မိုနာကိုက လူချမ်းသာရပ်ကွက် ဗုံးခွဲခံရပြီး ၃ ဦး ဒဏ်ရာရ

.

၂၀၂၆ ခုနှစ်၊ ဇွန်လ ၃၀ ရက်

.

မိုနာကိုနိုင်ငံက ဘီလျံနာတွေနဲ့ ဇိမ်ခံရွက်လှေတွေရဲ့ နေရာအဖြစ် လူသိများတဲ့ လူနေအဆောက်အအုံ တစ်ခုမှာ ဇွန်လ ၂၉ ရက်နေ့ ည ၉ နာရီလောက်က ဗုံးပေါက်ကွဲမှုဖြစ်ခဲ့ပြီး ယူကရိန်းသူဌေး တစ်ဦး အပါအဝင် ၄ ဦး ဒဏ်ရာရရှိခဲ့တယ်လို့ သိရပါတယ်။

.

.

ဒီနေရာက မိုနာကို မြို့လယ်လို့တောင် ပြောလို့ရတဲ့နေရာဖြစ်ပြီး ပိုက်ဆံချမ်းသာသူတွေ သီးသန့်နေကြတဲ့ နေရာမျိုးပါ။ ပေါက်ကွဲခဲ့တဲ့ဗုံးက လက်လုပ် ဖောက်ခွဲရေးပစ္စည်း တစ်ခုဖြစ်ပြီး သံသယရှိတဲ့ အမျိုးသား တစ်ဦးကို မိုနာကိုနဲ့ ပြင်သစ်ရဲတပ်ဖွဲ့တို့က လိုက်လံရှာဖွေနေကြပါတယ်။

.

ဒီ ဗုံးပေါက်ကွဲမှုက ယူကရိန်းရဲ့ နာမည်ကျော် စီးပွားရေးလုပ်ငန်းရှင် တစ်ယောက်ဖြစ်တဲ့ ယာမိုလိုင်ယက်ဗ် ကို ပစ်မှတ်ထားတာဖြစ်နိုင်ကြောင်း သတင်းတွေက ဖော်ပြနေကြပြီး ယာမိုလိုင်ယက်ဗ် နဲ့အတူ သက်ကြီးပိုင်း စုံတွဲတစ်တွဲနဲ့ ဆယ်ကျော်သက် လူငယ်တစ်ဦး ဒဏ်ရာရရှိသွားခဲ့ကြတာပါ။

.

မိုနာကိုဝန်ကြီးချုပ် မာမန်က အစောပိုင်းမှာ ဒီပေါက်ကွဲမှုက “တိုက်ခိုက်မှု” ဖြစ်ပုံရကြောင်း ပြောဆိုခဲ့ ပေမဲ့လည်း နောက်ပိုင်းမှာတော့ ဒီအသုံးအနှုန်းကို ပြန်လည်ရုပ်သိမ်းပြီး “ရည်ရွယ်ချက်ရှိရှိ ဖောက်ခွဲမှု” လို့ ပြန်လည်ထုတ်ပြန်ခဲ့ပါတယ်။

.

ပေါက်ကွဲမှုကြောင့် အသက် ၅၀ နဲ့ ၆၀ ကျော်အရွယ် ဇနီးမောင်နှံ ၂ ယောက်က အသက်အန္တရာယ် စိုးရိမ်ရတဲ့ အခြေအနေမှာ ရှိနေပြီး ၁၃ နှစ်အရွယ် လူငယ်ကတော့ မစိုးရိမ်ရတဲ့ ဒဏ်ရာမျိုးသာ ရခဲ့တယ်လို့ ဝန်ကြီးချုပ် က ပြောခဲ့တာပါ။

.

အသုံးပြုခဲ့တဲ့ ဖောက်ခွဲရေးပစ္စည်းတွေထဲမှာ သေနတ်ပစ်တဲ့ သံလုံးအသေးတွေနဲ့ စတီးလုံးတွေကို ထည့်သွင်းထားခဲ့တာ ဖြစ်တဲ့အကြောင်းလည်း ရဲတပ်ဖွဲ့က ထုတ်ပြန်ထားပါတယ်။

.

“ကျွန်တော်သိသလောက်တော့ မိုနာကိုရဲ့ သမိုင်းတစ်လျှောက် ဒီလိုဖြစ်ရပ်မျိုးက ပထမဆုံးအကြိမ်ပါပဲ” လို့ မာမန်က ဆိုပါတယ်။

.

အခြား ဒဏ်ရာရရှိသွားခဲ့သူ တစ်ယောက်ဖြစ်တဲ့ ယာမိုလိုင်ယက်က ၂၀၂၃ ဒီဇင်ဘာလကတည်းက ယူကရိန်း အစိုးရရဲ့ပိတ်ဆို့အရေးယူမှုကို ခံထားရသူဖြစ်ပြီး ဒီအရေးယူမှုက ရုရှားသိမ်းပိုက်ထားတဲ့ ခရိုင်းမီးယား ဒေသမှာ ဖွင့်ထားခဲ့တဲ့ အရက်စက်ရုံလုပ်ငန်းတွေနဲ့ ပတ်သက်နေတယ်လို့ သတင်းတွေက ဖော်ပြနေကြ တာပါ။

.

ပြင်သစ်သတင်းစာတွေရဲ့ဖော်ပြမှုအရတော့ ပေါက်ကွဲမှုမတိုင်မီ အချိန်အတွင်းမှာ အမျိုးသားတစ်ဦးက အဆောက်အအုံ ဧည့်ခန်းထဲမှာ အိတ်တစ်လုံး လာချထားခဲ့ပြီး ထွက်သွားခဲ့တာကို ရုပ်သံမှတ်တမ်းတွေကနေ မြင်ခဲ့ရတယ်လို့ဆိုပါတယ်။

.

ပြည်ထဲရေးဝန်ကြီး လော့ရင့်နူနက်ဇ်ကတော့ ရဲတပ်ဖွဲ့အနေနဲ့ ထွက်ပြေးလွတ်မြောက်နေတဲ့ ကျူးလွန်သူကို ဖမ်းဆီးနိုင်ရေးအတွက် ဆောင်ရွက်နေတယ်လို့ ပြောဆိုထားပါတယ်။

.

လက်ရှိမှာတော့ ပေါက်ကွဲမှုဖြစ်ပွားရာနေရာမှာ ရဲတပ်ဖွဲ့ဝင်အမြောက်အများ ချထားခဲ့ပြီး ပတ်ဝန်းကျင်လမ်း တွေကို ပိတ်ဆို့ထားတဲ့အပြင် ရဟတ်ယာဉ်တစ်စင်းကိုလည်း ကောင်းကင်မှာ လှည့်ပတ်စောင့်ကြည့်ဖို့ စေလွှတ်ထားတယ်လို့ သိရပါတယ်။

.

Source – Aljazeera

.