ဒီယယ်လိုရဲ့ တစ်လုံးတည်းသော ဂိုးနဲ့ ၃ မှတ်ရသွားခဲ့တဲ့ အိုင်ဗရီကို့စ်

.

၂၀၂၆ ခုနှစ်၊ ဇွန်လ ၁၅ ရက်

.

ဒီနေ့မနက်အစောပိုင်းမှာ ကစားခဲ့တဲ့ အိုင်ဗရီကို့စ်နဲ့ အီကွေဒေါ တို့ရဲ့ပွဲစဉ်မှာတော့ အိုင်ဗရီကို့စ်က မန်ယူကွင်းလယ်လူ ဒီယယ်လိုရဲ့ ပွဲပြီးခါနီး သွင်းဂိုးနဲ့အတူ အဖိုးတန် ၃ မှတ်ကို ရရှိသွားခဲ့ပါတယ်။

.

.

ဒီပွဲမှာ အိုင်ဗရီကို့စ်ရဲ့လူထုတ်ပုံက မေးခွန်းထုတ်စရာဖြစ်နေခဲ့ပြီး ဒီယယ်လို၊ အေဒင်ဂရာ၊ ဂတ်ဆန်၊ ဆန်ဂရီ၊ အန်ဒစ်ကာ စတဲ့ ကြယ်ပွင့်ကစားသမားတွေကို အရန်ခုံ ပို့ထားခဲ့တာပါ။

.

အီကွေဒေါကတော့ ကိုင်ဆီဒို၊ ဟင်ကာပီ၊ ပါချို တို့နဲ့ လူစုံခဲ့ပြီး တိုက်စစ်မှာ အန်နာဗလင်စီယာ ကို ထားပြီး ကစားခဲ့တာပါ။

.

ဒီပွဲအတွက် သုံးသပ်ထားခဲ့တဲ့အတိုင်းပဲ အီကွေဒေါက သူတို့အားသန်တဲ့ ခံစစ်ကို ပိုအားပြုကစားသွားခဲ့ပြီး တိုက်စစ်ကတော့ စိတ်ပျက်ဖို့ကောင်းခဲ့ပါတယ်။ တစ်ပွဲလုံးမှာမှ ဂိုးပေါက်တစ်ကြိမ်ပဲ တည့်ခဲ့တဲ့ အီကွေဒေါ တိုက်စစ်က ၃ မှတ်ယူဖို့ မလုံလောက်ခဲ့တာကြောင့် ပွဲချိန် မိနစ် ၇၀ နောက်ပိုင်းမှာ သရေတစ်မှတ်ရဖို့ကိုပဲ ဦးတည်ကစားလာခဲ့တာပါ။

.

အိုင်ဗရီကို့စ်ကတော့ ပွဲချိန် ၅၀ ကျော်ကတည်းက တိုက်စစ်ပိုင်းနဲ့ ကွင်းလယ်ကို အပြောင်းအလဲတွေ လုပ်ခဲ့ပြီး ပီပီ၊ ဝါဟီ၊ ဘာဇူမာနာ တို့ရဲ့နေရာမှာ ဒီယယ်လို၊ ဆန်ဂရီ၊ ဘွန်နီ တို့ကို ထည့်ကစားခဲ့တာပါ။

.

ဒါပေမဲ့ အီကွေဒေါခံစစ်က မာကျောနေသလို ဂိုးသမား ဂါလင်ဒက် ကလည်း လက်စွမ်းပြနေတာကြောင့် အိုင်ဗရီကို့စ်တို့ ဂိုးရဖို့ ခက်နေခဲ့ပြီး ပွဲချိန် ၈၉ မှာမှ ညာတောင်ပံကနေ ထိုးပေးလိုက်တဲ့ဘောလုံးကို ဒီယယ်လို က ဂိုးဧရိယာထဲမှာ အပိုင်ကန်သွင်းပြီး ဂိုးအဖြစ် ပြောင်းနိုင်ခဲ့တာပါ။

.

ဒီဂိုးက အိုင်ဗရီကို့စ် ကို ၃ မှတ်ရဖို့ လုံလောက်သွားခဲ့ပြီး အုပ်စုရပ်တည်မှုမှာ ဂျာမနီနဲ့အမှတ်တူ၊ ဒုတိယနေရာကို ရယူနိုင်ခဲ့ပြီဖြစ်ပါတယ်။

.