နိုင်ပွဲ ဆက်ဦးမယ့် ပြင်သစ်နဲ့ ဇွန်လ ၂၂ ရက်နေ့ ကမ္ဘာ့ဖလား ခန့်မှန်းချက်

၂၀၂၆ ခုနှစ်၊ ဇွန်လ ၂၂ ရက်

■ အာဂျင်တီးနား - ဩစတြီးယား (ည ၁၁-၃၀)

အုပ်စု J မှာ ၃ မှတ်စီ ရထားတဲ့ အသင်း နှစ်သင်း တွေ့ကြတဲ့ ပွဲမို့ ဒီပွဲမှာ နိုင်တဲ့သူက အုပ်စုဗိုလ် အဖြစ်နဲ့ နောက်တစ်ဆင့် တက်နိုင်မှာပါ။ အာဂျင်တီးနားက အဖွင့်ပွဲမှာ အယ်လ်ဂျီးရီးယားကို ၃-၀ နဲ့ နိုင်ခဲ့သလို ဩစတြီးယားကလည်း ဂျော်ဒန်ကို ၃-၁ နဲ့ နိုင်ခဲ့တာပါ။

အာဂျင်တီးနား တိုက်စစ်မှာ မာတီနက်ဇ်၊ မက်ဆီ အတွဲပဲ ပွဲထွက်လာဖို့ များပြီး အန်ဇို၊ မက်အလစ္စတာနဲ့ ဒီပေါလ်တို့က ကွင်းလယ်မှာ ကစားကြမှာပါ။ ခံစစ်မှာတော့ မာတီနက်ဇ်နဲ့ ရိုမီယိုအတွဲကိုပဲ မြင်ရဖို့ များပါတယ်။ ဩစတြီးယားဖက်မှာတော့ ဂျော်ဒန်နဲ့ ပွဲမှာ အနား ရထားတဲ့ အနော်တိုဗစ် က တိုက်စစ်မှာ ဦးဆောင်လာမှာပါ။ ဆာဘစ်ဇာ၊ ချုဝီမီကာ တို့ရဲ့ကွင်းလယ်၊ အလာဘာ ဦးဆောင်လာမယ့် ခံစစ်နဲ့အတူ ဩစတြီးယားကလည်း လူစုံထုတ် ကစားမှာပါ။

အာဂျင်တီးနားရဲ့ ၄ ပွဲဆက် ဂိုး မပေးထားရတဲ့ ခံစစ်ကို ဩစတြီးယားတို့ ဂိုး သွင်းနိုင်ပါ့မလားဆိုတာ စိတ်ဝင်စားဖို့ ကောင်းပြီး ဂျော်ဒန်ကိုတောင် ဂိုးပေးခဲ့ရတဲ့ ဩစတြီးယား ခံစစ်က မက်ဆီ ကို ထိန်းနိုင်ပါ့မလား ဆိုတာကလည်း မေးခွန်း တစ်ခုပါ။ ခြေစွမ်းအရတော့ တစ်ဦးချင်းကောင်းတဲ့ အာဂျင်တီးနားက အသင်းလိုက် ကောင်းတဲ့ ဩစတြီးယား ကို အနိုင် ရသွားဖို့ များပါတယ်။ အာဂျင်တီးနား ၃ မှတ်ရသွားမယ့် ပွဲပါ။

■ ပြင်သစ် - အီရတ် (နံနက် ၃-၃၀)

ဆီနီဂေါကို ဂိုးပြတ်နိုင်ပြီး ၃ မှတ် ယူထားတဲ့ ပြင်သစ်က ဒီနေ့မှာ အီရတ်နဲ့ ကစားရမှာပါ။ ပြင်သစ် တိုက်စစ်က ကမ္ဘာ့ဖလား အသင်းတွေထဲမှာ အကောင်းဆုံးလို့ ပြောလို့ရပြီး ဘက်ပီ၊ အိုလစ်ဆီ၊ ဘာကိုလာနဲ့ ဒမ်ဘီလီ အတွဲက တော်တော်လေး အဆင်ပြေနေတာကို တွေ့ရတာပါ။ အီရတ်ကတော့ နော်ဝေကို ဂိုးပြတ်ရှုံးခဲ့ပြီး ခံစစ်ကစားပုံကလည်း တော်တော်လေး ညံ့ပါတယ်။

