ်တယ်လို့ အတည်ပြုလိုက်တာပါ။

.

ဒီကြေညာချက်ကို အမေရိကန်နဲ့ အီရန်အကြား ကြားဝင်ညှိနှိုင်းပေးနေတဲ့ ပါကစ္စတန်ဝန်ကြီးချုပ်က အရင်ဆုံး ကြေညာခဲ့တာဖြစ်ပြီး ဝန်ကြီးချုပ် ရှရစ်ဖ် က လက်ဘနွန်အပါအဝင် စစ်မျက်နှာအားလုံးမှာ စစ်ဆင်ရေးတွေကို အပြီးအပိုင်ရပ်ဆိုင်းဖို့ သဘောတူညီမှု ရသွားပြီဖြစ်ကြောင်း ပြောကြားခဲ့တာပါ။

.

အဲဒီနောက်မှာတော့ ထရမ့်က သူ့ရဲ့ဆိုရှယ်မီဒီယာပေါ်မှာ “အီရန်အစ္စလာမ်မစ်သမ္မတ နိုင်ငံနဲ့ သဘော တူညီချက်က အခုအချိန်မှာ ပြီးပြည့်စုံသွားပြီ” လို့ ရေးသားလိုက်ပြီး အဲဒီသတင်းကို အတည်ပြုပေးလိုက်တာ လည်း ဖြစ်ပါတယ်။

.

ဒီစာချုပ်မှာ ဟောမုဇ်ရေလက်ကြားကို ပြန်ဖွင့်ပေးခြင်းနဲ့ အမေရိကန်ရေတပ်ရဲ့ပိတ်ဆို့မှုတွေကို ချက်ချင်း ရုပ်သိမ်းခြင်း စတာတွေ ပါဝင်ပါတယ်။

.

အမေရိကန် နိုင်ငံခြားရေးဝန်ကြီး မာကိုရူဘီယို က ထရမ့်ကို ဂုဏ်ပြုခဲ့ပြီး ဒီကြေညာချက်ဟာ ဒေါ်နယ်ထရမ့် ရဲ့ မွေးနေ့နဲ့ တိုက်ဆိုင်နေတဲ့အကြောင်း ပြောကြားခဲ့တာပါ။

.

“အမေရိကန်က ထူးခြားတဲ့ သတ္တိ၊ခွန်အား၊ ဟာသဉာဏ်တွေအပြင် နိုင်ငံကိုချစ်တဲ့ ခေါင်းဆောင်တစ်ဦးကို ပိုင်ဆိုင်ထားတာ ကံကောင်းပါတယ်” လို့ ရူဘီယိုက X မှာ ရေးသားခဲ့တာပါ။

.

အီရန်ဖက်ကတော့ လက်ဘနွန်အပါအဝင် စစ်မျက်နှာအသီးသီးက စစ်ရေးဆောင်ရွက်ချက်တွေကို ချက်ချင်း ရပ်ဆိုင်သွားမှာ ဖြစ်တဲ့အကြောင်းနဲ့ အမေရိကန်အနေနဲ့ ပေးထားတဲ့ ကတိကဝတ်တွေကို အမှန်တကယ် အကောင်အထည်ဖော်၊ မဖော်ကို စစ်ဆေးအတည်ပြုပြီးမှသာ နောက်ဆုံးသဘောတူညီချက်အတွက် ဆွေးနွေးမှုတွေ ပြုလုပ်သွားမှာဖြစ်တဲ့အကြောင်း ပြောထားတာပါ။

.

အမေရိကန်က အီရန်ကိုပေးထားတဲ့ ကတိတွေမှာတော့ စစ်ရေးအရ တိုက်ခိုက်မှုတွေ ရပ်ဆိုင်းခြင်း၊ ရေတပ်ပိတ်ဆို့မှု ရုပ်သိမ်းခြင်း၊ ထိန်းသိမ်းထားတဲ့ အီရန်ပိုင် ငွေကြေးတွေ၊ ကုန်စည်တွေကို ပြန်လည် လွှဲပြောင်းပေးခြင်း စတာတွေ ပါဝင်ပါတယ်။

.

အီရန်သတင်းအေဂျင်စီရဲ့ ဖော်ပြချက်အရတော့ သဘောတူညီချက် မူကြမ်းမှာ အချက် ၁၄ ချက် ပါဝင်ပြီး အဲဒီအချက်တွေထဲမှာ လက်ဘနွန်အပါအဝင် စစ်မျက်နှာအားလုံးကို ချက်ချင်းရပ်ဆိုင်းခြင်း၊ ရက် ၃၀ အတွင်း ရေတပ်ပိတ်ဆို့မှုကို အပြီးတိုင်ပြန်လည်ရုပ်သိမ်းခြင်း၊ အီရန်အနီးတဝိုက်မှာ ရှိတဲ့အမေရိကန်တပ်တွေ ဆုတ်ခွာခြင်းနဲ့ ဟောမုဇ်ရေလက်ကြား ပြန်လည်ဖွင့်ပေးခြင်းတို့ ပါဝင်ပါတယ်။

.

ဒါ့အပြင် အီရန်ရဲ့ ရေနံရောင်းချမှုအပေါ် ပိတ်ဆို့အရေးယူမှုတွေကို ဆိုင်းငံ့ခြင်း၊ အမေရိကန်သိမ်းဆည်း ထားတဲ့ အီရန်ပိုင် ငွေကြေးနဲ့ကုန်ပစ္စည်း အမေရိကန်ဒေါ်လာ ၂၄ ဘီလီယံကို ပြန်လည်လွှဲပြောင်းပေးခြင်း စတာတွေလည်း ပါဝင်ပါသေးတယ်။

.

Source – BBC

.