အီရတ်ရဲ့ တာဆင်၊ ဟာရှန် ခံစစ် အတွဲလောက်နဲ့တော့ ပြင်သစ်တိုက်စစ်ကို ဟန့်တားဖို့ ဘယ်လိုမှ မဖြစ်နိုင်ပါဘူး။ ဒါ့အပြင် ဘက်ပီကလည်း ကမ္ဘာ့ဖလား ဂိုးသွင်းသူ စာရင်းမှာ မက်ဆီနဲ့ အပြိုင် ဖြစ်နေတာမို့ ဂိုး ရသလောက် ယူမှာပါ။ ပြင်သစ်ရဲ့ ဂိုးပြတ်နိုင်ပွဲ တစ်ပွဲကို ထပ်ပြီး တွေ့ရဦးမယ့် ပွဲပါ။

■ နော်ဝေ - ဆီနီဂေါ (နံနက် ၆-၃၀)

အဖွင့်ပွဲမှာ အမှတ်ပြည့် ရခဲ့တဲ့ နော်ဝေက သူတို့ထက် အများကြီး တောင့်တင်းတဲ့ ဆီနီဂေါကို ဘယ်လို တုံ့ပြန်မလဲ စောင့်ကြည့်ရမယ့် ပွဲပါ။

နော်ဝေက ဟာလန်း၊ ဆော်လော့၊ အိုဒီဂတ်နဲ့ ဘာ့ခ်ျတို့ကို အားကိုး ကစားနေရတာ ဖြစ်ပြီး ခံစစ်ပိုင်းမှာလည်း အားသာချက် သိပ်မရှိပါဘူး။ ဆီနီဂေါကတော့ ဂွီယီ၊ ဆား၊ ဒီယာရီ၊ မာနေး တို့ရဲ့ကွင်းလယ်နဲ့ နော်ဝေကို တုန့်ပြန်မှာ ဖြစ်ပြီး ကူလီဘာလီ၊ နီယာခါနီ တို့ရဲ့ခံစစ်ကလည်း အရမ်းကြီး အခြေအနေ ဆိုးနေတဲ့ အထဲတော့ မပါဘူး။

ပြီးခဲ့တဲ့ပွဲမှာ ပြင်သစ်ကို ရှုံးခဲ့တာမို့ ဒီပွဲမှာ ဆီနီဂေါ တို့ အမှတ်ရဖို့ ကြိုးစားလာမှာ ဖြစ်ပြီး နော်ဝေဆီကနေ အနည်းဆုံး သရေ တစ်မှတ်တော့ ရသွားမယ် ထင်ပါတယ်။

■ ဂျော်ဒန် - အယ်လ်ဂျီးရီးယား (နံနက် ၉-၃၀)

နှစ်သင်း စလုံးက အုပ်စု J ရဲ့ အိမ်ဖြည့် အသင်းတွေလို ဖြစ်နေကြပြီး ခံစစ်တွေကလည်း တော်တော်ဆိုးပါတယ်။ တိုက်စစ်မှာတော့ ဂျော်ဒန်ရဲ့ တာမာရီ ဦးဆောင်တဲ့ တိုက်စစ်ထက် အယ်လ်ဂျီးရီးယားရဲ့ မာရက်ဇ်၊ မာဇာ၊ အစ်နူးရီ တို့က ပိုပြီး ကောင်းတယ်ဆိုတာ အသေအချာပါပဲ။

ဒီပွဲကိုသာနိုင်ရင် နောက်ဆုံးပွဲ ဖြစ်တဲ့ ဩစတြီးယားနဲ့ ပွဲကို အဆုံးအဖြတ် ကစားဖို့ အခွင့်အရေး ရှိလာနိုင်တာမို့ အယ်လ်ဂျီးရီးယားတို့ ၃ မှတ် အပြည့် ရဖို့ ကြိုးစားလာမှာပါ။ အယ်လ်ဂျီးရီးယား ၃ မှတ်ရသွားဖို့ သေချာသလောက်ပါပဲ။

#KBZTai #Shan #Sports #Football #WC2026